ڕۊو چوارشەممەی جە شاروو بۊکانی، مەراسیموو چلۍ "شەھرېار محەمەدی" بە ئاماڎەبییەی ژمارێوە فرە جە ھاموڵاتییا لوا ڕاوە. جە مەراسیمەکەنە کاوەترێوە چەرمۍ، پێسە ھێمێۋە پۍ ئازاڎی ورفڕیا.

حەر جە شاروو بۊکانی و جە زیارەتەڵانوو دەگاو کۊستەینە، مەراسیموو چلۍ "میلاد مەعروفی" لوا ڕاوە، جە مەڕاسیمەکەنە ئەڎاو میلادی واتش؛ کوڕەکەم شەھیڎوو ڕاو ئازاڎی و کورڎسانین و شانازییش پۊۋە کەروو.

جە شاروو مەھاباڎیچ مەراسیموو چلۍ "مێھران ڕەحمانی" جە دەگاو قالوزندان-ی بە ئاماڎەبییەی ژەنا و جوانا لوا ڕاوە، حەر پاسە مەراسیمەکەنە چنڎین دروشمۍ و سرووڎۍ شۊڕشگێڵیێ وچیێوە.

ھاموەخت جە درێژەو فشارەکاو دۊڵەتوو ئێرانینە پەی سەروو چالاکە سیاسی و مەڎەنییەکا، ژمارێوە ھاموڵاتیۍ تەر و شارەکاو وەرکۊتوو کورڎسانی گیریۍ.

ڕۊو ېەرەشەممەیچ ژەنێوە بە نامۍ "سەحەر فەتحی"یێ، کە ېارسانەنە جە شاروو کرماشانی گیرېا و واڕېاوە پەۍ ېاگێوە نادېارې.

ڕۊو ېەکشەممەی کەسێوە بە نامۍ "موحسین سادقی" خەڵکوو گواوەری سەر بە گێلان و کرماشانی جە لاېەنوو ھێزە ئەمنییەکاوە گیرېا.

جە لاېێوە تەرۊ تا ئیسە ھیچ زانیاریێوە جە بارەو "مەھسا قوربانی"یێ "١٩" ساڵەو شاروو سنەی وەردەس نییا، کە حەفتەی وەڵین جە تارانەنە گیرېا.

چی ڕووە وەڵینایچنە، جە عاقیبەتوو تەقەو ھێزە ئەمنییەکا دۊڵەتوو ئێرانینە، ېەرۍ کەسۍ جە شارە جیاجیایەکاو ئێرانی و وەرکۊتوو کورڎسانینە گیانشا بەخشا.

بە پاو ھەواڵێوە تۊڕەو مافەکا مرۊڤوو کورڎسانی، جە نوقتێوە وشکناینە جە دەگاو سەرقەڵاو کامیارانی، ھێزەکاو دۊڵەتی تەقەشا جە ترۆمبێلوو ھاموڵاتییۍ  کەرڎ، بە نامۍ "فەرشاڎ ئیبراھیمی" و بی بە مەڵامەتوو گیانبەخشایش.

بە پاو ھەواڵەکا جەنازەو "فەرشاڎ ئیبراھیمی" تەمەن (٤٠) ساڵی واڕېانۊ پۍ دکتۊری داڎوەریی کرماشانی، دماو تۊکاری پۍ جەنازەکەیش ڕۊو دووەشەممەی درېاوە دەسوو خێزانەکەیش.

 بە پاو ھەواڵێوە تۊڕەو مافەکا مرۊڤوو ئێرانی جە عاقیبەتوو تەقەو ھێزەکاو پۊلیسی، جە مەنتیقەو دەشتایی ئۊرداقوو قەزوینی، جوانێوە (١٧) ساڵ بە نامۍ "مێھرداد مەلەک"ی گیانش بەخشا.

سەروو ڕاو لامەرد-بەستەکی وەرنیشتوو پارێزگاو ھورموزگانی، ھێزەکۍ دۊڵەتوو ئێرانی جە نوقتێوە وشکناینە، تەقەشا جە ترۆمبێلێوە کەرڎە و بی بە مەڵامەتوو گیانبەخشای کناچێوە(١٢) ساڵۍ.

ھ.ئ