مەزڵوم عەبدی، فەرمانڎەی گرڎیی هێزەکاو قەسەدەی، ئەرەیاۋناش ئێمە پەی چارەسەری چنی گرڎوو لایەنگرا دیالۆگی ئاماڎێنمۍ و واتش: "با ساڵەی ئاینڎۍ بە مڎرامان ۋییەرنمۍ. من قەناعەتم چامنەن وەڵێکۊتەیۍ قەوەتتەر ڕووەمڎۆ."
مەزڵوم عەبدی فەرمانڎەو گرڎیی هێزەکاو سوریای دیموکراتی جوابوو پرسیارەکا ئاژانسوو ئانهایش دێوە و ئەرەیاۋناش، کە محاڵا گېڵمێوە پەی دوانزە ساڵا چېوەڵتەری و جە ١٣ەمین ساڵەو شۆرشینە پێشئامای تازۍ ڕووەمڎا.
فەرمانڎەو گرڎیی هێزەکاو سوریای دیمۆکراتی باسش چانەیە کەرد، کە ملەملانێ و گرفتەکۍ بەینوو ئەنقەرەی و دیمەشقی زیاتەرا جە خاڵە هامبەشەکاشا و ئەرەیاۋناش کە ڕێککەوتەی هەردووەلای فرە محاڵا.
حەرپاسە عەبدی واتش: "ئێمە پەیلوایما پاسەن چارەسەری جە ڕاو دیمەشقیوە پێکمۍ. ئێمە گلېرۆبیەیما هەن، بەڵام دیمەشق مشۊم بە مامەڵە و هەڵسوکەوتوو ۋێشەرە بلۆوە."
عەبدی ئاماژەش پانەیچە کەرد، پا شەرتەی دەوڵەتو تورکی و گروپە چەتەکېش مەنتیقە ئەرەگیرکریایەکا جیابازا، متاوا چنیشا دیالۆگ بکەرا.
حەرپاسە مەزڵوم عەبدی واتش: "جە ماوەو ١٢ساڵی ۋییەرڎەینە جە ڕاو دیالۆگیوە هەوڵو ئێستەیۆ چارەسەریما چنی ڕژێموو سوریای دان. بە پەیلواو ئێمە دیالۆگ چنی ڕژێموو سوریای مکریۆ. پۊکاتی بەردەوامۍ بیمۍ جە پەیوەڼییەکاما. بەڵام هیچ ڕێککەوتەیۍ تا ئیساتۍ نییا. چونکی ڕژێموو سوریای هەڵای ئاماڎەو چارەسەری نییا. پەی گېڵایۆ پەی ئاژەو وەڵۍ ساڵەو ٢٠١١ ی شەرتەما هەنە."
فەرمانڎەو گرڎیی قەسەدەی ئەرەیاۋناش، ئەگەر١٣ەمین ساڵ بە مڎرامان ۋییەرۆنە، وەڵېکۊتەی قەوەتتەر ڕووە مڎۆ.
