ئامەدەنە بە بەشداریی پارێزنەرا، ئیکۆلۆژیستا، ڕۆنامەوانا و هاموڵاتیا دەگاکا، ئەنجوومەنو ئیکۆلۆژیی ئامەدی ئەرەمەرزیا. ئامانجو ئەنجوومەنەکەی ئانەنە کە جە دژو سیاسەتەکا کاولکەردەی ئیکۆلۆژیای جە شارەکانە ئەوەکۊشایې یاسایی و بەڎەنی ڕاوەبەر بکەرۆ. ئەنداماو ئەنجوومەنەکەی، بە سەرنج وستەی سەرو زیاڎبیەی تاڵانکاریی ژیۋگەیی هامکات چنی گفتوگۆکا ئاشتی ئەرەیاۋناشا، "ئانې گەرەکشانە چنی ئینسانی ئاشتی بکەرا، پەنەوازا چنی ژیۋگەی ئاشتی بکەرا."

ئەلیدا زەریە: جە شۊنەمېوەنە کە جەنگ چنی ژیۋگەی سەرشهۊردابۆ، ئینسان نمەتاوۆ باسو ئاشتی بکەرۆ

ئەلیدا زەریە، ئەندامۊو جەمەو ئیکۆلۆژیای و ئەنجوومەنو ئیکۆلۆژیاو ئامەدی ئاماژەش پانەیە کەرد، کاولکەردەی ژیۋگەی جە لایەنو دۊڵەتیوە بە مەڵامەتی ئەمنی زەرەرش پەی پڕۆسەو ئاشتی بۆنە. ئەلیدا زەریە ئاماژەش پانەیە کەرڎ، ئا دەگا نشینې بە دەنگو ئەوەتەقای هایشا بێوە یاگې ژیۋایشا پنە چۆڵکریان و باسش چانەیە کەرڎ، بەمەڵامەتو پڕۆژەکاو بەنداو، کارگەی و بڕیەیۆ دارەکاوە خەڵک ناچارې بیێنې کە شۊنەماکاشا چۆڵ بکەرا. ئەلیدا زەریە واتش، "دژمەنایەتی چنی ژیۋگەی دژمەنایەتییا چنی خەڵکی،" و داواو دەمودەس مردنای کاولکاری ئیکۆلۆژیش کەرد.

مەزڵوم یەڵماز: بە بەهانې ئاسایشی ژیۋگە و خەڵک مکریا ئامانج

مەزڵوم یەڵماز، ڕاوەبەرو جەمەو ئیکۆلۆژیای ئەرەیاۋناش، ژیۋای ئیکۆلۆژی پا مەعنې مې کە گرڎو بوونەوەرا دلې ئاشتینە بژیۋا. یەڵماز ئاماژەش پانەیە کەرد، چالاکیی سەرمایەدارا (بەنزین، تەوەنی، کانەکا لم)ی هەڕەشێنې پەی سەرو هامسەنگیی ژیۋگەیی. یەڵماز باسش چانەیە کەرڎ، ژیۋگە و مېڎانەکې ژیۋای مرۆڤەکا بە بەهانې ئاساییشو ناوچەکەی هەڕەشېشا ئینا سەر و واتش، چیولای ئیتر هەڕەشې سەرو ئاساییشی بیەیش نییا، پەنەوازا ئی هرووژمې مردانە. یەڵماز ئاماژەش پانەیە کەرڎ، کاولکاری ئابووری و ئیکۆلۆژیی خەڵکی ناچار مکەرۆ کە کۆچ بکەرا و واتش، پەنەوازا پېوەرە دژو ئا تاڵانکارییە جەنگ بکەرمې.

محمد یەڵماز: ئاشتی درەختا، کەشا و ئاوینە

محمد یەڵماز، ئەرەنیشتەو دەگاو دوکوزاتلیی جە لج باسش چانەیە کەرڎ، ئا کارگەی جە دەگاو ئاڎیشانە هەرمانە مکەرۊ ژیۋای ئاڎیشا وێران مکەرۆ و تەنیا سەرمایەدارا دۊڵەمەڼ مکەرۆ. یەڵماز ئاماژەش پانەیە کەرڎ، ئیکۆلۆژیا و ئاشتی جە یۊی جیا نمەکریاوە و واتش، "ئاشتی درەختا، کەشا و ئاوینە." یەڵماز باسش چانەیە کەرڎ کە زەرەر یاونای بە ژیۋگەی زیان بە بەڎەنو ئینسانەکایچ میاونۆ و ڕەخنەش جە بێدەنگی خەڵکو شاری گێرت ۋەرا ۋەر پا کاولکاریەی دەگا نشینەکې چنەش مژیوا. بە واتەی "ئا چێوې ئارۊ کاریگەریشا سەرو من هەن، سەبای زیاتەر کاریگەریش سەرو ئاڎیشا بۆ" داواو ئەوەکۊشایې هامبەشیش کەرد و واتش، پەنەوازا دۊڵەت هەنگامەی دەمودەسیە بنیۆ پەی پارېزنای ژیۋگەی.