جەمیل بایک و موراد قەرەیلان پەیامێکی هاوبەشییان نارد بۆ کۆنگرەی کەنەکە و گوتییان: "ئەرک و ڕۆڵی کەنەکە لە ئامانجی بونیادناندا لەم پرۆسەیەدا زۆر زیاتر بووە. بابەتی یەکێتی نەتەوەیی وەک ئەرکێکی بەپەلەیە لە بەردەمماندا."
٢٣ـەمین کۆنگرەو ئاسایی کۆنگرەو نەتەوەیی کوردەسانی (کەنەکە) بە ۋەنایۆ پەیامی هامبەشو هامسەرۆکو کۆنسەو ڕاوەبەری کەجەکەی جەمیل بایکی و کادری سەرمەشقو پەکەکەی موراڎ قەرەیلان درێژەش هەن.
دەقو پەیامەکەی پی جۊرەنە:
"ئەنداما، دۆسا و هەڤاڵا ئێژای؛
سەرەتا سڵام جە دیوانو کۆنگرەی، گرڎو دۆس و هەڤاڵا بەشداری مکەرمۍ و هیواڎارێنمۍ کۆنگرەو گرڎیی کەنەکەی پەی وڵاتی و گەلەکەیما ئیسفاڎەش بۆ.
گەرەکما بۍ ئێمەیچ جە کۆنگرەو گرڎیی کەنەکەینە حزورما بۆ، بە ئەندامیەتی ئی ئەرەمەرزیا سەنگینەیە سەربەرزێنمۍ. بەڵام ۋەرو ئا مەڵامەتا کە شمەیچ مزاندێشا، نەتاواما چنیتا بیمۍ و بەشدارۍ بیمۍ. گەرەکمانە باوەڕ پانەی بکەردۍ کە حەرچنە دوورێچ بیمۍ و نەتاومۍ جە کۆنگرەکەنە بەشدارۍ بیمۍ ئانە ئەرکەکاما بە پاو ئامانجەکا کەنەکەی جابەجێ مکەرمۍ.
کۆنگرەو نەتەوەیی کوردەسانی (کەنەکە) کە ماوەو ٢٦ ساڵان سەرەمڕە درێژە بە کۊششەکاش مڎۆ، جە ئەرەمەرزنای ۋێشۆ ئی یۊبیە نەتەوەییەو کورداش کەردەن بە رۆژەڤی سەرەکی ۋێش و پەی ئی ئامانجەیچە چڼین کۆنفرانس و گلېرۊبیەیش ئەنجام دان، کۊشش ڕاوەبەر کەرڎەن. بی بە نوێنەری دیبلۆماسی گەلو کوردی جە جبەرو وڵاتی. بە پەرەپنەدای بە پەیوەندییەکا بەینو کوردا، پەرەدای بە پەیوەندییەکا بەینو پارت، ڕێکوستەی، ئەرەمەرزیا و دەزگا مەدەنییەکا و کەسایەتییە سیاسیەکا کوردیوە؛ وەشکەردەی ئایدیا و ستراتیجێوە هامبەش بیەن بە مەرامو بنەڕەتی کەنەکەی کە ئێمەیچ ئەندامێوەنمۍ چنەش. ئەر ئارۊنە جە پەیوەندییەکا بەینو کوردانە دیالۆگ و یۊگێرتەی هامبەش ئینا ئارانە، ئانە کەنەکە پەی ئانەی بیەن بە بناغە و پلاتفۆڕمی سەرەکی.
هەڤاڵا ئێژا؛
ۋەرکۊتو مېیامینی پایێش وستێنۍ دلۍ سەردەمێوە تازەیۆ کە کوردەسانیچ گێرۊوە و پێشئامایۍ خێرۍ ڕووەمڎا. تا مۍ جە ۋەرکۊتو مېیامینینە هامسەنگی هێز و پەیوەندی تازۍ مەیانە ئاراوە، گەلو کوردیچ هەوڵمڎۆ پېسە کارەکتەرێوە چالاکی بەشدارو ئی پرۆسەیە بۆ. پەی ئینەیچ بێگومان چێوی گرنگ و بنەڕەتی ئانەنە کورد پەرە بە ستراتیجی هامبەشی بڎۆ. ستراتیجی هامبەش ئا پەنەوازیە مسەپنۆ کە پارت، ڕێکوستەی، ئەرەمەرزیا و مەردمو کوردی جە هەرچوارپارچەو وڵاتی و جە جبەرو وڵاتیچنە گفتوگۆی هامبەش بکەرا. چی قۆناغەنە کەنەکە هەرمانێوە گرنگە بە بێ کەموکوڵی پێکمارۆ و یاوان پا ئاستەی بتاوۆ عالتەرین ئەوەکۊشای بکەرۆ. بە تەمامی باوەڕیما هەن کە کۆنگرەیچ پەی ئی مەرامیە قەراری بەهێز بڎۆ و پلانڕێژیش کەردەبۆ.
پېسە ئاشکران، ڕابەر عەبدوڵا ئۆجالان جە ئیمراڵینە بەنامۍ تەڤگەریماوە چنی دۊڵەتو تورکی ئینا گفتوگۆنە. ئی پرۆسە هەڵای درێژەش هەن. مەرامو ئێمەیچ چی پرۆسەنە پەی ئانەینە جە ڕاو گفتوگۊیۆ پەی پرسو کوردی ڕاو چارەسەری بێززمێوە. پېسە تەڤگەری پەیلوایما چامنەن کە چی قۆناغێنە جە گرڎ چێوۍ زیاتەر ۋەرپرسیاری ۋێما جابەجۍ کەرڎەن. ئیساتۍ کاتو لایەنەکەی تەرین. هیەواڎارێنمۍ لایەنی ۋەرا ۋەریچ ئەرکو ۋێش جابەجێ بکەرۆ و بیاومۍ بە دەرەنجامێوە.
