ئارۆ چوارشەممە، جە هەڵەبجە بە سەرپەرشتی سەنتەرو ژیوای و وەزارەتو ڕۆشنویری حکومەتو هەرێمو کوردستانی یەکەمین خولو (زوان و ڕازوانو هەورامی) دەستش پنەکەرد.
جە خولەکەنە کە مامۆستا و نویسەر و زوانزان جەمال بێدار وانەکان مەواچۆنەوە، محەمەد فەتاح ڕەاوەبەرو گردی هونەر و ڕۆشنویری هەڵەبجەی و مامۆستا سۆران عومەر ڕاوەبەرو پەروەردەو هەڵەبجەی و ژمارێو مسیارێ (وانیارێ) ئامادێ بیێ.

خولو زوانی و ڕازوانی هەورامی 20 وانێ جەوێش مەگێرۆنە و هەر وانێوە 45 دەیەقێن و جە ڕاشانەوە مامۆسا جەمال بێدار سەبارەت بە بوارە جیا جیاکێ زوان و ڕازوانو هەورامی وانێ مەواچۆنەوە و زانشتیانە زیانیاریێ زوانەوانیێ بە وانیەرەکان مڎۆنە و فێرێ دروست نویستەی و وانای و قسەکەردەی بە هەورامیشان مەکەرۆنە.

جە هەرێمو کوردستانی یەکەم جارەن دامودەستگا حکومیەکێ خولە پەی زوان و ڕازوانی هەورامی بکەرانێوە و گرنگی بە زوانی هەورامی بڎانە. هەورامیەکێ ئا بەشەو وڵاتی بە گرنگییەوە تەماشاو خولەکەی مەکەرانێ و وازیارێنی حکومەت گرنگی زیاتەر بە هەورامی و هەورامانی بڎۆنە و ئی خولە ببۆنە بە سەرەتایێوە پەی دەستپنەکەردەی وەنەی بە زوانی هەورامی و نویستەی بە هەورامی و داواکارێنێ جەی دمای  تابلۆکێ هەرمانگە حکومیەکان، دلێ بازاری و دوکانێ و ڕێ و جادەکان بە هەورامی سەرشانەوە بنویسیۆن.