پارتوو کرێکاراو کوردستانی (پەکەکە) بە کولتوروو گەورەکەردەی کۆشیای گەشمەردا، یاوان بە ئاستێو سەرمەشقایەتیی ئازادیی گردوو گەلاو جیهانی بکەرۆ. چی چاندەنە حەرگەشمەرەبییەێوە هێزوو هەنگامنیایش تازەتەر و گەورەتەرا. حەرشەهادەتێوە مبۆ بە نامونیشانوو هەنگامێوە و سەرکەوتەێوی گەورەتەری. پا وەعدە جە قارەماناو ١٤و تەموزیوە دریان، قۆناغوو ١٥و ئابی کریا. بە ڕۆحوو فەرماندە عەگید (مەعسوم کۆرکماز) گەریلایەتیی جەنگوو ئازادی گرد دەڤەرێوی کوردستانینە وەڵا بییەنۆ. پەوکای متاومێ بواچمێ: جەنگوو گەریلای هەقەو مدرامانکەراو زیندانوو ئامەدین. ئارۆنە هەرێمەکاو پارێزنای مەدیاینە هەقەو مدرامانوو مەزڵوم دۆغان، کەمال پیر، محەمەد خەیری دورموش، عاکیف یەلماز و عەلی چیچەکەکا پێسەو گەورەیی عەشقوو ژیوای ئازادییشا گەورە و گەش بییەن. گەریلاکاو ئازادیی کوردستانی بە ڕۆحی مدرامانکەرانەو مەزڵومی، بە حیکمەت و زانستوو خەیری، بە یارای کەمالی، بە قەرارداریی عاکیفی و بە ڕۆحوو گەنجیی عەلی چیچەکیوە گەورەتەرین هجوومی ئەرەگیرکاری پووچەڵ مکەرانێوە.

جەنگەوانێ وێگێرێ ١٤و تەمووزی دەسشا بە وستەیرەواروو هەلیکۆپتەرا کەردەن

بە نزیکبییەیوە گێڵایوە ساڵەو هەڵوێستی شکۆداروو سەرمەشقاو پەکەکەی کە زیندانوو ئامەدینە گێرتشارە وەر، هامڕێ هەقەتینێشا، شاگردێ ئا فەرماندە شکۆدارا بە چالاکییەکا کە شایەنوو شکۆیشانێ، خێرامای جە ١٤و تەموزی مکەرانە.

ڕۆچێ ١٠و تەمووزی مەیدانوو مدرامانوو کەشوو بەهاری، نیشانەماڕێ هەپەگەی و یەژا ستاری هەلیکۆپتەرێوی جۆروو سکۆرسکیش وستەرە واری، کە بەنیازێ درێژەداینێ بە ئەرەگیرکاری. بە دایوەنێوی کوشندە هەلیکۆپتەرەکەش وزیارە واری.  

هێزەکاو گەریلای پی ماتەوزە چالاکەیشاوە و بە بەکارئاردەی تاکتیک و تەکنیکوو وێشاوە، تا بێ زیاتەر پەشتی بە وێشا مبەسانە و چالاکییەکاشا کاریگەرتەر مکەرا. گەریلا پا دەرفەتە کەمەوە کە هەنشا فشارەکاو جەنگیشا نەزۆکێ کەردێنێ. عاسمانەنە، زەمیننە و چێروو زەمینینە بە ئەزموونەکاشا کە ڕاو جەنگیشا دیارییە کەردێنە مگژیانە. ئی تازەگەری و وەڵیوەلوایە، کە گەریلای ئەرەمەرزنان، پاسەش کەردەن کابینەو جەنگوو  سوپاو تورکی گرد وەختێو پلانەو جەنگەکاش بفاڕۆ.  

ئا سوپرایزێ، کە گەریلای مەیدانەکاو جەنگینە ئەرەگیرکەرییش وەش کەردەن، دوژمنش وستەن شۆکۆ. لایێوی تەرۆ ئاماژەکاو وەنەپەرساویوە و نیگەرانیەکاشا فرە زیاتەرێ کەردێنێ. پێسە دندەکاو تەزبیحا دماو یۆیوە ڕێزێ با؛ ئایا گەریلا سەروو کام جەوهەریوە وێش تازە مکەرۆوە، کە متاوۆ پاسە بگنۆنە وەڵێ؟ هێزو وێش کام بنەمایاوە ورمگێرۆ، دڵ و عەقڵش بە چێشی ڕابەری مکەرۆ؟ جە ڕێباز و تەکتیەکانە وێشا بە چێش مسپارانێ و قەوەت مکەرانە؟

بڕێو جوابێ ئا پەرسا چی دووە سەردێڕاو وارینە هەنێ.  

هەقسانەکاو زیندانوو ئامەدی بە پسۆڕییوە جەنگوو سەرکەوتەی مکەرا

کەشەکاو کوردستانینە حەرگەریلایێوە پێسەو سامۆرایێوا. گەریلاکاو ئازادیی پێسەو سامۆرای ماچۆ؛ 'چەنی دوژمنەکاما چێروو هەمان عاسمانینە نمەژیومێ' مگژیەیمێ.

‌هێزەکاو گەریلای ڕەگەزەکاو سوپابییەی مۆدێرنینە گرد ڕوێو وێشا موزانە وەڵێ و پلەی بەرزتەر تۆمار مکەرا.  تەکنیکوو جەنگینە، بە تاکتیکی پسپۆڕییوە سەروەرێنێ. هێزەکاو گەریلا قووڵایێوی سەرنجکێششا  زانستی سەروازینە و حەرپاسە هونەروو جەنگینە بنیات نیان و فەرهەنگی سەروازی و شێوازوو ژیوایشا بەرجەستە کەردە.ن

گەریلا تەنیا بە سۆزۆ جەنگ نمەکەرۆ، بەڵکوم هێزوو دڵی و مەژگیش ئامێتە کەردەن و پێسە خاستەرین خولقنایش کەردەن.

'جەنگ و چالاکیێوە ئەنجامەکەش سەرکەوتەی نەبۆ، ئانە هینوو ئێمە نییەن'

ئا مۆدێلە کە پێسەو گەریلاو ژیوایوە نامێ مبریۆ، بە هەڵوێست و جمەو وێش، بە ڕێبازوو گورزوەنەشانای گردوو هجوومەکاو دەسەڵاتداری پووچێ مکەرۆوە.  بە میتۆدوو؛ 'جەنگی و چالاکیێوە کە دەرنجامش نەبۆ، ئانە جەنگ و چالاکیی ئێمە نییەن' مجووڵیۆوە. پێسە ڕووەو ئادیشا تەنیا ئینا سەرکەوتەینە و دەرفەت پەی هیچ دۆڕیاێوە نمازۆوە.

گەریلا کە دڵشا بە سەرکەوتەی پەڕ کەردەن و وێش پی شێوازەو ژیوایوە ڕێک وستەن، یاوان بە هێزوو گورزشانای کاریگەری. ئیسپاتش کەردەن، کە هێزێوەن و نمەدۆڕیۆ. بە سەنگەرەکاشا گرد یاگێوەنە، بە وێبەپلانکەردەێوە دروس و بە گورزشاناێوە کاریگەر، هەم یارای و هومێدی گەورە مدۆ بە گەلەکەیش و هەم بە دەسەڵاتداریی نیشانە دا کە "نە بە هجوومەکاش، نە بە هامکاریکەردەی نۆکەراش ئەنجام بەدەس نمارۆنە. گەر فرەتەر جەخت بکەرۆوە ئا وەختە زیاتەر شکسش وەرمگنۆنە و ورشانایوە وێش نزیکتەرمکەرۆوە" یاگەپاورگیرەکاو مدرامانوو ١٤و تەمووزی سەروو میراتی ئەزموونداریوە جەنگەکێشا ئەنجامی گرنگ مخولقنانە. پەوکای داراو نێرینێوی فرەلایەنێنێ، تاکتیکەنە  چالاکێنێ. جە وەڵێوستەی ئی جەنگەینە تەنیا وێشا مسپارانە بە هێزوو عەقڵی و ئیرادەو ئینسانی وێباوڕی. وێشا مسپارانە بە هەستوو وەڵاتپارێزنی دڵوو مەزڵوم دۆغانینە،وەشەسیای واڵە و برایی بەینوو گەلا دڵوو کەمال پیرینە و هومێدوو سەرکەوتەی گەورەی ڕۆحوو عاکیف و عەلی چیچەکەکانە.