هامسەرۆکو جەمەو کەلتور، یۊبیەی، پەشتیووانی و هامکاری کەسوکارو بێسەروشۊنکریایا جە لانکەو  شارستانیەتی (مەبیا-دەر) محەمەد ئەمین کلیچ سەرو قەرارەکا پەکەکەی و ئا هەنگامۍ کە مشۊم دۊڵەتو تورکی بنیۆش پەی ئاژانسوو هەواڵوو فوراتی (ANF) قسێش کەردۍ.

کلیچ واتش: "تاوەکو ئیساتۍ کورد و تەڤگەرو ئازادی کوردی ئا لایەنێنۍ جەنگشا هۊرنەچنیەن" و ئاماژەش پانەی دا مشۊم ئانەیچ بزانیۆ ئینە بە ناچاری کریا بۍ. 

'گەلو کوردی بە شێوێوە جدی خاوەنداری جە پڕۆسەکەی مکەرۆ' 

کلیج ئاماژەش پانەی دا گەلو کوردی چنی نایاسایی و هرووژمەکایچ پاگیری جە ئاشتی مکەرۆ، بە شێوێوە جدی خاوەنداری جە پڕۆسەو ئاشتی مکەرۆ و واتش: "مشۊم بزانیۆ جەنگ چارەسەر نییا، گفتوگۆ چارەسەرا. ۋەرو ئانەی تورکیا جوابو بانگەوازەکەیش نەڎانۆ گنۆنە چێرو ۋەرپرسیارییەتیێوە گۊرەیۆ. بڕۍ هەنۍ گەرەکشا نیا پڕۆسەو ئاشتی بلۊ وەڵێوە. پەی ئانەی پڕۆسەکە تێکنەشۆ مشۊم دۊڵەت هەنگامە بنیۆ. ئەر هەنگامەی ئازایانۍ نەنریۆ، کریۆ ئی دەرفەتە تاریخیەیە جە دەس بڎەیمۍ." 

'مشۊم دۊڵەت دەمودەس هەنگامېوە ئاشکرا بنیۆ' 

کلیچ ئاماژەش پانەیچ دا پەی ئانەی پڕۆسەو ئاشتی بە شێوێوە ئەرێنی بلۊڕاوە، مشۊم دۊڵەت  دەمودەس هەنگام بنیۆ و واتش: "ڕابەرو گەلو کوردی عەبدوڵا ئۆجالان جە ساڵۊو ١٩٩٣ واتش تەرەفڎارو ئاشتی نا. ئارۆ ئینا هەمان یاگێنە و ئاشتیش گەرەکا. ئەر ئا کاتە دۊڵەت جوابو بانگەوازەکەو ئېژا ئۆجالانیش دابیێوە، ئارۆ ئاڼنە ئینسانۍ جە دەس نەڎێنمۍ. 

پەی ئانەی پڕۆسەکە تێکنەشۊ، مشۊم جە لایەنو دەسەڵاتیوە دەمودەس هەنگامە بنریۆ. گەلو کوردی جوابو بانگەوازەکەو ئېژا ئۆجالانیش داوە و بە شێوێوە جدی خاوەنداریش جە پڕۆسەکەی کەرڎ، هەنگامېوە ئازایانێش نیا. سەرەڕاو ئانەی پەکەکە ئینا چېرو هرووژمینە، قەرارێوە ئازایانەش دا. ئایا دۊڵەت چەمەڕاو چێشین؟.