ماوەیەن هونەرمەند و گۆرانی واچو دیارو هەورامانی مامۆسا جەلال هەرسینی ناوەشەن و تەندروستیش باش نییەن و پەی ماوایەیچ جە بیمارستان بەستەری کریابێ. بە نونگە و نەوەشییەکەیش ڕۆو پەنج شەممەی (1400/11/28) جە شارو سنەی پیسەو ئەرکی تاقمەی جە چالاکا و پەیجۆرکاراو فەرهەنگیی و کۆمەڵایەتیی هەورامانی سەردانەیشا چی مامۆستا و هۆونەرمەندە نامدارەیە کەرد و نزیکوە جە حاڵ و بارودۆخوویشا پەرساشا و وەشحاڵی وێشا بە باشتەربیەو حاڵیش نیشانەدا۰
چی چەم پنەکەوتەیەنه دکتۆر مۆکەڕەم غەفاری قسێش کەرد و  دیدار و سەردای جە هونەرمەندا و کەسایەتیەکاو هەورامانیش بە ئەرکەی گەورەی زانا و واتش: مشیۆ ئی هەنگامێ با بە هەرمانێوە بەردەوامە تا ئێمە بتاومێ قەدر و ئەرزشو کەسایەتیەکا فرەتەر وەرچەم گێرمێ. هەرپاسە
وەشحاڵیش بە خاستەربیەو مامۆسا جەلالی نیشاندا و ئاشکراش کەرد:  پەی تەقدیر جە کاک جەلالی جە بەرنامەنە هەن مەراسمیە عال جە دەگاو هەرسینێنە بلو ڕاوە۰ 
مامۆستا بورهان رەوڵ ئابادی جە سەردایەکەنە قسێش کەردێ و وەشحاڵی وێش جە دیدار چەنی هونەرمەنداو و کەسایەتیەکاو هەورامانی بەتایبەت کاک جەلالی  هەرسینی بەروست و هونەرمەندە گەورەکاش پیسەو کاک جەلالی بەکۆڵەکێو شاسنامەو هەورامانی جە قەڵەم دێ و واتش:  بێشک کەسە گەورەکا بە ئازار و ناوەشی تاقی کریاوە وئومێدوارەنا هەرپاسە کە کاک جەلال جەگرد ژیوایشەنە ڕووچەرمە بییەن چی تاقیکاری ناوەشیچەنە هەر ڕووچەرمە بۆنە و دووبارە جە دلێ مەراسمەکانە وینمێشوە۰
دکتۆر ڕەحیم غۆڵام وەیسی سەرو کەسایەتی کاک جەلالی قسێش کەردێ و ئاڎش بەکەسایەتیەی مەردمی دا قەڵەم واتش: مشیۆ حەز و ئارەزوو هونەرمەندا فرەتەر وەرچەم بگێریۆنە، کەبەداخەوە چی کومەڵگانە کەمتەرخەمی مکریۆ۰
هەرپاسە نائب مێنبەری شێعرەیش وەنەوە و کەسایەتی مامۆسا جەلالیش بەرز و مەردمی ئەشناسنا۰ وەلی کاکایی سەرو شۆناسو کەسی هەورامیوە قسێش کەردێ و واتش: بێشک گۆرانیێ و سیاچەمانەکاو مامۆسایاو هەورامانی بەتایبەت کاک جەلالی بەشێنێ جە شناسنامەو ئێمە و مشیۆ قەدر چی کەسە گەورانە بگیریۆ۰
هاشم حێسامی سەرو ئەرزشو تەقدیری جە کەسایەتیەکا قسێش کەردێ واتش: تەقدیر جە گەورەکا هەرمانیە فرە بەیاگێن و نیازەن چی باوەتەوە ئەنجومەنەی هورامی پەی تەقدیر جە کەسایەتیەکا مەرزنمێرە۰

دادا گیسیا، هۆنەرمەندەی نامدارەو هورامانی جە سەردایەکەنە وەشحاڵی وێش بەدیدار چەنی ماموساجەلالی نیشانە و وازیاری وێش پەی زووتەر خاس بیەیۆ کاک جەلالی بەروست تا دیسان سیاچەمانە و گۆرانیەو هورامانی ئاوەدانیش بگنۆنەوە و واتیچش: ئی دیدارێ بێشک پەی لاو کەسایەتیەکاو هەورامانی درێژەشا بۆنە.

مامۆسا جەلال هەرسینی وەشحاڵی وێش جەقووڵایی دڵیوە نیشان دا و سپاسوو ئامەو ئی تاقمەیشە کەرد و فەرماواش: بە ئامەیتا ژان و ئازارێم سارێژ بیێوە۰

چی دیدارەنە تاقمەو چالاکاو فەرهەنگی وکومەڵایەتی هەورامانی جە شاروو سنەی، دەسەو ڕاوەبەراو  گئەرەمەرزیاو مامۆستابێسارانی سنەی به پیشنیارو کاک موکەڕەم غەفاری بەشداریشا کەرد.

ئازیزانیە که  چی دیدارەنە بەشدارێ بێنێ۰ بەرێزان ۰۰
دکتورمۆکەڕەم غەفاری حاجی بۆرهان ڕەسووڵ ئابادی ـ حاجی حەسەن مۆرادی ـدکتور ڕەحیم غۆڵاموەیسی ـ وەلی کاکایی ـحەبیبەڵڵا  عەلیڕەمایی ـ سەید هاشم حێسامی ـ نایب مێنبەری ـ عەتا مەحموودی ـحسێن باسامی ـ نەوشیروان بەلالی  و خاتوو گیسیا هورامی.

وەلی کاکایی
سەرچەمە: تەلەگرامو یانەو مامۆسا بێسارانی