هامسەرۆکو ئەستەنبوڵو دەم پارتی، چنار ئاڵتان ئاماژەش پانەی دا جە گلېرۊبیەکاشانە کە جە گەڕەکەکانە ئەنجامشا دێنۍ گرڎ لایەنگری ۋێشا پەی ئاشتی بەربڕیەن، بەڵام تەنیا ئانە وەسۍ نیا پەنەوازا گرڎ کەسۍ ۋەرپرسیاری ۋێشا گێرانە ئەستۆ.
دماو بینای کۆنگرەو ١٢ـەمینو ۋێش، پەکەکە قەرارو دمایئاردەیش بە ڕێبازو ئەوەکۊشای چەکڎاری دا، لاو ۋێشۆ دەم پارتی زیاتەر پەرەش بە هەرمانەکاش دا پەی ڕەخسنای دەرفەتی زیاتەری پەی پرۆسەکەی.
چا بارۆ هامسەرۆکو ئەستەنبوڵو دەم پارتی چنار ئاڵتان پەی ئاژانسیما قسێش کەردۍ و ئاماژەش پانەیە دا جیای قسۍ خاوەنداریکەردەی جە پرۆسەکەی، هۊرگېرتەی ۋەرپرسیاری و بەشداربیەی کارا جە لایەنو گرڎ کەسێوە گرنگتەر و کاریگەری زیاتەرش بۆ و ئاماژەش پانەی دا پەی فاڕیای دیموکراتیکیانەی پەنەواز بە فشارێوە گلېرگەیی مکەرۆ و واتش: "پەنەوازا ئی مژاریە هۊرچەرخنمۍ سەرو پراکتیزێوە کاریگەری پا جۊرەی گرڎ کەسێ بۊ بە کۊڵەکۍ بنەڕەتی ئاشتی و بۆ بە هێزێوە کۊششکەری ئامانجدار."
ئاڵتان جە بەردەوامیینە واتش: "داواکاریما جە دۊڵەتی تا ئانەی بە هەنگامەی ڕۊشنە جوابو هەنگامەکا پەکەکەی بڎۊوە ئینا ئارانە، بەڵام تا داواکاری و بانگەوازییەکەما کۆنکرێتی نەبۆ دۊڵەت ناچار بە هەنگامنیای نمەبۆ. پەنەوازا چی ڕوانگۆ ئامانجەکاما دۊڵەمەنتەر بکەرمۍ."
جە دما دمایی قسەکاشەنە ئاڵتان سەرنجش وست سەرو هەرمان و چالاکییەکاشا پېوەس بە پرۆسەکەی واتش: "جە گلېرۊبیەکامانە گرڎ ماچا لایەنگرۍ ئاشتیینمۍ، بەڵام ئینە گرڎ چێوۍ نیا. ئەر لایەنگرۍ ئاشتی بیدۍ ئا کاتە ۋەرپرسیاری ۋێتا گێرتێنە ئەستۆ. پۊکەی پەی ئانەی دۊڵەت ۋەرپرسیاری ۋێش گېرۊنە ئەستۆ پەنەروازا بە گرڎو بەشەکا گلېرگەیۆ بەشدارۍ پرۆسەکەی بیمۍ و دۊڵەتی ناچار بە هەنگامەی کۆنکرێتیۍ بکەرمۍ."
