ئەندامۊو کۆنسەو ڕاوەبەری کەجەکەی سۆزدار ئاڤێستا باسش چانەی کەرڎ سەرو میراتو مڎرامانو ٥٢ ساڵەو پەکەکەی ئەوەکۊشای گۊرەتەر مکەرمۍ و واتش: "ئیتر کات کاتو بنیاڎنیای گلېرەگێوە دیموکراتیکی و ئاشتییا. کاتو یەکانگیرکەردەی هێزو ژەنۍ و جوانان."
پەکەکە جە ٥-٧و ئایارینە ١٢ـەمین کۆنگرەو نائاسایی ۋێش بینا. پېوەس بە ئەوەکۊشای ئازادی دماو کۆنگرەو پەکەکەی سۆزدار ئاڤێستا ئاماژەش پانەیە دا پەکەکە نامۍ ۋێش بە پیتەی ئاڵتونیە جە تاریخەنە هۊرکۊڵێنە و قارەمانیێوە گۊرەش جە تاریخەنە تۆمارکرد و پی جۊرە یاڎ مکریۊوە.
سۆزدار ئاڤێستا جە سەرەتاو قسەکاشەنە گەشمەرڎۍ ڕاو ئازادیش یاڎ ئاوردۍ و سڵامش ۋنەو مڎرامانو ڕابەر ئاپۆی کەرد و واتش: "کۆنگرەو ١٢یما جە ئاژێوە نائاسایینە بینا. ئی کۆنگرە دەرەنجامو ئەوەکۊشای ٥٢ ساڵەو ئەوەکۊشای پەکەکەین بە سەرمەشقایەتی ڕابەر ئاپۆی. هەرپاسە سەرو کۊڵەکۍ قارەمانیەتی گەشمەرڎا کۆنگرە بینیا."
'پەکەکە پەی گرڎو مرۆڤایەتی پەرەش بە شۆڕشێوە بنەڕەتی دا'
سۆدار ئاڤێستا سەرنجش وست سەرو گرنگی بنەڕەتیانەو شۆڕشو پەکەکەی و واتش: "پەکەکە گەلو کوردیش کەرڎ بە گەلێوە قارەمان، پەکەکە پەی تەمامو مرۆڤایەتی شۆڕشێوە بنەڕەتی، شۆڕشو ژەناش وەڵۍ وست. پەکەکە دلېینەو ۋێش جە ئەوەکۊشای ئازادی ژەنێوە هۊرگېرت. بە سەرمەشقایەتی ڕابەر ئاپۊی جە گرڎ یاگێنە ژەنی بیۍ سەرمەشقۍ و کۊششکارۍ و خەیاڵو ئازادی جواناش زیڼەکەردۆ. پەکەکە دلۍ کوردانە هۆشیاریێوە گۊرەش وەڵێوست و جە سەیەو پەکەکەی و ڕابەر ئاپۆیۆ کوردی ئازاد، یۊگێرتە و کۊششکار وەش بی و پی ماتە وزۆ یاوا کۆنگرەو ١٢. سەرو کۊڵەکۍ 'بانگەوازو ئاشتی و گلېرگەی دیموکراتیک'ی و بە سەرنجەکا ڕابەر ئاپۆی کۆنگرە گلېربیۆ. ڕەنج، ڕوح و کۊششەکۍ پەکەکەی بەشێوێوە کراوە و دۊڵەمەڼنانە بە شێوێوە کە ئیتر بیەن بە موڵکو تاریخی شرۆڤەکریا. حەرچڼە خەمباریچ بیەبۆ بەڵام تەمامو ئەندام و نوێنەرەکا کۆنگرەی چا هوشیاریەنە بێنۍ کە پەکەکە چوارچێوەو پارتی کلاسیکیش ماڕان. پەکەکە ڕوانگەو ژەنۍ ئازادۍ، سۆسیالیزمی دیموکراتیک، گلېرگەو کۆمۆنەی و دیموکراتیکی و ئازادیوازیش وەڵۍ وست."
