کۆمیتەو ڕاوەبەری هەبەدەهەی ئەرەیاۋناش: "چینو کرێکارا تورکیای و کوردەسانی بە شوناسو ۋێشاوە جە مېڎانو تاریخینە بەرۍ گنا و ڕێبازو مڎرامانو ١٥-١٦و حوزەیرانی درێژە پنە مڎا و سیستەمو پڵۊسنەرا هۊرشێوناوە."
کۆمیتەو ڕاوەبەری جمېیەرو شۆڕشگێڵنی گەلا یۊگێرتەی (هەبەدەهە) بە ڕێزدارییوە یاڎو مڎرامانی گۊرەو کرێکاراش جە ١٥-١٦و حوزەیرانو ١٩٧٠ی کەرڎۆ و ئا یاڎەشە بە سەرهۊردای چینو کرێکارا جە مېڎانو تاریخی و وەڵابیەیۆ هۆشیاری چینایەتی پێناسە کەرڎ.
هەبەدەهە ئەرەیاۋناش؛ چا ماوەنە کە حکومەت هەوڵ دۍ دەس سەرو مافو سەندیکاو کرێکارارە گێرۆ، ۋێنیشاندای ۋەرفراوان جە ئەستەنبوڵ و ئیزمیرەنە سەرش هۊردا و کرێکارا بە مردنای هەرمانەو بەرهەمئاوردەی هێزو ۋێشا نیشانە دا، ئینەیچ دەسەڵاتش تەرسنا و مەجبوور بە پاشەکشەیش کەرڎ.
هەبەدەهە جەختش چانەی کەردەنۆ کە ئی مڎرامانە تەنیا پرسێوە سەندیکاو کرێکارا نییا، بەڵکم ئەوەکۊشایۍ چینایەتییا کە بەشێوە فرەو گلېرگەیش گێرتەنۆ. هەبەدەهە ڕۊشنش کەردۆ کە حەرچڼە مڎرامانو ١٥-١٦و حوزەیرانی بە ئامانجو دژایەتیکەردەی و ڕەڎکەردەیۆ مافو سەندیکاو کرێکارا بۍ، بەڵام داواکاری هامبەشو گەلا چېردەسەیش نیشانە دا و بی بە مەڵامەتو بەئاگا ئامایۆ گلېرگەی.
هەبەدەهە ئەرەیاۋناش پەی سەرکوتکەردەی ئی ئەوەکۊشایە، سەرمایە و دۊڵەت بە یاساو سەروازی، کودەتا و هرووژمی ئایدیۆلۆژی، ڕێکوستەیەکۍ چینو کرێکاراشا کەرڎ ئامانج، بەڵام مڎرامانو خەڵکی سەرەڕاو گرڎ زوڵم و چەوەسنایۆکا بەردەوام بۍ. مڎرامانو گەزی پېسە نموونێوە سەرش هۊردا.
جە سەردەمو دەسەڵاتداری ئاکەپەینە، فشارەکۍ سەرو کرێکارا بە شێوێوە بەردەوام زیاڎشا کەرد. مانگېرتەیەکۍ قەڎەغە کریۍ، مافو سەندیکاکا ڕەڎ کریاوە و جە یاگۍ هەرمانێنە کوشتەی پەرەش سانا. حکومەت جە دلېینەنە هرووژمش کەرڎ سەرو کرێکارا و گروپە ئۆپۆزسیۆنەکا و جە سیاسەتو جبەرینە هامکاری هێزە ئەرەگیر و ئیمپریالیستەکا کەرۍ. ئی فشارۍ تەنیا جە ئاکەپەنە سنووردارۍ نەبیۍ. جە نموونەو مڎرامانو کرێکارا شارەوانی ئیزمیرینە پەی نموونەی جەهەپە سیاسەتو دژ بە کرێکاراش جابەجێ کەرڎ. ئا ئاوەزیەتەو جەهەپەی کە جە ۋېیەردەنە هرووژم کەرۍ سەرو کرێکارا مانگېرتەی، ئارۊیچ بەردەواما. مەڵامەتو ئانەی کە ئاکەپە نمەتاوۆ بڕۍ هرووژمۍ ئەنجام بڎۆ، ئانەنە کە ئیساتۍ چینو کرێکارا بەڕێکوزیا تەر و هۆشیارتەرا مقارنە بە ۋېیەردەی.
هەبەدەهە جە دمادماینە بە ئاماژەدای بە ئەوەکۊشای شۆڕشگێڵنیی یۆگێرتەو چینو کرێکارا تورکیا و کوردەسانی ئەرەیاۋناش: "هێزو کرێکارا کە جە بەرهەمئاوردەیۆ سەرچەمەش گێرتەن، متاوۆ سیستەمو سەرمایەداری و سیاسەتو ئیمپریالیستی وڕنۊنە. چی چوارچێوەنە، هەبەدەهە داواش جە کرێکارا، گەلا چێردەسی، ژەنا و گرڎو بەشە وەڵېکۊتەکا کەرڎ کە ۋێشا بەڕێکوستەی بکەرا و داواش جە گرڎ لېوە کەرڎ پەی ئەوەکۊشایۍ یۊگێرتەی پەی ئایندێوە بە بێ چینایەتی، چەوەسنایۆ و ئازادی ئەوەکۊشایشا بەرز بکەراوە.
