٢٢ې حوزەیرانی ڕۆو یەک شەممەی جە هروژمېوە ۋې تەقنایۊینە پەی سەرو کەنیسەو مار ئیلیاسی جە گەڕەکۊو دوویلای دیمەشقی، زیاڎ جە ٢٥ هاموڵاتیا مەدەنیې کوشیې، دەیان کەسې تەرێچ زامڎارې بیې. هرووژمەکە جە ماوەو ١٠ ساڵا ۋېیەردەینە پېسە یووەمین چالاکی جە دژو مەسیحییەکا دلې کەنیسەکەینە ئەنجام دریان.

وەزارەتو دلېینەو سووریای سەر بە هەتەشەی، ئەرەیاۋناش هرووزمەکە جە لایەنو چەکڎارا داعشیوە ئەنجامدریان کە جە کەمپو هۆڵیوە لوێنې دلې دیمەشقی. گروپو ئیسلامی تنڕەوی جە لیواو ئەنسار ئەل-سوننەی جە ٢٤و حوزەیرانی ئەرەیاۋنێوەش وەڵاکەرڎۊ و ۋەرپرسیاری هرووژمەکەیش گېرت ئەستۆ و ئەرەیاۋناش کە میلیتانێوەشا بە نامې 'محەمەد زەین ئەل عابیدین ئەبو عوسمان'ی هرووژمەکەش کەردەن.

لیواو ئەنسار ئەل سوننەی:

ئی ڕێکوزیا چەکدارییە ئیسلامییە تنڕەوە جە سەرەتاو ساڵۊو ٢٠٢٤ جە هەرێمەکاو سەرنیشتو سووریای سەرشهۊردا، ئایدۆلۆژیاو سەلەفی – وەهابیی هۊرگێرۆ. بە تایبەت گروپەکا پېسە عەلەوی، دروزی و مەسیحییەکا سووریای بە ئامانج گێرۊنە و ڕاوەبەرە عەلمانییەکا پېسە "کافر"ی پێناسە مکەرۆ. مەشۊم، یاساکې شەریعەتی بە تنی جابەجێ بکریا.

گومان چانەی مکریۆ کە پەیوەندیشا چنی قاعیدەی جە یەمەن و گروپە تنڕەوەکا لیبیای بۆ.

جە ڕاو تیلیگرامیوە ڕێکوستەی مکەرۆ؛ چالاکییەکا تیرۆرکەردەی، ئەوەتەقایۆ و سۊچنای جە ئەستۆ گێرۆ. جە دەگایەکا ئیدلب، حومس و دیمەشقەنە ئەنجامشا مڎۆ.

جە تێلێگرامەنە دیمەنو جابەجێکەردەی و پەیامو هەڕەشەکەردەی جە دژو گروپەکا پېسە عەلەوی، درووزی و مەسیحی وەڵا مکەرۊوە و جە ڕاو ئەکاونتو دیجیتاڵ میدیای ساختەیۆ پڕوپاگەندە مکەرۆ.

سەرۆکەکێش:

ئەبو ئایشە ئەل-شام (سەرۆکی سەروازی)

ئەبو ئەل-فەتاح ئەل-شام (ئۆتۆریتەی ئایینی)

ئەبو سوفیان ئەل-دماشک (سەرۆکی ئایدۆلۆژی)

سەرچەمە دارییەکېشا:

وڵاتا کەنداوی و هامکاری بەری، چالاکی بڕفانای پەی هۊرگېرتەی زەڕی و جە هەرێمەکەیچەنە تۆڕەو بازرگانی نایاسایی (چەک، مادەی هۆشبەر).

ئەگەرو ئانەی هەن کە لیواکې ئەنسار ئەل-سوننەی کە پېسە یۆ جە ڕێکوزیا تیرۆریستییەکا جیلی تازەی پێناسە مکریۆ، چنی گرووپە تنڕەوەکا تەرو هەرێمەکەی یۆگێرا. بە تایبەتی تەسەور مکریۆ ئا گروپە پێکئامایە ئایینییەکا بکەرۆ ئامانج، جە مانگەی ۋېیەردێوە پەنج دەگې عەلەویۍ هرووژمشا کریان سەر.