'پەکەکە بە هۆشیاری تاریخیۆ پڕاوە پەی بنیاڎنیای گلېرگێوە دیموکراتیک'ی
سۆزداری ئاڤێستا جە بەردەومیینە ئاماژەش بە گرنگی پەیامەکەو ڕابەر ئاپۆی کەرد و واتش: "حیچ کەسێ دمایش بە پەکەکەی نارڎەن. هەرپېسە ڕابەر ئاپۆیچ جە بانگەوازو ئاشتی و گلېرگەو دیمورکراتیکی ۋێشەنە ئاماژەش پنەکەردەبۍ، گرڎو ئا جمېیەر و جەمۍ پی جۊرەنۍ کە بە زۆر دلێنە مەبریا پەنەوازا ۋێشا بکەرا بە موڵکو گلېرگەی و تاریخی. پەکەکە پی جۊرە دلېنە نەبریان، پەکەکە ئەرکی تاریخی ۋێش جابەجۍ کەرڎ. ئیتر ئەرک و ۋەرپرسیاری ۋێش بە زانابیەیۆ دلۍ گلېرگەی دیموکراتیکینە وەڵۍ وزۆ. گلېرگەو کۆمیناڵی، سۆسیالیست، دیموکراتیکی بە سەرمەشقایەتی ژەنۍ و جوانا کوردەسانی و ئەنتەرناسیۆناڵی و گرڎو ئازادیوازا جە گرڎ یاگێنە وەڵا بۆوە. ئیتر دمایی ئارڎەی بە زهنیەتو پیا سالاری مەرجا. بەرە ۋەردەمو سیاسەتی دیموکراتیکیانەینە کریۆوە. پەکەکە ئی ئەوەکۊشایشە پەی ئازادی ژەنا و تەمامو مرۆڤایەتی ئی فاڕیایێشە بەردێنۍ ڕاوە. ئینەیچ جە تاریخەنە بە پیتەی ئاڵتونیە و قارەمانیەتی جە تاریخەنە تۆمارکریان. پەکەکە بی بە موڵکو تاریخی وە جە تاریخەنە نامنشین بی، حیچ هێزێوە نمەتاوۆ ئینە ئاوەژۆ بکەرۊوە. سەرو ئی بنەمایۍ گرڎو ئا دژایەتیۍ کە دژو پەکەکەی گیریێنێنە ۋەر دمایش پنە ئارڎۍ."
'کات کاتو بنیاڎنیای گلېرگەی دیموکراتیکییا'
سۆزدار ئاڤێستا پی جۊرە دمایش بە قسەکاش ئارڎ: "کات کاتو گلېرگەی دیموکراتیکییا، کاتو ئاشتی و یەکانگیرکەردەی هێزو ژەنۍ و جوانان. سەرو ئی بنەمایۍ کۆنگرە بەشێوێوە سەرکۊتانە، یۊگێرتانە و یەکهەڵوێستیانە، یەک روحی و یەک دەنگی کۊبیۆ. ئینەیچ سۊقاتیۍ گۊرەن پەی گرڎ کەسۍ. یووەم جارا دلۍ پەکەکەینە چێوۍ پی جۊرە ڕووە مڎۊ. پارتێوە ٥٢ ساڵە بە ئەوەکۊشای گۊرۆ ۋێش یاونا ئارۆ. ئەوەکۊشای بەردەوامیش هەن، جە بنەڕەتەنە سەرجەنۆ دەس پنە مکەرۆ. سەرو ئی بنەمایۍ مشۊم میراتو ٥٢ ساڵە و ئی ئەوەکۊشایە زیاتەر گۊرە بکریۆ. باوەڕیما بە گەلەکەیمانە، پا ڕوحیەتەی کە وەشکریان، باوەڕما پی زانستەیە هەن، باوەڕما بە ڕابەر ئاپۆیا. ئی هەنگامۍ جە ڕابەر ئاپۆی، ژەنا، جوانا و تەمامو گەلەکەیما پیرۆز مکەرو."
