هەردووە گەشمەرڎۍ ئەرەیاۋنای ئازادی نازم داشتان و جیهان بیلگینە بە کلیپو "ئۆغر بۊ"ی کە هەرمانێوە هونەری ناوازێنە جە لایەنو تەڤگەرو چاند و هونەری دیموکراتیکی میزۆپۆتامیای (تەڤ-چاند)یۆ یاڎۍ کریێوە. کلیپەکە سەرو پەلیانەو یوتوبو تەڤ-چاندیوە وەڵا کریاوە.

هۊنیەو گۆرانییەکۍ جە لایەنو هونەرمەڼ ڤارۆن جاندەمیریوە نویسیان و هەر ۋێچش ئەرکو کلیپەکەیش گێرتەن ئەستۆ، کلیپەکە جە مېیانو هونەریی گەشمەرڎە زانینینە تۆمارکریان و مۆنتاجەکەیچش جە لایەنو وەلات سەعیدیوە کریان.

بەرهەمو هونەری "ئۆغر بۊی" سەرنج وزۆ سەرو ئەوەکۊشای گەلو کوردی ۋەرا ۋەر بە دژمنا گەلو کوردی و گرنگی بەردەوامیدای بە ئەوەکۊشای.

جە ١٩و کانوونو یووەمو ٢٠٢٤، پەیامکیانەو ئاژانسو هەواڵوو هاواری جیهان بیلگینە و ڕۆنامەنوویس نازم داشتان، کاتێ ڕووماڵو مڎرامانو جەنگەوانا قەسەدەی و گەلی جە بەنداوو تشرینینە کەرێنۍ، سەعات ٠٣:٢٠ دەیەقۍ دما نیمەڕۊی سەرو ڕاو بەینو بەنداوو تشرینی و ناوچەو سرینینە ترۊمبێلەکەشا جەو لایەنو فڕۆکێوە بێفڕۆکەوان و چەکڎاری دۊڵەتو تورکیوە بۊمبواران کریا، بە مەڵامەتوو هرووژمەکەیۆ هەردووە ڕۆنامەنوویسەکۍ گەشمەرڎۍ بیۍ.