ڕێکوزەو مېیانو ئەوەکۊڵیای مەیدانیی کۆمەڵایەتیی_سیاسی، یوکسەل گەنچە کە جە سەرەتاو پرۆسەکەیۆ شۊنیرەلوای پەی هەڵوێسو گەلی مکەرۆ، ئەرەیاۋناش بەپاو داتاکا، سەرەتا گەل نیگەرانیش بیەن.

یوکسەل گەنچە واتش: "بانگەوازو ٢٧ و شوباتی، یۆ چا ساتا بۍ کە نیگەرانییە گریمانەییەکا دەربارەو پرۆسەکەیش نیشانەدا. چێنە، نیگەرانییەکە پېوەس نەبۍ بە بەشداربیەی جە دلېینەو بانگەوازەکەو ئېژا ئۆجالانی یان بێ ‌متمانەیی بە پرۆسەو ئاشتی و چارەسەری دیموکراتیکی. پېسە ئەزموونێوە چا پرۆسا کە تا ئیساتۍ ڕووەشا دان، بێ ‌متمانەیی بۍ بە دۊڵەتی کە چی ڕوانگۆ هەمیشە شۊنەو فێڵ و تەڵەکەیرە گێڵان.

هەرپاسە جە ماوەو ئەوەکۊشای ٤١ ساڵەینە، زیاتەر چانەی چەمەڕا کریۍ، پەکەکەی پېسە جمېیەرێوە موینۆ کە پارێزنۊشا و ۋەرگیری جە ماف و داوا ڕەواکا گەلی مکەرۆ. پۊکەی ئەرەیاۋناکەو پەکەکەی پەی دمایی ئارڎەی بە چالاکی و ئەوەکۊشای چەکڎاری، بۆشایی و خەمباریێوەش چنە کۊتۆ. دماو ئی قەراریە، هەستو سەرەتایی خەڵکی پی جۆرە بۍ: "جە ۋەرا ۋەرو چێشینە، پەی چی، چنی متمانە بکەرمۍ؟.

بەڵام دماو ٢٧ و شوباتی، دلېینەو بانگەوازەکەو ئېژا ئۆجالانی بە گەلی ئەرەیاۋېیا و زانیاری بە گەلی دریا، جە بوارو فاڕای ڕێبازو ئەوەکۊشای ستراتیجیوە قەناعەت بە گەلی کریا، کاتێ ١٢ و ئایاری قەرارەکۍ کۆنگرەی ئاشکرا کریۍ، مېڎانەکە چەمەڕاو ئی قەراریە بۍ".

"یەرۍ هەڵوێسۍ بەرۍ کۊتۍ"

یوکسەل گەنچە واتش: "وەختۍ تەماشەو پرۆسەو دماو کۆنگرەکەی مکەرمۍ، ڕووبەڕوو یەرۍ هەستا بیمێوە. گرووپی یووەم ماچانۍ: "ئۆجالان و دۊڵەت جە چوارچێوێوە ڕۊسنەنە ڕێکێکۊتێنۍ، پرۆسەکەی بەرەو وەڵۍ بەرا، گرڎ چێوۍ ئینا سەرو ڕاو ۋێشۆ". گرووپی دووەم ماچانۍ: "با چەمەڕایی کەرمۍ، بزانمۍ چێش گوزەریۆ و گەرەکشانە چێش بکەرا". گرووپی یەرەم حیچ متمانێوەشا بە پرۆسەکەی نییا و ماچانۍ: "فریوما مڎا، تەرسی هەنە کە بەبێ دەسکەوت دمایی بە ئەوەکۊشاکەیما بۍ ". نیگەرانیییەکۍ پی جۆرەنۍ".

هەرپاسە واتش: "هەست و هەڵوێسەکۍ بە پوختی پی جۊرەنۍ: یۆ ماچۆ: "متاومۍ چێش کەرمۍ". بەشێوە گرنگ ماچانۍ: "چەمڎاری مکەرمۍ، با بزانمۍ چێش گوزەریۆ". بەڵام هەڵای بێ‌ متمانەیی بە دۊڵەتی ئینا ئاستێوە بەرزەنە".

"گەل زیاتەر چەمش ئینا جە کرداری نەک قسێ"

یوکسەل گەنچە جەختش وست سەر و چەمەڕایەکا گەلی جە دۆڵەتی، ئەرەیاوناش جە سەرەتاو پرۆسەکەیۆ قسێ و تەماشەکەردە و لایەنگرا دەسەڵاتی مایەو نیگەرانی بێ، ئاماژەش پانەیە کەرد جە سەرەتاو پرۆسەکەیۆ دووێ هەنگامێ گرنگێ نریێ، واتش: "یوەم بانگەواز و نەخشەڕاو ئێژا ئۆجالانی بێ، ئەویتەریچ کۆنگرەکەو پەکەکەی و ئەنجامەکا کۆنگرەکەی بێ. ئی هەنگامێ، ئازای و ڕادیکاڵی و ستراتیژیی بێنێ، بەڵام دۆڵەت وەراوەر و ئی هەنگاما هیچ هەنگامێوە کرداری و وەرپرسیارانەش نەبێ، ئینەیچ  نیگەرانیی گلێرگەیش زیاتەت کەرد و چەمەڕایەکا لاواز مکەرۆ. گەلوو کوردی چەمەڕاو  هەنگامەی کرداریێنێ، گەل گۆش بە قسێ مەڏۆ . چەمەڕاو  ئانەی نییا کە دەسەڵاتو ئاکەپەی قسێ جوانە بۆەرۆ سەر ئاشتی واڵە و_برایەتیی؛ حەر چنە  جە مییانو پرۆسەکەینە گەل ئینەش نەوینا. تا ئیسە گۆشش زوانێوە نەبییەن دەربارەو واڵە و_برایەتیی یەکسان قسێ بکەرۆ، بەڵام گرنگی پینەیە مەڏۆ و چەمەڕاو ئینەی نییا. ئی گلێرگە  سەرنجش ئینا سەر و کرداری نەک قسێ. چونکە بە تەماشەکەردە و چا پرۆسا جە ساڵە و١٩٩٣ـی دەسشا پنەکەردەن، بە تایبەت شکستیو پرۆسەو ٢٠١٣_٢٠١٥ ئانەش دەس نیشان کەرد، کە خەڵکی تەماشە و ئەنجامو پراکتیکی مکەرۆ نەوەک قسێ، گەرەکشانە هامشێوەو پەکەکەی، دۆڵەتیش فاڕییای ڕادیکاڵ بکەرۆ، هەنگامەی جددییە بنیۆ پەی بنیادنیاو  ئا تورکیایەی کە وەشڵەیش پنە وازمێ".