شاندو ئیمراڵی چنی سەرۆکو جەهەپەی گلېربیۆ، سەرنجشا وست سەرو گرنگی گلېرۆبیەو ڕۆو جومعەو کۆمیسیۆنی و واتشا: "بەتایبەت پەی بەکۆمەڵایەتیبیەیۆ ئاشتی، گەرەنتی یاسایی و میکانیزمە دیموکراتیکەکې فرە گرنگێنې".
ئەنداماو شاندو ئیمراڵیی دەم پارتی، پەروین بوڵدانە و میدحەت سانجار و پارێزنەرو ڕابەر ئاپۆی، فایەق ئۆزگور ئەرۆڵ سەرشا ۋنەو مېیانو گرڎیی جەهەپەی دا و چنی سەرۆکو گرڎییی جەهەپەی ئۆزگور ئۆزەلی گلېرې بیێوە.
دماتەر پەروین بوڵدانە و میدحەت سانجار کۆنگرێوە ڕۆنامەوانیشا بینا.
پەروین بوڵدانە: ئۆزەل پاڵپەشتیێوە بەقیمەت مکەرۆ
پەروین بوڵدانە ئەرەیاۋناش، چێگە بەدماوە، ئۆزەل پاڵپەشتیێوە بەقیمەتو پرۆسەکەی مکەرۆ و واتش: "چنی ئېژا ئۆزەلی، مژارەکې پرۆسەو ئاشتی و قۆناغەکې دماو مەراسیمو چەک دلېنەبەردەی، ئا کۆمیسیۆنەی پەرلەمانەنە پێکمې، چەمەڕاییەکا چی کۆمیسیۆنەیە و ڕێککەوتەیەکې پەی لوایڕاوەو پرۆسەو ئاشتییما، بەشێوێوە ۋەرفراوانتەر تاوتوێ کەرڎ".
گلېرۆبیەکەو کۆمیسیۆنی گرنگا
پەروین بوڵدانە ئەرەیاۋناش ئینە "گلېرۊبیەیێوە گرنگا"، واتش: "چونکی سەبای ئېژا نوعمان کورتولموش چنی سەرۆک فراکسیۆنو گرڎو پارتەکا گلېربۆوە".
پەروین بوڵدانە ئەرەیاۋناش ئی گلېرۆبیەیە گرنگا، چونکی هەر پارتێوە پەیلوا و پێشنیار و چەمەڕایی جیاوازش هەن پەی کۆمیسیۆنەکەی، واتش: "ئېژا ئۆزەل جە سەرەتاوە پاڵپەشتی گرنگ جە مەسەلې ئاشتی مکەرۆ و سەرنجما وست سەرو گرنگی ئی پاڵپەشتیە. ئێمە زاناما کە ئېژا ئۆزەل چێگە بەدماوە پاڵپەشتی زیاتەرو پرۆسەو ئاشتی مکەرۆ و بەردەوام بۆ. سوپاسو ئېژا ئۆزەلی مکەرمې پەی پێشوازیی چنە کەردەیما. گلېرۆبیەو سەبای دەربارەو کۆمیسیۆنی فرە گرنگا. گرڎما چەمەڕې ئەنجامو گلېرۆبیەکەینمې".
سانجار: پەرلەمان دەورێوە گرنگش بۆ
میدحەت سانجار ئەرەیاۋناش بێگومان دەورو پەرلەمانی چی قۆناغەنە فرە گرنگا، پەرلەمان متاوۆ دەورێوە گرنگ گێڵنۆ پەی هێقمکەردەی پرۆسەو چارەسەری، ئەشۆ گرڎو دەرفەتەکا وزیانە گەڕ تاوەکو پرۆسەکە بەکۆمەڵایەتی بۆوە و ئاشتی گرڎو گلېرگەی گێرۆ ۋێش.
ئەشۆ ئاشتی بە کۆمەڵایەتی بۆوە
سانجار واتش: "پەی ئانەی ئاشتی بې دی، ئەشۆ بەکۆمەڵایەتی بۆوە. پەی ئینەیچ گەرەنتی یاسایی و میکانیزمە دیموکراتیکەکې فرە گرنگێنې. جە ڕاو بەکۆمەڵایەتیبیەیۆ، ئاشتی مې دی. گرنگتەرین ئامرازو بەکۆمەڵایەتیبیەیۆیچ، گەرەنتی یاسایی و میکانیزمە دیموکراتیکەکێنې. بێگومان گرڎ پارتێوە سیاسی و ئەکتەرێوە کۆمەڵایەتی چەمەڕایش چی پرۆسەیە هەن، ئەشۆ هەریۆشا پەیلوای جیاوازشا سەرو پرۆسەکەی بۆ. پەی چارەسەری ئا پرسەی کە ٥٠ ساڵێن ئێش و ئەزیەتش چنە کۆتەنۆ، ۋەرپرسیاری گرڎیمانە هەوڵې ئاوارتە بڎەیمې. جابەجا کەرڎەو ئی ۋەرپرسیاریە بە دیالۆگ چنی هێزەکاو گلېرگەی و گرڎو ئەکتەرە کۆمەڵایەتییەکا بۆ".
سانجار سەرنجش وست سەرو گلێرۊبیەکەو سەبای کۆمیسیۆنەکەی، واتش: "بەگوێرەو دەرەنجامەکا گلېرۊبیەکەی، کات و هەلومەرجو هەرمانەو کۆمیسیۆنەکەی دیاری مکریۆ. هەوڵەکاما پەی بنیاڎنیاو ئاشتی و دادپەروەری و یۆبیەی کۆمەڵایەتی بەردەوام مکەرمې. پی جۆرە پێوەرە متاومې سەرې گنمې".
