”جە ئووستوورەکاو یوونانیەنە بڕێوجار تووشوو بابەتی چانەی مەی، وزات سەروو ئا قەناعەتی کە واچی ئووستوورێ وینامینی فەرازەمانی و فەرامەکانیشا هەن. جاروباریچ قسێو قەدٚیمیاو لاو وێما بەجۆریێ گەرەکشانە شانە بدٚا شانەو ئا بابەتا و بگنا هامشانشا“.
جە ئووستوورەکاو یوونانیەنە بڕێوجار تووشوو بابەتی چانەی مەی، وزات سەروو ئا قەناعەتی کە واچی ئووستوورێ وینامینی فەرازەمانی و فەرامەکانیشا هەن. جاروباریچ قسێو قەدٚیمیاو لاو وێما بەجۆریێ گەرەکشانە شانە بدٚا شانەو ئا بابەتا و بگنا هامشانشا. پەی نموونەی ئووستوورەو سیزیێفی و تەوەن بە کۆڵی بەردەوام کە تەئویل و لەیەکانەی فرە هورگێرۆ و من گەرەکم نیەن ئەچێگەنە بلوو دلێو ئا بابەتی.
ئووستوورێوەتەرشا هەن کە ماچاش پەنە ئووستوورەو "نارسیس یان نارسیسۆ"ی. چی ئوستوورەنە؛ نارسیس رۆیێو ملۆ دلێو دارستانێوە. فرە گێڵۆ کەم گێڵۆ، تەژنەش بۆ. ملۆ پاڵوو گۆمێوە ئاوێ تا ئاوی وەرۆوە. وەختێو ملۆ سەروو ئاوەکێ و کۆمیۆوە تا جە ئاوەکێ وەرۆوە، سیماو کەسێوە وینۆ و ئاشقش بۆ. دماو چندٚ خولەکا زانۆ کە ئا کەسە وێشەن و ئادٚ ئاشقوو وێش بیەن. هەڵمەتە مدٚۆ پەی دلێو ئاوەکێ تا باوشی کەرۆ وێناکەیەرە بەڵام جمای و شڵەژیای ئاوەکێ وێناکەی پێوار کەرۆ. ماوێوە خواینۆ تا ئاوەکێ ئارامە بۆوە ئیجا هەم دووبارە پەلاماروو وێناکەی مدٚۆ و دووبارە هەمان حاڵەت. خولاسە هەرجار کە هەست کەرۆ ئاوەکێ ئارامە بیێنەوە دووبارە پەلامارێوەتەر مدٚۆ. ئێننە ئی کاری دووبارە کەرۆوە تا قەراخوو ئاوەکێنە لار بۆوە و مرۆ. ڕیوایەتێوەیچ ماچۆ شۆنەو وێناکەو وێشەرە گنۆ دلێو ئاوەکێ و خنیکیۆ. پی جۆرە چەوپەڕوو خودشێفتەگیەوە وێش گوم کەرۆ و تەمامیۆ. هەڵمەت و پەلامارەکایچش سوودێوەشا نمەبۆ.
ئینە وێناو بڕێو کەسان کە جە عەرسەی فەرهەنگیەنە فرە زوو دووچاروو وێشیفتەگی بانێ و پاسەشانە مەرەجیