عومەر ئۆجالان، پەرلەمانتارو دەم پارتی ڕحای و برازاا ڕێبەر ئاپۆی، بە شێوې ئۆنلاین بەشداریش جە کۆنفرانسو ڕۆشنگەری شەنگالینە کەرڎ و پەیلوا و ڕوانگەو ڕابەر ئاپۆیش سەبارەت بە گلېرگەو ئێزدی و شەنگالی یاونا بە گەلو شەنگالی.

عومەر ئۆجالان ئەرەیاۋناش ئی کۆنفرانسەی کە شەنگالەنە ملۊڕاوە پەی گلېرگەو ئێزدی فرە گرنگا و واتش: "پەیامەکې سەرۆکی پەی گلېرگەو ئێزدی فرە گرنگێنې. ۋەردەمو گەلا ۋەرکۊتوو مېیامینینە تازەبیەیۆ و ئەوەفاڕیای هەن. کاتێ ملمې دوورگەو ئیمرالی پەی دیداری چنی سەرۆکی، ئی مژارې باسې مکریا. جە دماین گلېرۊبیەیمانە سەرۆک باسو گلېرگەو ئێزدیش کەرڎ. پەی گەلو شەنگالی، پەی ئێزدییەکا؛ ۋې ئاماڎەکەردەی پەی سەردەمێوە تازەی و شەنگالێوە تازەی پەنەوازا. ئەشۊ دلې گلێرگەو ئێزدینە بە گوێرەو ئێزدی بیەی یەکڕیزی و یۆبیەی بۆ."

ئەشۆ ئێزدییەکې بیەیې چالاکانەشا بۆ

عۆمەر ئۆجالان ئانەیچش وات کە ڕابەر ئاپۆ جە گلېرۊبیەکا ئی دماییەینە هۊرسەنگنای تازەش سەرو بیەو گەلی ئێزدی کەرڎ و واتش: "پەی پێکئاماو ئێزدی، رێبازێوە ڕەسەنایەتی جوابدەر نییا، ئەشۆ بیەیې چالاکشا بۆ، ڕابەرایەتی ماچۆ؛ "ئەشۆ شەنگال سەربەخۆ بۆ، ئەشۆ ۋێش پارێزنۆ." هەرپاسە گەلو کوردی جە ۋەرا ۋەرو پارێزنای گلېرگەو ئێزدینە ۋەرپەرسا."

چنی مڎرامانی، پەنەواز بە تازە بیەیچۆ مکەرۆ

جە دمادمایی قسەکاشەنە عومەر ئۆجالان سەرنجش وست سەرو ئاژەو جەنگی جە ۋەرکۊتوو مېیامینینە و واتش: "کورڎەسان پېسە شەپۆلێوە سووری چامنەن، نمەبۆ غەفلەتەنە بۆ، وەڵې کارەساتو فەرمانەو ساڵۊو ٢٠١٤ ینە سەرۆک ئاپۆ فرەو هێزەکاش جە ئەگەرو هەر ڕووەدایێوە ئاگاڎار کەردێوە، سەرۆک چا بارۆ دوور وینایێوە بە هێزش هەن. پەی خۆسەری شەنگالی و پارېزنای گەلو ئێزدی، تازەبیەیۆ پەنەوازا. هەرپاسە پەنەوازا ئی کۆنفرانسە بۆ بە جوابێوە پەی ئایندەی. دماو بەشداریکەردەی عومەر ئۆجالانی، کۆنفرانسەکە بە ئەرەنیشتەی "جە تاریکی قڕکەردەیۆ بەرەو بیەو ڕۊشنایی" بەردەوام بې.

