جە ناوچەو خەباتی کە گنۊ بەینو ئاکرێ و دهۊکی جە هېزیۆن جەنگېوی سەخت جە ما بەینو هېزەکاو پەدەکەی و هۆزو هەرکینە ئینا ئارانە. جە ئاکامو پشێویەکانە چڼین ترۊمبێلې سەروازیې هېزەکاو پەدەکەی دلېنەبریێنې، هەرپاسە ئەندامېوە هېزەکاو زێرەڤانی کوشییان. وە چڼین کەسې جە هېزەکاو پەدەکەی جە لایەنو ئەنداماو هۆزو هەرکییوە باڵبەسې کریێنې. لاو وېشۆ مەسرور بارزانی سەرۆکوەزیرانو حکومەتو هەرېمو کورڎەسانی داواو مردنای پشێویەکاش کەرد. هەرپاسە فەرماندە ئەدهەم هەرکی، جە هۆزو هەرکی نیگەرانی وېش جە بارەو پشێویەکاوە بەربڕی و داواو مردنای جەنگەکەیش کەرد. بەگۋېرەو ئا دیمەنا جە دیجیتاڵ میدیانە وەڵا کریێنێوە، شەوې دێرې تاکو سەرسەعب جەنگەکە بەردەوام بېیەن، جە جەنگەکەنە سەرەڕاو دلېنەبەردەی چڼین ترۊمبێلا سەروازی هېزەکاو پەدەکەی، جە لایەنو ئەنداماو هۆزو هەرکییوە چڼین چەکې قورس و سوکې بەکاربریێنې.