ڕابەر ئاپۆ کە بە بانگەوازەکەیش بیەن بە ڕانیشاندەرو ڕێنێسانسو ئێزدییەکا، پەیامێوە تایبەتش پەی کۆنفرانسو ڕۆشنۋیریی شەنگالی کیاست. پەیامەکەو ڕابەر ئاپۆی پەی کۆنفرانسەکەی، پی جۆرەنە:

"وەڵې گرڎ چێوێنە، بە نامې هەمڕایامۆ چێ، سڵامتا ۋنە مکەرمې و هیواو سەرکۊتەی پەی هەرمانەکاتا موازمې.

تاریخ تەنیا گێڵنایۆ ۋېیەردەی نییا؛ ئێش و مڎرامان و حەقیقەتیچ جە هەناوو ۋێشەنە هۊرگێرۆ. گەلو ئێزدی، کۊڵەکێوە قەڎیمی و شکۆدارو ئی حەقیقەتەینە. ئێزدییەکې کە خاوەن باوەڕێوە هەرە قەڎیمی میزۆپۆتامیاینې، هەزاران ساڵېن جە ۋەرا ۋەرو فشار و ئاوارەکەردەی زۆرەملێ و پەشتگۆش وستەینە، بیەو ۋێشا پارێزنان.

ئێزدێتی، جە باوەڕ و نەریتێوە واوەیتەرا. ژیۋای ئاشتییانە چنی سرووشت و پیرۆز ڕاگێرتەی ژیۋگەی بەبنەما گێرۆ. هەر پۊکەی، سیستەمە زۆردارەکې هەمیشە ئێزدییەکێشا پېسە مەترسیێوە پەی سەرو ۋێشا دیەن. ئێزدییەکې، ئاسەوارو ژیۋای ئازاد و یەکسانشا تا بە ئارۆ ئارڎەن.

ئا دەمەی ڕووبەڕوو ستەمی گۊرەی بیێوە، ئێزدییەکې پاشەکشەشا نەکەرد؛ پەناشا بەرڎ ۋەرو کەشەکا کورڎەسانی، پېوەس بە تاریخو ۋێشا و باوەڕی ئازادییوە. هەوڵدریا باوەڕ و زوانەکەشا قەڎەغە بکریۆ، بەڵام ئاڎې کەلتوورو ۋێشا پارېزنا. وەختێ هەوڵو دلېنەبەردەیشا دریا، سەرجەنۆ جە بوڵەو ۋێشاوە جە ئەڎې بیێوە.

ژەنې ئێزدیې سەرمەشقې سەرەکیی ئی ئەوەکۊشاینې. بیې مەرامو ئی هرووژما، وەلێ حەجگیز سەرەشا نەنامنارە. بە مڎرامانشا جە شەنگالەنە، سەرجەنۆ هیواو ژیۋایې شکۆداریشا پەی ۋێشا و گرڎو گەلا وست سەرو پەیا.

ئەوەکۊشای ئارۆو ئێزدییەکا، پەی گرڎیما ڕانیشاندەرا. دەنگو ئاڎیشا، دەنگو گرڎ ئازادیوازێوەن. پۊکەی، پارېزناو گەلو ئێزدی سەرو بنەماو پارېزنای جەوهەری، خاوەندارین جە ویژدانو مرۆڤایەتی.

مافی سرووشتی ئێزدییەکان کە سیستەمێوە پەی ۋێشا بنیاڎ بنیا، تا بتاوا بە ئازادی، بە ئشناسنامە و باوەڕی ۋێشاوە بژیۋا. دۊڵەتە زۆردارەکې و زیهنیەتە نەتەوەپەرسەکې، دڎان پی مافەیرە نمەنیا. ئینە، سەرو بنەماو یەکسانی، واڵە و برایەتیی گەلا، بە سیستەمێوە کە بتاوا ۋێشا ڕاوەبەر بکەرا، ڕاش مشۊنە.

پەنەوازا گرڎ لایې بزانا، گەلو ئێزدی تەنیا نییا. سەرەڕاو ئێشو ٧٣ فەرمانەکەی، بە مڎرامان ۋێشا یاونا بە ئارۊی. بە پرۆسەو ئاشتی و گلېرگەی دیموکراتیک کە ئێمە وەڵێش وزمې، ئیتر فەرمان سەرو ئاڎیشارە نمې. ئیتر فەرمان دمایش ئاما. بیەو ئاڎیشا، پەی گرڎ کەسې کە حەزش بە ئاشتی و واڵە و برایەتییا چی جوگرافیانە، مەسەلې شەرەف و شکۆن".

بەشدارا کۆنفرانسەکەی بە جۆشو خرۆشێوە گۆرۆ پێشوازیشا جە پەیامەکەو ڕابەر ئاپۆی کەرڎ.