کۊنیشتوو "پرسو کوردی و پێشئامایەکا جە ۋەرکۊتوو مېیامینی" جە ئەسیناو پایتەختو یۆنانینە بەردەواما. هامسەرۆکو پەیەدەی غەریب حەسۆ، هامسەرۆکو فەرمانگەو پەیوەندییەکا جبەرو ئیدارەو ۋێڕاوەبەری سەرنیشت و ۋەرکۊتی ئیلهام ئەحمەدە، هامسەرۆکۊو ئۆفیسو پەیوەندییە دیپلۆماسییەکا پەیەدەی سەما بەگداشە و چڼین ئەکادیمستۍ، سیاسەتمەدارۍ و ڕۆنامەوانۍ بەشدارۍ کۊنیشتەکەی بێنۍ.

جە ئەرەنیشتەی یووەمو کۊنیشتەکەینە بە سەرپەرەشتی زەکیە ئەقرەیۍ، هۊرسەنگنای پەی ئاژەو کوردا جە سووریانە کریا.

ئەکادیمیست کاتیا زاگۆریتۆ ئاماژەش پانەی دا مشۊم دڎان بەگرووپە نەتەوەیی و ئاینییەکا سوریایرە بنریۆ و مافو گرڎو گرووپە کۆمەڵایەتییەکا بە دەستوور چەسپیۆ.

مامۆسای یاردیدەر جە زانشتگەو نیشتیمانی و کاپۆدیستری ئەسینای پایتەختی، ئەنتۆنیس دێریزۆتیس ئاماژەش پانەی دا دەسەڵاتو ئاکەپەی بە ئۆپراسیۆنی تازە هەوڵو دەسسەرەرەگێرتەی مڎۆ، هەوڵمڎۆ ئۆپۆزسیۆنی سەرکوت بکەرۆ و واتش: "جە سەرنیشت و ۋەرکۊتوو سووریاینە دۊڵەتو تورکی جە هرووژمەکاش بەردەواما و هەوڵ مڎۆ جە ڕاو چەتەکاوە سیستەمو ۋێش جە سوریانە بنیاڎ بنیۆ."

جە دما دمایی ئەرەنیشتەی یووەمینە جە زانشتگەو پێلۆپۆنێزی، پرۆفیسۆر سۆتیریس ڕۆسۆس قسێش کەردۍ و ئاماژەش پانەی دا جە ئیساتێنە ڕێککەوتەیۍ جە ما بەینو تورکیا و سعودیەینە هەن.

یووەم ئەرەنیشتەی بە پرسیار و جواب دمایش ئاما.