مەسەدە "کۆنفرانسو یەکڕیزی و یەکهەڵوێسی کوردیش جە ۋەرنیشتەنە" پیرۆز کەرڎ و ئەرەیاۋناش کۆنفرانسەکە هەنگامېوە تاریخیەنە کە ئیرادەو ژیۋای و مڎرامانی و ڕۆحو پێوەرەبیەی جە ۋەرا ۋەرو هەوڵو پەشتگۊش وستەی و سیاسەتەکا دلېنەبەردەی نیشانە مڎۆ.
ئەنجوومەنو سووریای دیموکراتیکی (مەسەدە) پېوەس بە "کۆنفرانسو یەکڕیزی و یەکهەڵوێسی کوردی جە ۋەرنیشتەنە" ئەرەیاۋنێوە نویسیاش وەڵاکەرڎۆ.
جە ئەرەیاۋناکەینە ئاماژە پانەی کریان کە دەیان ساڵېن کورد جە سووریانە دووچارو ئێش و زۆرداری کریانۆ، سەرو خاکو وڵاتەکەیشۊ دووچارو عەزیەتدای بیەنۆ؛ جارێوە چەوەسنایۆ جە دژو ئا سورییا کە داواو ئازادی و شکۆی کەرێنۍ و جارێوەتەریچ تووشو چەوەسنایۆ نەتەوەیی بیێنۍ و مافە سروشتییەکېشا بە ئامانج گیریێنۍ، کۆچبەرۍ کریێنۍ، ئاڎۍ چا کەسا بێنۍ وەڵۍ گرڎ کەسێنە کە پەی سووریایۍ دیموکراتیکی قوربانیشا دا.
مڎرامانوو ڕۆحو پێوەرەبیەی
مەسەدە ئەنجامدای کۆنفرانسو یەکڕیزی و یەکهەڵوێسی کوردیش جە ۋەرنیشتەنە پیرۆز کەرد و واتش: "ئینە هەنگامېوە تاریخیەنە کە ئیرادەو ژیۋای و مڎرامانوو ڕۆحیەتو پېوەرەبیەی جە ۋەرا ۋەرو هەوڵو پەشتگۊش وستەی و دلېنەبەردەی نیشانە مڎۆ. پاڵپەشتی ڕەنجو یەکهەڵوێسی نیشتیمانی کوردی جە چوارچێوەو پڕۆژەو ئاشتی سووریای مکەرمۍ.
ئی پڕۆژە سەرو ئا بنەمایێنە، کە پرسو کوردی تەنیا پرسو بەشێوە گلېرگەی یان هەرێمەکەی نییا، بەڵكم پرسێوە ڕەسەنا و بەشێوەن جە مڎرامانوو ئازادی و دادپەروەریی گەلوو سووریای."
بنیاڎنیای ئازادی و دیموکراسی
مەسەدە جە ئەرەیاۋناکەیشەنە واتش: "یەکڕیزی کوردی ئارۊ بناغەو بنیاڎنیای یەکڕیزی نیشتیمانی سووریاین، پېسە چنی کورد بەشێوە بیەن جە ئێشو ڕێشەکا سووریای، ئارۊیچەنە بەشێوەن جە ڕاوەبەردەی ڕزگاری و بنیاڎنیای سەرو بنەماو ئازادی، دیموکراسی و فرەڕەنگیچ."
جە دما دمایی ئەرەیاۋناکەینە مەسەدە ئاماژەش پانەیچ کەرڎەن ئی هەنگامۍ پەی ئاینڎێوە عالتەری هیوابەخشەنە؛ ئاینڎێوە چنەشەنە وزە و ئیرادە یۆ گێرا، پێکئامایەکۍ گەلو سووریای ڕێککەوتەیۍ نیشتیمانی تازە ئەرەمەرزنا کە چنەشەنە بەهاکۍ یەکسانی بەهێزتەرۍ با و سوریایۍ ئازاد، دیموکراتیک، فرەڕەنگی نامەرکەزی ئەرەمەرزیۆ.