هۊرسەنگنایە بنەرەتیەکې کە چی ڕۆژەڤەنە ڕۊشنې بیێوە ئینێنې؛

"گەلو ئێزدیی ئا گەلەی کە گرڎ کولتوور، بیروباوەڕ و ڕەسەنایەتی خاکو میزۆپۆتامیاى سەرینی جە ۋێشا گێرا و تەنانەت ئارۊیچ جە گرڎ کولتوور و باوەڕێوە ئی وڵاتەینە ئی کاریگەریی و ڕۆحە بە شێوێوە زیڼە موینمې. پۊکەی ڕابەر ئاپۆ ماچۆ: "ڕێنسانس یان گەشەکەردەی گلېرگەو ئێزدییەکا جە گرڎو ۋەرکۊتوو مېیامینینە وەڵا بۆوە."

فۆلکلۆرو گەلو ئێزدی کتێبو با و باپیرانیشانە کە بەردەوام کریانۆ؛ ئینە نەک بە نویسیای، بەڵکم بە ویژدان ۋنریۆوە. بە شێوەی زارەکی دەم بە دەم فاڕیۆوە، جە عیلاقەی پەنهانو بەینو نەوە و باباینە، جە بەینو قسەکەردەی و بێدەنگینە، جە نەوەکاوە پەی نەوەکا ئایندەی فاڕیۆوە. سەبارەت بە مۆسیقاو ئێزدی، ئا بەرەنە کە قەت جە مابەینو زەمینی و ئاسمانیرە نمەوزیۆرە. ئینە ئامێرو شاڎیی نییا، بەڵکم مەراسیمێوە ڕۆحییا، گەشتێوەن جە جبەرو کاتی و شۊنەماینە.

جە مۆسیقاو ئێزدینە ڕۆح چڕیۆ نەک ئاواز

سەڎاو خدر فەقیری دیارا، پېسە گۆرانیێوە پەی دەگا جە یاڎ نەکریاکا ماچۆ و سەڎاش مکەرۆ زەمینێوە کە حەسرەت چنەشەنە گەشە مکەرۆ. سەڎاو سوسکا سمۆیې بەرز بۆوە، گەرمی کەشی تێکەڵ بە بانگەوازو ژەنا جە غەریبینە مکەرۆ و گۆرانییەکێش سروودێوە ئایینییەنە کە نمەوچیۆ بەڵکم وچیۆوە. دلې دێڕەکانە قەڵەمو فێرکێ یوسفی، ئا هۆنیەرەی کە تراژیدیاش فاڕا پەی ئەدەبی و مەردەیش پەی ڕازێوە نەمری فاڕا، چا ڕێوە یادەوەری ئێزدییەکا منویسۆوە. چی مۊسیقانە ڕۆح چڕیۆ نەک ئاواز و ڕازەکې هۆشیارې باوە نەک ئاواز."

هەرپاسە نوویسەرە و توێژەرە فاتمە ئیزۆلە بە شێوێوە ئۆنلاین بەشداری ئەرەنیشتەکەیش کەرڎ.

ڕۆو یووەمو کۆنفرانسەکەی دمایش ئاما.

سەبای جە دووەم ڕۊو کۆنفرانسەکەینە ئی مژارې باس مکریا؛

ڕۆشنکەردەیۆ حەقەتینو ژەنې پېسە جەوهەری و بەرهەمو گلېرگەی جە ڕاو ژنولۆژییوە

حەقەتینو وڵاتپارێزنی و ئیکۆلۆژی جە بەینو تاڵانی و قڕکەردەینە

ئاوەزیەتو کۆمکوژی، حەقەتینو قڕکەردەی فیزیکی و کولتووری

پارېزنای ڕۆحی و کولتوورو مڎرامانی جە گلېرگەو ئێزدینە

ۋەنای زانستو کۆمەڵایەتی جە سەردەمو ڕێنیسانسو ئێزدینە

ڕێنێسانسو جوانی و جوانیەتی

بانگەوازو ئاشتی و گلېرگەی دیموکراتیکی / هەڵمەتۊو ئازادی پەی ڕابەر ئاپۆی، ۋێڕاوەبەری پەی شەنگالی.