کوشیای و برینداربییەی ٩٨ کۆڵبەرا ماوەو ٧٠ ڕوانە
سەرەتاو ساڵێ تازێ کوردییێوە تا ئیساتێ لاو کەمیوە ١٧ کۆڵبەرێ و کاسبکارێ کوردێ کوشیێنێ و ٨١ کۆڵبەرێ و کاسبکارێچ بریندارێ بیێنێ.
بە پاو زانیارییەکاو ڕێکوزیایەکاو مافوو ئینسانی وەرکەوتوو کوردستانینە ئەوەڵوو ساڵێ تازێ کوردیێوە تا ئیساتێ، یانێ ماوەو ٧٠ ڕوانە لاوکەمیوە ١٧ کۆڵبەرێ و کاسبکارێ کوشیێنێ، کە ١٢ کەسێشا بە تەقەی هێزەکاو دەوڵەتوو ئێرانی کریێنێ ئامانج.
دووێ چا کۆڵبەرا بە ڕەقبییەیوە، ٣ کۆڵبەرێ بە کەوتەیرەواریوە جە بەرزایی و کۆڵبەرێویچ بە مردای دڵی مەردێنێ.
هاموەخت چا ماوەنە ٨١ کۆڵبەرێ و کاسبکارێچ کە فرێشا، بە تەقەو هێزەکاو دەوڵەتی پێکیێنێ، بریندارێ بیێ.
فرەو کۆڵبەرا و کاسبکارا مەنتێقە سنوورییەکاو نەوسودێ و بانەینە کریێنێ ئامانج.
