وەڵۍ گلېرۊبیەو ١ و ئایاری، ڕۊو یۊبیەی و ئەوەکۊشای و پەشتیوانی جە مېڎانوو ڕیتمو کادیکۆو ئیستەنبوڵی، جەماوەر جە دوۍ نوقتێوە کوۍ بیێوە و چەمەڕاو کاتو دەسپنەکەردەو ڕاپیماکەی مکەرا.
گلېرۊبیەکەی بە درووشمۊو "پەی هەرمانۍ و ئاشتی و دیموکراسی و دادپەروەری، ئێمە سەرۍ گنمۍ" بە سەرمەشقایەتی سەندیکاکاو کرێکارا شۆڕشگێڵنی (DÎSK) و کۆنفیدراسیۆنو سەندیکاکا جەماوەری (KESK) و یۊبیەو ژوورو مۊهەندیسا بیناسازی تورکی (TMMOB) و یۊبیەی دکتۊرا تورکیای (TTB) ملۊڕاوە.
ئا گرووپۍ بەشداری گلېرۊبیەکەی مکەرا، جە دوۍ خاڵێوە: وێستگەو قیتارو سوغوتلوچەشمەی و ۋەردەمو خەسەخانەو نومونی حەیدەرپاشای کوۍ بیێوە.
دەم پارتی و (KESK) و هەدەپە و تەژەئا و ڕێکوزیاکا ژەنا و جوانا جە سوغوتلوچەشمە کوۍ بیێوە، جەماوەر لافیتێشا بە زۋانی کوردی و تورکی هۊرگێرتۍ.
جەهەپە و ئەمەپە و (DÎSK) و (TMMOB) و (TTB) ۋەردەمو خەسەخانەو نموونەی حەیدەرپاشاینە کوۍ بیێوە.
چەمەڕا مکریۆ، جەماوەر جە هەردووە قۆڵەکەوە سەعات ١١ بەشێوەو کارەوانی بیاوا مېڎانوو ڕیتمی. جەختکریاوە کە جە گلېرۊبیەکەنە، سەندیکا و پارتە سیاسییەکۍ و ڕێکوزیاکا ژەنا و جوانا بە دەنگێوە هامبەش داواو "هەرمانۍ و دادپەروەری و ئاشتی و دیموکراسی" مکەرا. مېڎانوو گلېرۊبیەکەی تا مۍ پەڕتەر بۆ.
