وێرەگاو ئارۊی چوار شەممە، کتێبخانەو کارێزی جە شاروو کەرکوکوو پانیشتوو کورڎستانینە، بە ناموونیشانوو (وەرپەرسبییەیما وەراوەروو ژیوگەی پرڎەو پەیوەنڎیمانە چەنی ژیوگەی)، سیمینارێوەش جە لاو "ڕێکوزیاو ژیلەمۊی پەی پارێزنای کولتووری و ژیوگەی" ڕیک وست بە هامکاریی کتێبخانەو کارێزی جە گەڕەکەو باروودخانەو شارەکەی.

سیمینارەکە جە لاو "چێنەر شێرکۊ" چالاک و ژیوگەپارێز و وەرپەرسوو ڕێکخراوەکەیۊ، پێشکەش بە ئاماڎەبییاو  سیمینارەکەی کریا.

یاگۍ باسینە سیمینارەکەنە ژمارێوە وەرەچەم جە چالاکا، گەنجا، ڕۊنامەنویسا، نویسەرۍ و کەسایەتێی ڕۊشنویرا شارەکە بەشڎارۍ بیۍ.

چێنەر شیرکۊ چالاک و ژیوگەپارێز، سەرەتاو سیمینارەکەینە پێناسێوە ژیوگەیش کەرد و باسوو گرنگی و لکیدریای ئینسانوو کوردی و ژیوگەیش کەرد و واتش: "ئینسان چکۊنە قەرزاروو ژیوگەین، ژیوگە کاریگەرییش سەروو مەژگی  و توانا و ئاستوو گلێرگەی کەرۊ، چونکوم دروسبییەی ئینسانی کە ژیوگێوە کاریگەریی سەروو کەسایەتیی ئینسانەکەی بۊ جە توانا و ڕوخسار و هەڵسوکەوتشنە، ژیوگە کۊو پێکئامایە فیزیاییەکان، چونکوم جە ڤایرۊسێوە تا ئینسان جە ژیوگەنە مژیوا، ژیوگە کۊو ئا پێکئامایانە کە ژیوا، کاریگەری سەروو یۊترینیوە منیارە، یانۍ کاریگەری و قۊمیایەکا دەوروبەرو زینڎەوەرا، گرڎوو زینڎەوەرا و ئەرەنیشتا و گلێرگەکا (جە ڤایرۊسێوە تا ئینسان) پەشتی بە زینڎەوەرای تەری بەسا و پەشتی بە ژیوگەی بەسا پەی دابینکەردەی پێویسییەکاشا، پێسە وارڎەی، وزە، ئاوی، ئۊکسجین و یاگۍ سەیایۊ و پارێزنای و فرەبییەی و..تا دمایی".

ئینجا باسوو کوردی و زوانوو کوردی و ژیوگەیش کەرد و واتش: " زوانوو کوردینە کەلیمۍ ژیوای و ژیوگەی فرە نزیکیێنۍ جە یۊیۊ، زوانی کوردی نزیکترین کەلێمێش جە ژیوگەیۊ ژیواین، چونکوم ژیوگەپارێزنای هامشێوەو ژیوای پارێزناین زوانی کوردینە".

هامکات باسش جە تەرسەو فاڕیای ژیوگەی کەرڎە و واتش: " ئینسان بۍ ژیوگە بییەی وێش جە دەس مڎۊ، ئینسان بەشێوەن جە ژیوگە یو بۍ ژیوگەی مەتاوۊ پۍ نۊعە وەرڎەوامیی بە ژیوای وێش بڎۊ، ژیوگە تاریخۍ دێرین و زنجیرەییش هەن، کە متاوۊ مڵکڎاری جە وێش کەرۊ و تەمام زینڎەن و گەشە کەرۊ و هامکاری بییەیەکای تەریچ کەرۊ کە بەشێنۍ چاڎی گەشە کەرا.

حەرپاسە ئا چالاکە ژیوگەپارێزە تیشکەش وستە سەروو قۊناغەکاو تەرسەو سەروو ژیوگەی جە سەرڎەموو سەرمایەڎارینە و واتش: "ئیتر هەقا دایوەنەی زەنگوو تەرسەو ژیوگە دەست پەنە کەرۊ و تاریخۍ جە زبڵی و بۊبژەی و پیسی و گەنای تۊمار کریۊ بۊنەو قازانجیوە، چونکوم سیستموو سەرمایەڎارینە گرنگی بە ژیوگەی و دماڕۆو ئینسانیەتی نەڎریان بەڵکوم تەنیا ویرۍ جە قازانجکەرڎەی کریینۍ، ئینەیچ کاریگەریی خراپش کەرڎەن سەروو ئەورووپای جە سەڎەکاو ١٩ینە بەتایبەتی، جە دماو ئی قۊمیایاوە تەرسەکاو سەروو دنیۍ ڕووەشا جە وروەستەی کەرڎە و فرۍ بییۍ... ئیسەنە بڕۍ ڕێکوزیۍ و جووڵیێوە وەشۍ بیێنۍ پەی پارێزنای ئی بابەتە هەستیارەیە کە چەنەش ژیومۍ و ناچارێنمۍ بە پارێزنایش".

جە دمایینە چێنەر شیرکۊ چالاکوو بواروو ژیوگەی، باسش جە دۊخوو ژیوگەو کورڎستانی کەرد و ئاشکراش کەرد: "ئەرەگیرەکاو کورڎستانی جە سەرەتاو دروسبییەی چەکی کیمیاییوە، ئا چەکەشا وەراوەروو کوردی و ژیوگەو کورڎستانی بەکار ئاورڎەن، جگە جە بەکارئاورڎەی چەکی کیمیاوی کە تا ئیسەیچ جە کەشەکاو سەروو سنووروو پانیشت و سەرنیشتوو کورڎستانینە دەوڵەتوو تورکیای دژوو گەریلاکاو ئازادی ئا چەکە قەڎەغەکریایە بەکار مارۊ، حەرپاسە بەکارئاورڎەی چەکوو فسفۊڕی و فرەبییەی جەنگی جە کورڎستاننە، بڕیەیۊ دارەکاو کورڎستانی و سۊچنای دارستانەکا، بییەی کارگەکا و گەورەبییەی شارەکاو کورڎستانی بۍ گرنگیدای بە ژیوگەی و حەرپاسە زیاڎبییەی خەڵکی جە کورڎستاننە و کەمکەرڎەی كشتوکاڵی و نەمەنەی هانەکا".

جە دمادمایی سیمینارەکەینە ئاماڎەبیۍ سەرنجە، چەنەوینای، ڕا و پەیلوای و پرسیارەکێشا ئاڕاستەو پێشکەشکەروو سیمینارەکەی کەرڎۍ.

هـ . ب