ئەرەنیشتۍ کانتۆنوو فراتی دژوو گۆشەگیری ڕاپیمایشا کەرد
کانتۆنوو فراتینە دژوو گۆشەگیری سەختوو سەروو ڕابەروو گەلو کوردی عەبدوڵا ئۆجالانی و هجوومەکا دەوڵەتوو ئەرەگیروو تورکی پەی سەروو هەرێمەکاو پارێزنای مەدیای، ئەرەیاۋنێوە ۋنریاوە و ڕاپیمایۍ ئەنجامدریا.
سەڎان ئەرەنیشتۍ کانتۆنوو فراتی بە ئەنجامدای ڕاپیمایۍ دژایەتی ۋێشا جە ۋەرا ۋەروو گۆشەگیری سەختوو ئیمراڵینە بەربڕی. ڕاپیماکەی جە مېڎانوو ژەنۍ ئازاڎێوە دەسشپنەکەرد و تا مېڎانوو ئاشتی بەردەوامیش بۍ.
جە ڕاپیماکەینە ۋێنەکاو ڕابەروو گەلو کوردی عەبدوڵا ئۆجالانی بەرزۍ کریێوە و دروشمەو 'بێ سەرۆکی ژیۋای مەبۆ' وچیاوە.
دماو ئانەی ڕاپیماکەی یاوا مېڎانوو ئاشتی، چا دەیەقێوە ڕێزگێرتەی پەی ڕۆحوو گەشمەرڎا ئەنجامدریا.
دماتەر جە کۆردیناسیۆنوو کۆنگرە ستاری ماجیدە حەسەن قسێش کەردۍ و ئاماژەش پانەی کەرد هەتا دما نەفەس و ژیۋایما خاوەنداری جە ڕابەریما مکەرمۍ و جە کۊشیای بەردەوامۍ بیمۍ تا ئازاڎیی جەستەی ڕابەر ئاپۆی مسۆگەر مکەرا.
هەر جە ڕاپیماکەینە جە تەرەفوو کۆنگرە ستاروو فراتیوە ئەرەیاۋنێوەش دژوو هجوومە ئەرەگیریەکا دەوڵەتوو تورکی پەی سەروو هەرێمەکاو پارێزنای مەدیای ۋنریاوە. جە ئەرەیاۋناکەینە هجوومەکۍ دەوڵەتوو تورکی پەی سەروو هەرێمەکاو پارێزنای مەدیای شەرمەزارۍ کریۍ.
جە بەشێوەتەروو ئەرەیاۋناکەینە ماچۆ: "دوا جە ڕێکوزیاکا مافوو مرۆڤی و ئەنجوومەنوو ئاسایشی میان نەتەوەیی مکەرمۍ کە حکومەتوو فاشیستی ئێرانی ناچار بکەرۆ دمایی بە قەرارە نا ئەخلاقیەکاش بارۆ و دمایی بە سزاو جە قەنارەدای گیریایا جەنگی و گەنجاو کوردی بارۆنە."
جە دما دمایی ئەرەیاۋناکەینە بانگەواز پەی گەورەکەردەی کۊشیای کریا و واتش: "داوا جە گەلو کوردی و ڕێکوستەکا ژەنا مکەرمۍ ئەرەکۊشایشا بە قوەت بکەرا و بە سەرمەشقایەتی ژەنۍ ئازاڎۍ ئاڵاو ئازاڎیی بەرزبکەراوە."
