ئاژانسوو هەواڵوو هاواری وەڵاش کەرڎەنۊ، هەریۊ جە گەڕەکەکاو "شێخ مەقسوود"ی و "ئەشرەفیە"ینە جە شاروو حەلەبی. دووۍ زارۊڵۍ، بە نامەکاو "حسێن عەبدوڵڵا كیبار"ی و "ویسام سیدۊ"ی، کە یۊشا عومرش چوار ساڵێن و ئەوى تەرشا عومرش تەنیا ١٧ ڕووێن گیانشا جەدەس دا .

ئاماژە پانەیچ کریان، هۊکاروو گیان جەدەسدانى ئا دووە زارۊڵاو شاروو حەلەبی پەی ئا گەمارۊیە گێڵۊوە، کە حوکمەتوو سوریای سەروو گەلوو کورڎیرە سەپنانش و ڕا مەڎۊ وارڎە و چارەسەرى پزیشکى یاوۊ ناوچە کورڎنشینەکا.

ئانەیچ وزیان ڕووە، کە ڕاپۊرتە پزیشكییەكۍ پەشتڕاسش کەراوە، كە ئا دووە زارۊڵۍ بە سەرڎا گیانشا جەدەس دان، ئەگەر گەمارۊکەیچ دەوامش بۊ ئانە ڕێژەو گیان جەدەسداى هاموڵاتا و زارۊڵا زیاڎ کەرۊ.

باس چانەیچە کریان، ئا دووە گەڕەكۍ بارودۊخۍ كارەساتبار و سەخت پڕنا، جە ئەنجاموو ئا گەمارۊینە، کە فیرقەو چواروو سەروازیی سووریای ملوو ئا مەحاڵیرە سەپنانشا.

ماچایچ، فیرقەو چواروو سەروازیی سووریای، ڕاگێری کەرۊ جە لوایچوەروو سۊتەمەنی و دەرمانی و گردوو پێویسییەكاو ژیوای پەی ئا دوو گەڕەکا، ئینەیچ پاسەش کەرڎەن، کە ژیوای هەزاران کەسا چێروو تەرسێنە بۊ.

جە دماییچنە، داوا جە لایەنە پەیوەنڎیڎارەكا كریۊ، فشار وزا سەروو فیرقەو چواری پەی ورگێرتەی گەمارۊکەی.

یاگێ ئاماژەینە، ماوەو چنڎ ڕوێن حوكمەتوو سوریای و گرووپوو چەتەكاو سەر بە دەوڵەتوو داگیركەروو توركی، گەمارۊشا وستەن سەروو مەنتێقەکاو وەرنیشتوو كورڎستانی ئانەیچ نیگەرانیی هاموڵاتاش شۊنەو وێشرە ئارڎەن.

هـ.ئ