بانگەوازو ٢٧و شوباتو ڕابەر ئاپۆی و وەڵێکۊتەیەکا دماتەری، ڕاستەوخۆ کاریگەری سەرو سیاسەتی جە ۋەرکۊتوو مېیامینی و کوردەسانەنە کەردەن و هەرپاسە بناغەو یۊبیەیش جە مابەینو کوردانە بەهێز کەرڎ. ئی بانگەوازە تاریخیە و سیاسەتەکۍ کە دماتەر پەرەشا پنە دریا، عالتەرین زەمینەش پەی کوردەسانی ئارڎ ئاراوە تا ئانەی سەرو پلاتفۆڕمی هامبەشی سەرو بنەماو بەرژوەندییە کوڵ، مېیان و درێژخایەنەکا گەلەکەما یۊبیەی نەتەوەیی دیموکراتیک بنیاڎ بنیا. بەڕاسیچ ۋەرو ئانەی دەسکەوت و شناسنامەو گەلەکەیما وردە وردە جە جبەرو وڵاتەکەیمانە ئینا چێرو فشار و هەڕەشانە، ئەوەکۊشای پەی پارېزنایشا و دەسوستەی مافە نەتەوەیی و دیموکراتیکییەکا هەمیشە بەردەوام بیەن و بەردەوامیچ بۆ. هەرپاسە ئی ئەوەکۊشایە پاسە بکەرۆ ڕا ڕووەو گرڎو گەلا تەرینە بکەرۊوە کە جە وڵاتەکەمانە پېوەرە مژیوا تا ئانەی بیاومۍ بە مافەکاو ۋێما. گرڎو بەشەکا گلېرگەی، بە تایبەتی ژەنی و جوانا، بناغۍ سەرەکی سەرکۊتەی ئی پرۆسەیەینۍ. بەشداری و پاڵپەشتیشا دۆزو گلېرگەی دیموکراتیکی و نەتەوەی دیموکراتیکی بەهێز مکەرۆ.
ئی بانگەوازییە هەرپاسە پەرەدای بە پەیوەندی تازەی چنی هێزە مېیاننەتەوەییەکا، هێزە هەرێمییەکا، گەلاو هەرێمەکەی و کارەکتەری سیاسی سەپنۊنە. کاتێ گەلو کوردی چنی هێزە مېیاننەتەوەییەکا و کارەکتەری هەرمینە پەرە بە پەیوەندی تازەی مڎۆ، مشۊم جە دلېینەو ۋێشەنە پەیوەندی نزیکتەربیەیۆ بنیاڎ بنیا و یۊبیەی ۋەرفراوان و بەهێز وەش بکەرا. گەلەکەما جە هەرچوار بەشو وڵاتەکەیمانە یاوان بە ئاستێوە فرە گرنگو ڕێکوستەبیەی و هۆشمەندی ئازادی. ئیتر جە ئاژەو بێ سەرمەشقی، بێ ڕیکوستەی و بێ ئیرادەی سەڎ ساڵی ۋېیەردەی ۋێش ڕزگار کەردەن. بەڵام ئەر ئی ماتەوزە و ئاڤانتاژەو ۋێش بە ئەنەیاوایۍ هامبەش و ستراتیجی هامبەش بکەرۆ ئانە متاوۆ مافەکاو ۋێش و ستراتیجو ۋێش دەس وزۆ. کەنەکە یۊن جە گرنگتەرین لایەنەکا ئی ئەرک و ۋەرپرسیاریە.
دەور و ئەرک جە ئەرەمەرزنای کەنەکەی چی پرۆسەنە فرە زیاتەر بیەن. کورد هەڵای بەتەمامی یۊبیەی ۋێشا بنیاڎ نەنیان. مژارو یۊبیەی نەتەوەیی ئەرکێوە گرنگو ۋەردەمیمانە. ڕابەر ئاپۆ جە دما دیدارو ۋێشەنە جەخت سەرو ئی مژارەیە مکەرۆ و داوا جە گرڎ کەسێ مکەرۆ ئەرکو ۋێشا جابەجێ بکەرا. جە کۆنفرانسو لۆزانینە، قەرار دریا کۆنفرانسێوە نەتەوەیی ئەنجام بڎریۆ. پەنەوازا کەنەکە چی ڕوۆ فرەتەر هەوڵبڎۆ و جە چوارچێوێوە کاریگەرەنە بتاوۆ کۆنفرانسێوە نەتەوەیی ڕێکوزۆ.
جە ماوەکا ئایندەینە، پېسە ئەندامو تەڤگەری و هامکات پېسە ئەندامو کەنەکەی درێژە بە کۊششەکاما مڎەیمۍ پەی یۆبیەی نەتەوەیی کوردا و ئانەی گنۆ ئەستۆما جابەجێش مکەرمۍ.
پی باوەڕ و بڕیاردارییوە سڵام جە کۆنگرەی گرڎیی مکەرمۍ و هیواو سەرکۊتەی پەی ئیدارەی تازە هۊرچنیای موازمۍ."
