ڕوانگەو سووری پەی مافەکا مرۆڤی (سۆهر) ئەرەیاوناش جە ٢٤ سەعاتا ویەردەینە جە سووریا ١١ کەسێ بەمەڵامەتو هرووژمی، تەقەمەنی پاشماوەو جەنگی و بەکارئاردە و چەکیۆ کوشیێنێ.

سۆهر سەبارەت بابەتەکەی ئاماژەش پامەیەدا جە ناوچە و دویری سەر بە دێرەزۆری شوانێوە بەمەڵامەتو تەقەمەنی ئەڵغامیۆ گیانش جە دەسدان، هەرپاسە جە شارو سیبیخانی کناچێ بە خەڵەت جەلایەن و براکەیشۆ بە چەکو ڕاوکەردەی کوشیێنیە.

سۆهر ئاماژەش پانەیشدا جە ناوچە و جەلای جە وەرکەوتوو دێرەزۆری بەمەڵامەتو تەقایۆ کۆگایێ چەکی، ئەرێ ئەندامێ هێزە ئەمنییەکا دەسەڵاتداری دیمەشقی گیانشا جە دەسدا و چواری تەریچ زامڏارێ بیێ.

بە پاو سۆهری، جە جەبەل شاعیر جە حومسەنە بەمەڵامەتو تەقایۆ ئەڵغامیۆ زاڕۆڵێوە گیانش جە دەسدا. هەرپاسە دەگانشینو جەبەلی لازقیە جە هرووژمێ نەشناسی چەکدارینە جوانێ کوشیا.

سۆهر ئاشکراش کەرد، جە کۆلانە و ناسریە و شارو حەسەکەینە، جەمێ دزێ هورشاکوا سەر و یانێوە و کەسێوەشا کوشت، جە هەمان شارەنە جە ئەنجامو تەقکەردەی هەڕەمەکی گەنجێوە گیانش جەدەسدا.

هەرپاسە ئاماژەش پانەی کریان جە کۆڵانە و سۆمرییەی جە دیمەشق بەمەڵامەتو تەقەکەردەی هەڕەمەکیۆ زاڕۆڵێوە گیانش جەدەسدا، جە دەگاو مەنبجی کاتو پاککەردەیۆ چەکی زاڕۆڵێوە ١٥ ساڵ بە خەڵەت کوشیا.