هاموتەواچەو دەسەو ڕاوەبەرایەتییەکا دلێینەو دیموکراتیکەکا پارتو دیموکراسی و یەکسانی گەلا (دەم پارتی) جانان کەپەنچە پەی ئاژانسیما قسێش کەردۍ و ئاماژەش پانەیەدا کە شارەوانییەکێ پەی ژەنا هەرمانەی خاسە مکەرا و جەختشکەردۆ چانەیە بە هەڵمەتۆو 'دماین قسێما مەنێنە، تنوتیژییەکا مدرنمێنە' گەرەکمانە شارەکا بکەرمێ بە شارو ئازادیی ژەنا.

جە سەرەتاو قسەکاشەنە کەپەنچە دەسنیشانشکەرد سیستەمو هامسەرۆکایەتی جەوهەرو پارادایمو ئازادیوازی ژەنان پۆکەی گرد کاتێ بییەن بە یاگێ هجومەکا و واتش: "خەڵکو ئێلحی جە هۆرچنیە دلێینەییەکا ٣١و ئادارینە جوابێوە کاریگەرو ئا هجوماشا داوە و گولستان سۆنوکە هامسەرۆکەو شارەوانی بە ڕێژەو دەنگێ فرەی جە هورچنیەکانە سەرکەوتە."

'سیستەمو هامسەرۆکایەتی پێسەو هەڕەشێوە موینا'

جە بەردەوامینە کەپەنچە ئاماژەش پانەیەدا ئەرەکۆشای سەرەمڕەو ژەنا یۆن جە کۊڵەکەکا ئازادی گلێرگەی و سیستەمو هامسەرۆکایەتی پراکتیزەو ئا ئەرەکۆشاینە و ئینەش وات: "بناغەو هجومەکا دەسەڵاتداری تەرسینە جە سیستەمو هامسەرۆکایەتی و بە هەڕەشێوە سەرو وێش موینۆ. چونکی سیستەمو هامسەرۆکایەتی بنەماو ئازادی گلێرگەی و ماڕای دەسەڵاتپارێزی پیاین."

'شارێوە بنیاڎ بنیەیمێ کە ژەنی چنەشەنە ئازادێ با'

جە دما دماینە کەپەنچە دەس نیشانش کەرد بە ئەرەمەزنایرەو ئەرەمەزنای فەرمانگەو ژەنا جە گرد یاگێنە هەوڵا پەی ڕاگێرتەی جە تنوتیژییەکا و بە هەڵمەتەو 'دماین قسێما مەنێنە، تنوتیژییەکا مدرنمێنە' ئینێ ئەرەکۆشاینە و واتش: "گەرەکمانە دەرفەتێ ڕەخسنمێ کە ژەنی بتاوا بە ئاسانی بیاوا بە میکانیزمەکا ئەرەکۆشای جە دژو تنوتیژییەکا سەریشا و چی ڕێوە ڕا جە تنوتیژییەکا گێرمێنە. جە ئەنجامەنە گەرەکمانە شارێوە پاسە بونیاڎبنیەیمێ کە ژەنی دلێشەنە ئازادێ با."