ئەرەنیشتێ قەندیلی بە وێنیشاندای و ڕاپیمای دژ بە بەجا کەردەی هێزەکێ پەدەکەی جە وەرتێ ناڕەزایەتیشان نیشانە دا و وازیاریێنێ (پەدەکە) هێزەکانش بکێشۆنەوە و بە یەک دەنگ واتشان: بە یۆگێرتەیی بەرەنگارێ ئەرەگێرتەی تورکیای مەبێمێوە.
هێزەکێ (پەدەکە)ی پارتەکەو مەسعود بارزانی جە ۱٥و نیسانیەوە جە زین-و وەرتێ سەر بە شارچەو ڕەواندوز-ی بەجا کریێنێ. هاموەخت جیا جە زینی پەدەکە هێزش پەی سەرجەم محوەرەکانو ڕەواندوز، هەڵگورد، سۆران، کاروخ-ی ڕەوانە کەردەن و بنکێ و بارەگایێ سەربازیێ تازێ دروستێ مەکەرۆنە و بنکە سەربازیە کۆنەکان نۆژەنێ مەکەرۆنەوە. بەی تەوەرە بە فیت و پیلانگێڵنای ڕژێمە ئەرەگێر و دژە کوردەکەو تورکیا ئامادەکاری پەی ئاژاولێ و هۆرگیرسانی ئێرو جەنگی کورد بەکوردی مەکەرۆنە.
ئی کەردە سەربازی و جەۆگەرانەو پەدەکە-ی ناڕەزایەتی سەرجەم چینەکێ گلێرگەو کوردەواریش ونەکەفتەنەوە و گرد لایێ وازیاریێنێ پەدەکە واز جە هۆرگیرسنای ئێرو جەنگی باوەرۆنە و جە ئانەیە زیاتەر نەگنۆنە خزمەتو پیلانەکانو تورکیای ئەرەگێری.
جە چوارچێوەو ناڕەزایەتیەکانە ئارۆ دوە شەممە، ئەرەنیشتێ دەگایەکێ بنارو قەندیلی بە وێنیشاندای و ڕاپیمای ناڕەزایەتیشان دژ بە بەجا کەردەی هێزەکێ پەدەکەی جە وەرتێ ئەنجام دا.
وێنیشاندای و ڕاپیمایەکە جە دەگاو برۆکسکان-ی دەستش پنەکەرد و تا دەگاو ماردۆ-ی درێژەش کێشا.
ئەرەنیشتێ قەندیلی وازیاریێنێ هەرچی زووەن (پەدەکە) هێزەکانش جە وەرتێ بکێشۆنەوە و بە یەک دەنگ واتشان: "بە یۆگێرتەیی بەرەنگارێ ئەرەگێرتەی تورکیای و شەڕەنگێزی (پەدەکە)ی مەبێمێوە.
قەندیلیەکێ (پەدەکە)شان بە تونڎی وشیار کەردەوە، تا دەست جە خیانەتی و هۆرگیرسنای ئێرو جەنگی هۆربگێرۆنە و وازیارێ بێنێ، تا بەزوویی سپا ئەرەگێرەکەو تورکیا جە پانیشت (باشور)و کوردستانی هێزەکانش بکێشۆنەوە.
جە وێنیشاندای و ڕاپیمایەکە جەماوەری ناڕازی چەنڎین دروشمێشان دژ بە تورکیای ئەرەگێری، خیانەتی و جەنگی واتێوە و پەشتیوانیشان جە یۆگێرتەیی و یەکێتی نەتەوەیی کەردەوە.
