پێشنیوەڕۆی ئەمڕۆ، لە کتێبخانەی هۆڵی تەواری سلێمانی، وۆرکشۆپی ڕاگەیاندنی 'پلاتفۆرمی یەکێتی نەتەوەیی ژنی کورد لە باشووری کوردستان' دەستیپێکرد و هەر ئەمڕۆش پلاتفۆڕمەکە ڕادەگەیەندرێت.

بە گوێرەی کارنامەی وۆرکشۆپەکە، وتاری دەستپێک لەلایەن شەیدا مەعرووف دەخوێندرێتەوە، پاشان دیوان هەڵدەبژێردرێت و ڕاپۆرتی پلاتفۆرمەکە لەلایەن سارا ڕەزا دەخوێندرێتەوە. لە درێژەدا پێشنیار و ڕاسپاردەکان دەخوێندرێنەوە و لە کۆتاییشدا بە دەرئەنجامێک 'پلاتفۆرمی یەکێتی نەتەوەیی ژنی کورد لە باشووری کوردستان' ڕادەگەیەندرێت. پلاتفۆڕمەکە بە ئامادەبوونی ژنانی سیاسەتمەدار، چالاکوانانی بواری ژنان، هونەرمەندان، نووسەران و کەسانی سەربەخۆ درووست دەکرێت.

ئەم پلاتفۆڕمە کاردەکات بۆ یەکێتی و یەکڕیزی ژنان لە باشووری کوردستان، هاوکات هەنگاوێکە بۆ کار و چالاکییەکانی ژنان و کاری پێکەوەیی بە مەبەستی چارەسەرکردنی کێشەکانی ژنان و کێشە نەتەوەییەکان.