هامسەرۆکو گرڏی پارتو هەرێمە دیموکراتیکەکا (دەبەپە) ی کەسکین بایندەر سەبارەت بە بانگەوازەکەو ڕابەر ئاپۆی پەی ئاژانسو هەواڵو فوراتی (ANF) هورسەنگنایش کەرد.

بایندەر ئاماژەش پانەی دا ڕابەر ئاپۆ ئیرادێوە بە هێزش نیشان دان و واتش: "دما و بانگەواز و 'ئاشتی و گلێرگە و دیموکراتیک'و ئێژا ئۆجالانی کە جە ٢٧و شوباتی کەردش، ئارۆیش بە هەمان ئیرادە و هیوا جە ڕا و بنیادنیا و گلێرگە و دیموکراتیکت و ئاشتیینە جارێوە تەر ئیرادێوە بە هێزش نیشانە دا.

یۆ جە بنەماکا بانگەوازەکەو ئێژا ئۆجالانی ئانەن کە جەختش چانەیە کەردەنۆ کە سیاسەت دان بە بۆشاییرە مەنیۆ. ئی بۆشاییە تاوۆنە بە تێگەی سیاسەتو دیموکراتیکی پەڕ کریۆوە. پەی ئانەی پڕۆسەو ئاشتی سەرگنۆ مشۆم سیاسەتو دیموکراتیکی مەزیۆرە."

'هەوڵدای پەی ئاشتی بە فرەلایەنی کریۆ'

جە بەردەوامی قسەکاشەنە کەسکین بایندەر ئاماژەش پانەی دا هەرمان کەردەی پەی ئاشتی تەنیا ئەرکی لایەنێ نییا و مشۆم فرەلایەن بۆنە و واتش: "وەرپرسیارێتی گرڏ و چین و توێژەکا گلێرگەین. ئارۆ وەردەمو  ئی ئیرادە چارەسەرییە مشۆم گرڏ و ئۆپۆزسیۆنە سیاسییەکێ و گلێرگە وەرپرسیارێتی وێشا جابەجێ بکەرا و ئینەیش پێسەو ئەرکێوە تاریخی وینمێ."

'مەبۆنە دەسەڵاتو سیاسی بە خەمساردییۆ مامەڵە بکەرۆ'

دماین و قسەکاسەنە کەسکین بایندەر ئاماژەش پانەی دا کە مەبۆنە دەسەڵاتداری سیاسی بە خەمساردییۆ نزیکو بانگەوازەکەی بۆوە و هەموارکەردەیۆ یاساو پڕۆسەکەی جابەجێ بکەرۆ.

بایندەر واتش: "بە تایبەت دەسەڵاتداری سیاسی مەبۆنە جە ئاست بانگەوازو چارەسەری ئێژا عەبدوڵا ئۆجالانی خەمسارد بۆنە. بە نامێ بنیادنیاو  گلێرگە و دیموکراتیکی و ئاشتی ئی بانگەوازە کریان و مشۆم جواب دریۆوە، هەنگامەی ڕۆشنە بنریۆ. حەر پۆکەی یۆ جە هەنگامە گرنگەکا کە مشۆم نریۆ مسۆگەرکەردە و  پڕۆسەکەی بۆنە. مشۆم پرۆسەکە بە هەموارکەردەیۆ یاسایی و دەستووری بە ئەرەمەزیارە کریۆ. گرڏ و دینامیکە سیاسی و گلێرگەییەکا مشۆم بانە بەشێ جە پڕۆسەکەی. بنیات نییاو  ئاشتی و خولقانا و زەمینەو پێوەرە ژیواو تەمامو گلێرگەی، وەرپرسیارێتیێ هامبەشو گرڏیمانە. ئی بانگەوازە جە هەمانکاتەنە بانگەوازو جابەجێ کەردە و ئەرکو 'خزمەتکەردەی پەی ئاشتی' و گرڏ و دینامیکە سیاسی و گلێرگەییەکان."