دەقو ئەرەیاۋناکەی ئینەن:

"پەی ڕای گرڎیی جەهانی:

چنی ئەرەیاۋنای ئاېێربەسی جە جەنگو ١٢ ڕوەو ئێران ئیسرائیلی، شەپۆلێوە تازې سەرکوتکەردەی باڵبەسکەردەی، جە قەنارەدای جە کوردەسان و سەرانسەرو ئێرانینە جە لایەنو ڕێژیمو کۆمارو ئیسلامیوە دەسش پنە کەرڎەن. مېیانە ئەمنیەکێچ بە هۊربەستەی تۆمەتی ناڕەوای پەی زینانیا سیاسی و هەرپاسە لوایۆ پۊرەی بە یاساو سیخوڕی جە پەڕلمان و دەزگای قەزایی ڕێژێمینە ئاژێوە مەترسیڎارشا پەی زینانیا سیاسی  ڕەخنەگرا حکوومەتی وەشکەردەن. گوزارشتەکېچ بەرش وزا کە هەتا ئیساتې  ژمارەو باڵبەسکریایا هەزار کەسێش ۋېیەرنان و جە قەنارەدای زینانییا سیاسی بەردەواما و ئینا بەرزبیەیۆینە. هەر چن ڕوې چێوەڵی ئیدریس ئاڵی، ئازاد شوجاعی و ڕەسووڵ ئەحمەد، یەرې کۆڵبەرې کوردې تۆمەتی بې بنەماو  هامکاریی ئیسڕائیلیشا دریا پاڵو دریې قەنارە و جە ئیسەیچەنە گیانو چن  زینانیې تەرو کوردی کە خەڵکو بۆکانینې یەرې ساڵې چێوەڵی جە جمېیەرو ژەنی، ژیۋای، ئازادینە باڵبەسې کریې و حوکمو قەنارەیشا سەرەرە سەپیان، ئینې مەترسینە.

کۆمارو ئیسلامیی ئێرانی جە ماوەو دەسەڵاتداریی ۋێشەنە هەروەخت جبەرۆ پۆ جەنگێوە یان پرسێوە مېیاندۊڵەتیۆ شکسش واردەبۆ، حەقەش جە جمېیەری مافوازو خەڵکی دلېینەو وڵاتی کەردەنۆ و ئیساتێچ گەرەکشا حەقەو شکسەکاش جە جەنگو ئیسرائیلینە جە گلېرگەی مەدەنی، جمېیەری مافوازو گەلا ئێرانی و زینانییا بکەرۊوە. بێگومان بێو کۆمارو ئیسلامی فام بە فشار و کارئەوەدایە بەهێزەکا دلېینەیی و جبەری نەکەرۆ، دوور نیە کارەساتو کۆمکوژیی زینانییا سیاسی جە زینانەکا ئێرانینە واوەی بۆوە، پېسە چنی ساڵۊو ١٣٦٧و ۋەرەتاوی دماو ملدای ڕژێمی پەی ئایېربەسی چنی عێڕاقی دماو هەشت ساڵا جەنگی بێ‌ ئاکامی چنی ئا وڵاتەیە هەزاران زینانیې سیاسیێش جە دلېینەو وڵاتینە کوشتې.

ئێمە سەرەڕاو ئەوجەو نیگەرانیی ۋێما چا مەترسییا کە هەڕەشې جە کارەکتەرا سیاسی و مەدەنی و بەتایبەت جە گیانو زینانییا سیاسی مکەرا، داوا جە:

– خاتوو مای ساتووې، ڕێپۆرتێرەی تایبەتیی ڕێکوزیاو نەتەوە یۆگێرتەکا پەی مافو مرۆڤی جە ئێرانەنە

– مېیانە مېیاننەتەوەییەکې کە داکۆکی جە مافو مرۆڤی

– گرڎو خەڵکی ئازادیوازو جەهانی

مکەرمې بە هەر جۊرې کە متاوا دژو ئی سیاسەتە نامرۆڤانەیە دەنگ هۊربڕا و ڕا نەڎا کۆمارو ئیسلامی پی جۊرە بێ‌ پەروا گنۆ گیانو کۊششکارانێوە کە حیچ تاوانێوەشا جگە جە مافی، ئازادیوازی و کۊششی پەی عالتەرکەردەی ئاژەو ژیۋایشا و مافە سیاسی، مەدەنی و نەتەوایەتییەکاشا نەبیەن.

داوا جە پارت و ڕێکوزیا سیاسییە ئێرانییەکا، ڕێکوزیاکا، ئازادیوازا ئێرانی و کوردا جبەرو وڵاتی مکەرمې کە بە کۆدەنگی و گلېرۊبیەکا ۋێشا دەنگو ناڕەزایی و بێزاریی ۋێشا ۋەرا ۋەر پا سیاسەتە سەرکوتکەرانەیە بەرز بکەراوە. بێگومان فامو هامسۆزی و پەشتیوانی جە زینانیا سیاسی دلې مەردمو ئێرانینە فرە بەهێزا و ئا نارەزاییە جەهانییە ڕا وەشکەر بۆ پەی جمای سەرانسەری و کوردەسانی جە ئایندەنە و گوڕوتین‌ بەخشایۆ بە جمېیەرە ناڕەزاییەکا جە وڵاتەنە.

پارتو ژیۋای ئازادی کوردەسانی-پەژاک

پارتو ئازادیی کوردەسانی – پاک

حیزبو دێموکراتو کوردەسانی- ئێران

جەمەو شۆڕشگێڵنی زەحمەتکێشاو کوردەسانی- ئێران

سازمانو کۆششو کوردەسانی- ئێران

جەمەو زەحمەتکێشانو کوردەسانی

جەمە- رێکوزیاو کوردەسانی حیزبو کۆمۆنیستو ئێرانی.

١٨و پوشپەرو ١٤٠٤ ۋەرەتاوی ۋەرا ۋەر بە ٩و تەمووزو ٢٠٢٥ میلادی