ئاخێز، ناڕەزایەتیی و سەرهۆردایەکۍٚ ئێرانی و  وەرکەوتو کوردستانی کە بە پێشاهەنگی ژەنۍٚ ڕاوەبریانۍ، جە هەفتەمن هەفتەیش نزیک بییەوە و سەرەڕاو فشاری و سەرکوتی و کوشتەی و دەستگیرکەردەی، سات بەسات فراوانتەرۍٚ مبانێوە.
وەرو ئانەی کە ژەنی بە دروشمەو ”ژەنی ژیای ئازادی“ پێشاهەنگەو ئاخێز، ناڕەزایەتیی و سەرهۆردایەکانە، ڕژێمی دەسەڵاتدار بە سیستەماتیک مکەرۆنەش ئامانج. جە ئا چوارچوەنە تائیسە چنڎین ژەنی هەورامیۍٚ، کوردۍٚ و ئێرانیۍٚ کوشیێنۍٚ و دەیانی تەرۍٚ بریندارێ کریێنۍٚ  دەیانیچ دەستبەسەرێ کریێنۍٚ.

جە نوتەرین تاوانشانە، جە هەمەدان پیایەکۍٚ ڕژێمی ژەنە کوردە نگین عەبدولمەلەکی جە هەورامییەکانو قەڵاو قروە-یشان کوشتە.
 کوشیا.
بەپاو زانیاری بەدەستوزیای، نامبریێ تەمەنش ٢١ ساڵانێن و وانکارەو ئەندازیاری پزیشکی زانشتگاو سەنعەتی هەمەدانی بیێنە و بە باتۆ جەسەرەیش دریان و بە ئاهۆکارە گیانش بەخشان.
زانیان کە پیایەکۍٚ ڕژێمو ئێرانی هەڕەشێشان جە خانەوەدەکەیش کەردەن، تا هۆکارو مەرگو کناچەکێشان بشارانێوە. بەڵم خانەوەدەکەش ئانەشان قبوڵ نەکەردەن و هەواڵەکەشان وەڵاو کەردەنەوە. کوشتەی تراژیدی نگین عەبدولمەلەکیۍٚ پەرچەکەردارێش شونیەرە ئاومان و جەماوەری ناڕازی ئێرای و وەرکەوتو کوردستانیش زیاتەر تۆڕە و نیگەران کەردەن.

هاموەخت کوشتەی نگینۍٚ جە هەمەدان، جارێوتەر کوشتەی تراژیدی شلێر ڕەسوڵی خەڵکو هەورامانی جە مەریوان، ژینا ئەمینی، خەڵکو سەقزی جە تاران، مینو مەجیدی، ژنە یارسانییە جە کرماشان بە یادگە ئاوردەوە و سەلەمناش، کە بانگەشەکۍٚ ڕژێمی پەی ئاسایی نیشاندای مەرگو ژینا ئەمینیۍٚ و ژەنا تەری دورێنۍٚ جە ڕاستییەوە و ڕژێم بە سیستەماتیک کوشتەی ژەناش گێرتەن وەر.

یاگۍٚ یادئاوردەیەن، کە کوشتەینگینۍ، جە دوۍٚ مانگۍٚ ویەردێنە، جە ئێران و وەراسانو کوردستانی ئینە دوەم ژەنی هەورامییە و چوارەم ژەنی کوردەنە کە جەلاو ڕژێمیەوە مکوشیانۍٚ.