یوکسەل گەنچە ڕاوەبەرەو 'سامەر'ی ئەرەیاۋناش: "جە ماوەو ٢٤ ساڵی ۋېیەردەینە بە مەڵامەتو فاڕیایە کۆمەڵایەتییە سیاسییەکاوە، فشار، هەژاری، ئاستەنگییەکۍ ئازادی ویر و ڕای، ژمارەو ۋۍ کوشتەی ٥/٢٪ زیاڎشا کەردەن.
جە کوردەسانەنە سیاسەتو جەنگی تایبەتی دۆڵەتو ئاکەپە – مەهەپەی جە دژو جوانا ڕووانا ئاستێوە جیاواز بە ۋێشۆ موینۆ. جە لێوە جوانا کوردی بەرەو مادەی هۆشبەری ملا و جە لێوەتەریچۆ ژمارەو ۋێکوشتەیاکا ئینا زیاڎبیەینە. هەرپاسە ئەوەکۊڵیایەکۍ مېیانو شۆنیرەلوای مێڎانی سیاسی- کۆمەڵایەتی (SAMER)ی ئی مژاریە پەشڕاس مکەراوە. بەپاو ئەوەکۊڵیایەکا، ڕۆ دماو ڕۆی ڕێژەو ۋێکوشتەی ئینا زیاڎ بیەینە. شارو سیرتی ئینا پلەی یووەم و ۋێکوشتەکانە و هەرپاسە شارو ئامەدی ئینا پلەی یووەمو ۋێکوشتەو زاوڵانە.
یوکسەل گەنچە ڕاوەبەرەو گرڎی مېیانو شۆنیرەلوای و ئەوەکۊڵیای مێڎانی کۆمەڵایەتی-سیاسی (سامەر)ی، مەڵامەت و پاڵنەرو ۋێکوشتەیەکا جە کوردەسان و تورکیانە هۆرسەنگنۍ و ئەرەیاۋناش: "جە ماوەو ٢٤ ساڵا ۋېیەردەینە حاڵەتەکۍ ۋێکوشتەی جە کوردەسان و تورکیانە بە ڕێژەو ٢.٥٪ زیاڎشا کەردەن. حاڵەتەکۍ ۋۍ کوشتەی ئاماژە بە جەمێوە کێشەی جددی جە گلێرگەو سیاسی تورکیاینە نیشانە مڎا. ۋەرو ئانەی قەد حاڵەتو ۋێکوشتەی تەنیا ۋەرو ویستو مرۆڤەکا نییا. جە هەمان کاتەنە ئانۍ دمایی بە ژیۋای ۋێشا مارانە، جە بارەو پێکئامای کۆمەڵایەتی-کولتووری و کەشی سیاسییوە پەیام مڎا.
پۊکەی نمەکریۆ واچمۍ زیاڎبیەی حاڵەتەکاو ۋێکوشتەی جە تورکیا و کوردەسانەنە ئاساییا و پێوەس نیا بە کەشوهەوای سیاسیوە جە ماوەو ٢٤ ساڵی ۋېیەردەینە.سەرەڕاو ئانەی پێکئامای کۆمەڵایەتی ۋێش فاڕۆنە. بە تایبەتی بەکارئاوردەی ماددە هۆشبەرەکا تا ڕادێوە فرە عیلاقەش پی مەڵامەتاوە هەن. ئینەیچ ئانەی بەر وزۆ کە کوشتەیەکۍ بە ڕێکەوت نیەنۍ، بەڵکم دەرەنجامو سیاسەتێوە بنەڕەتینۍ."
یوکسەل گەنچە ئاماژەش پانەیچ دا کە حاڵەتەکۍ ۋۍ کوشتەی جە کوردەسانەنە ئینۍ زیاڎبیەینە و پەنەوازا بە شێوێوە تایبەت هۊرسەنگنایشا پەی بکریۆ و واتش: "ژمارەو حاڵەتەکا ۋۍ کوشتەی جە هەرێمەکەنە جە بڕۍ شارێنە بە مقارنە بە گرڎو تورکیای زیاتەرا. بەتایبەت جە ٧ شارا کوردەسانینە چی بوارەنە سەرنج دەیدۍ. شڕناخ، سیرت، مێردین، ئەرزینگان، ئەرزروم، ڕحا و جولەمێرگ. چی شارانە ڕێژەو زیاڎبیەی حاڵەتەکاو ۋێکوشتەی زیاتەریڼۍ جە ڕێژەو گرڎیی تورکیای. موینمۍ جە شارەکاو کوردەسانینە فرەتەرین حاڵەتو ۋێکوشتەی ئینا ما بەینو تەمەنو ١٥پەی ١٩ ساڵینە. پۊکەی مکریۆ واچمۍ ڕێژەو ۋێکوشتەی زاوڵا بەتایبەت جە شارو ئامەدینە ئینا بەرزتەرین ئاستەنە.
یوکسەل گەنچە چنی ئاماژەدای پانەی کە پەنەوازا کۊششۍ جدی بکریۆ پەی کەمکەردەیۆ و دمایئاردەی بە حاڵەتەکا ۋێکوشتەی، ئەرەیاۋناش: "موینمۍ قەیرانەکۍ سیستەمی کاریگەری ڕاسەوخۆشا سەرو حاڵەتەکا ۋێکوشتەی هەن. شارەکۍ کوردەسانیچ کە ئەرەمەرزیا و ڕێکوزیا مەدەنیەکێش لاوازۍ مکریا، پېسە پەنەوازی نمەتاوا جە ۋەرا ۋەرو ئی ئاژەینە مرداوە. چونکی گرنگتەرین ڕا پەی ڕاگێرتەی چی ڕووەدایا هۆشیاری کۆمەڵایەتی و هەرمانەی هامبەشەنە."
