جە دەم پارتیۆ ئەرەیاۋنێوە گرنگ

دەم پارتی ئەرەیاۋناش: "تەسەور مکریۆ جە ڕوانی ئایندەنە جە چوارچێوەو قەرارەکا کۆنگرەو پەکەکەینە گروپێوە جە هەرێمو کوردەسانیوە بڕې هەنگامې بنیا". دەم پارتی چی چوارچێوەنە جەمې ستوون‌ نوویسێش خوڵقەو چالاکیەکەی کەرڎې.

پارتو یەکسانی و دیموکراسی گەلا (دەم پارتی) دەربارەو ئا بەرنامەی کە تەسەور مکریۆ جە پانیشتوو کوردەسانینە جە چوارچێوەو پڕۆسەو "ئاشتی و گلېرگەو دیموکراتیک"ینە ئەنجام بڎریۆ ئی زانیاریێشە وەڵا کەردێوە: "پېسە مزاندې جە ڕوانې گرنگ و تاریخینە مژیومې کە "پرۆسەو ئاشتی و گلېرگەی دیموکراتیک' بە ماناو قۆناغێوە تازەی مې. چی چوارچێوەنە چەمەڕا مکریۆ گروپێوە جە ئەنداماو پەکەکەی بە پاو بڕیارەکا کۆنگرەی جە چالاکییەکەنە دلې خاکو هەرێمو کوردەسانینە هەنگامە بنیا.

پارتەکەما کە جە سەرەتاو پڕۆسەکەیۆ هەوڵمڎۆ دەورێوە بنیاڎنەر گێڵنۆنە، ژمارێوە کەم جە ستوون نوویسا (بە ١٥-٢٠ کەسا دیاری کریێنې) خوڵقەو ئی چالاکییە کریێنې. نوویسەرا خوڵقکریێچ چنی نوێنەرا ڕێکوزیاکا گلېرگەی مەدەنی و پارتە سیاسییەکا کە جە لایەنو پارتەکەیماوە ڕێکوزیان، ملانە هەرێمو کوردەسانی."

جە دمادماینە دەم پارتی ئاماژەش پانەی دا ئا ڕۆنامەنوویسې گەرەکشانە ڕووماڵو چالاکییەکەی بکەرا، مەشۆم نامې، زانیاری ئەرەمەرزیای، وێنەو کارتو ئەرەیاۋنای، ژمارە تەلەفۆن و ئیمەیڵیشا پەی دەم پارتی بکیانا و ماچۆیچ ئا زانیاریې چنی حکومەتو هەرێمو کوردەسانی پەی هۆرگێرتەی ئیجازەی هامبەشې مکریا. هەرپاسە ئانەیچش ئەرەیاۋنان کە وادەو لوایڕاوەو چالاکییەکەی و وردەکارییەکا ڕێکوستەیش دماتەر ئەرەیاۋېیۆ.