مۆسکۆنە جە ١٧و نیسانی تا ٢٤و نیسانی ٤٧ـەمین فێستیڤاڵی مېیاننەتەوەیی فیلمو مۆسکۆی ملۊڕاوە، ئی فێستیڤاڵە پەی یووەمجاری جە ساڵۊو ١٩٣٥بە ڕاوەبەری سەرگێی ئێزنشتاینی لواڕاوە و جە ساڵۊو ١٩٥٩ یۆ تا ئیساتۍ گرڎ ساڵێ بە جۆش و خرۆشێوە گۊرۆ پێشوازیش ۋنە مکریۆ، جە وڵاتا جیا جیایۆ فیلمەکۍ پەی فێستیڤاڵەکەی هۊرچنیا.

هەرپاسە جە بەرنامەو فێستیڤاڵو ئێساڵینە، فیلمێوە کوردی بە نامۍ "وەرزو نان"ی، کە جە لایەنو بەرئاوەرا کوردی ئەمیر حەسەنپوری و ئەنوەر حەسەنپوریوە بەرهەم ئامان، یۆ چا بەرهەمانە کە جە بەشو ملەملانۍ پلاتفۆرمەکەینە نمایشکریا.

ئەنوەر حەسەنپور سەبارەت بە فیلمەکەی چنی ئاژانسوو هەواڵوو فوراتی( ANF)قسېش کەردۍ و واتش: "ئی فیلمە سەرو ڕەنجو جە دەس شیەی ژەنا کوردی بەرهەم ئامان، چونکی ژەنا کوردی کەسانێوەنۍ کە گرڎ کۊششێوە مکەرا تا ژیۋای جە ڕاڕەوو ۋێشەنە سەرو پەیاوە مەنۆ و بەردەوام بۆ."

هەرپاسە ئەمیر حەسەنپوور واتش: "هیواڎارێنمۍ کە بتاومۍ ئی فیلمە جە ۋەرنیشت، ۋەرکۊت, پانیشت و سەرنیشتیچنە نمایش بکەرمۍ. گەرەکمانە فیلمو "وەرزو نان"ی جە عەفرین و کۆبانێنە بە تایبەت پەخش بکریۆ. ۋەرو ئانەی فیلمەکە ڕازەو گەلوو کوردی جە ۋێش گێرۆ."

یاگۍ ئاماژەینە فیلمو "وەرزو نان"ی یۆن چا ١٣ فیلمەی کە جە بەشو ملەملانێنە بەشداریش کەرڎەن.