کۆمسیۆنو فەرهەنگی پلاتفۆرمو هۆرام-ی، بە بۆنەو رۆو زوانی ئەڎایی و ٦مین ساڵیادو ئەرەمەڕزنایرەو پڵاتفۆرمەکەیەنە  بەیاننامێوش دان و جە میانشەنە وازیارەن؛ زوانی هۆرامی بوانیۆنە و چونکە نەوانای بە زوانی ئەڎایی زیندانکەردەی کەسایەتیی ئینسانەکان. پلاتفۆرمەکە هەرپاسە جە ششەمین ساڵڕۆ ئەمەرزنایشەنە، جە وەرانوەرو کەمکارەیا وێش پەی پارێزناو زوانی ئەڎایی و ئەرەمەرزنایرە سیستمێ وێڕاوەبەر پەی هۆرامانی ڕەخنەدای وێش مڎۆ. 

تەمامی بەیاننامەو پلاتفۆرمو هۆرام-ی بە بۆنەو ڕۆو زوانی ئەڎایی و ئەرەمەڕزنایرەو پاتفۆرمەکەی:

هەر پاسە کە زانمێ خەڵکێ زینەن کە زوانەکەش زینە بۆ . زوان پسۆ گیاندارێ مشۆم خزمەت کریۆ . پەێ ئینسانەکا زوان نە تەنیا ئامرازوو پێوەندین ، چانەیە گرنگتەر ئەرمانەروو فەرهەنگوو خەڵکانێوەن کە قسێش پەنە کەرا . زوان بەشێوە گرنگ جە وێبیەی(هویت) مرۆڤین و دنیاو ئادی نیشانە مدۆ و شیش کەرۆوە. نەوانای بە زوانی ئەڎایی زیندان کەردەو کەسایەتیی ئینسانەکان . پەوچی فرەو زوان شناسەکا زوانی ئەڎایی بە ئامیان و کەسایەتیی زارۆڵەی مزانا . جە ماوەو دە ساڵێ ویەردێنە وەشبەختانە هەنگامێ گەورێ و هەرمانێ جۆراوجۆرێ جە لاو هۆرامی زواناوە پەی پارێزناو  زوانو کوردی- هۆرامی هۆرگیریەنێ و کریەنۍ.

جە لایەتەر تاپۆکەردەو فەرهەنگو هۆرامانی جە لاو (یۆنسکۆ)یەوە جە ساڵەو ٢٠٢١ هەنگامێ تەرە بێ پەی ئانەیە کە جە وەرمەنە چڵاکیەمێرەو بڕیارەکەو یۆنسکۆی بەر وستەو ئا ڕاسینە کە زوان و فەرهەنگو هۆرامانی سەڕەڕاو ئانەیە کە دێرینا، بەشێوەن جە گەنجینەو فەرهەنگو جیهانی. سەروو ئا ئەساسەیە بڕیارەکێ یۆنسکۆی متاوۆ ببانێ بە بنەڕەت و ئەرەمەرزنارەو سیستموو وانای پەی خەڵکو هۆرامانی. ئاژەو ئارۆ جیهانی ئانڎنە بە خێرایی واڕیۆ کە غەفڵەتێ گولانە سەبەبا پەی فۆتیای نەتەوێوە یا زوانێوە. هۆرامیچ یۆ چا زوانانە کە تەرسەو فۆتیای و نەمەنەیش فرێنە.

پلاتفۆرمو هۆرام-ی جە رۆ زوانی ئەدایی و هەرپاسە جە ششەمین ساڵڕۆ ئەمەرزنایرەو وێشەنە جە وەرانوەرو کەمکارەیا وێش پەی پارێزناو زوانی ئەڎایی و ئەرەمەرزنایرە سیستمێ وێڕاوەبەر پەی هۆرامانی ڕەخنەدای وێش مڎۆ. ئینە پا مانانە کە ئێمە تاوێنمێ هەرمانێ گەورەتەرێ و خاستەرێ پەی فەرهەنگ و زوانەکەیما جە ماوەو چڎن ساڵێ ویەردێنە ئەنجامێ بدەیمێ. بەڵام کەمتەرخەمیما کەردەن. هەر پاسە کە ئاماژەما پەنە کەرد، ئاژەو ئارۆ جیهانی جە گرد بوارەکانە بە خێرایی ئینا واڕیاینە. پەوکەی داواکاری خەڵکو هۆرامانیچ جە ویر و هەرمانەکاشارە نیشانێ ئانەینە کە هووشیاریە گردی پەی مەرزنیارەو سیستمێ ئینا بارەنە.

جە ششەمین ساڵرۆ ئەرەمەرزنایرەو هۆرام-ی تا یاوای بە ئامانجە بنەڕەتیەکاما کۆشیای و ئەرک گێرتەیما پەی چارەسەر کەردەو گرفتەکاما فرەتەر کەرمێ و باوەڕیچما ئانەن کە بەرز بیەیەو هووشیاری گردی و فرە بیەو مەیدان و هەرمانە فەرهەنگیەکا ئانەی وازۆ تا پەی چارەسەری فرەو گرفتەکاما تەنیا ڕاما ئانینە کە بیمێ بە سیستم. ئاژەو زوانی، ئازادی و ژیوایە گەلمیر ئانەی موازۆ کە بە ئامانجو خزمەت بە بەشێ جە شناسو مرۆڤایەتیی و سروشتی ”گرد ڕوێما ڕۆو پارێزناو زوانی ئەڎایی ببۆنە“.

کۆمسیونو فەرهەنگی پلاتفۆرمو هۆرام-ی