دادگاو باڵاو ئەمریکای مەسڵەحەتو دۆناڵد ترەمپی سەرۆکو وڵاتەکەینە قەرارێوەش بەرکەرڎ و بەپاو قەرارەکەی، چیولای حیچ دادوەرێوە نمەتاوۆ قەرارەکا ترەمپی ورسپارۆنە. چەمەڕا مکریۆ پی دەسکراوییۆ ترەمپ قەرارەکاش جە بارەو پەنابەراوە تنتەر بکەرۆ.
'ڕۆیتەرز'ی ئەمریکی وەڵاش کەرڎۆ، دماو ئانەی جە ماوەی ۋېیەردەینە بە قەرارو دادوەرێوە هەرێمی، قەرارێوە دۆناڵد ترەمپی، ورسپاریا، کە قەرارەکە بریتیبۍ چانەی ئیتر ڕەگەزنامەی ئەمریکی نەڎریۆ پا زاوڵا کە ئەڎاو تاتەشا کۆچبەرێنې بەڵام ۋێشا جە ئەمریکانە جە ئەڎې با، دادگاو باڵاو فیدراڵی ئەمریکای قەرارێوەش بەرکەرڎ کە چیولای حیچ دادوەرێوە نمەتاوۆ قەرارەکاو سەرۆکو ئەمریکای مردنۆ.
چا بارۆ ترەمپ ئەرەیاۋناش، چیولای متاوۆ چن سیاسەت و قەرارێوە ۋێش چەسپنۆ کە وەڵتەر جە لایەنو دادوەراوە ورسپاریێنې، هەرپاسە جە کۆنگرێوە ڕۆنامەوانینە ئاماژەش پانەی کەرڎ، "ئینە سەرکۊتەیې فرە گۊرە بې، سوپاسو دادگاو باڵای مکەرو پەی ئی قەرارەیە."
ئی قەرارەو ترەمپی جە بارەو مافو هاموڵاتیبیەی سەرو بنەماو شۊنەماو جە ئەڎابیەی، تەنیا یۊن جە کۆو ئا قەرارا کە جە لایەنو دادوەراوە جە سەرانسەرو ئەمریکاینە مردان.
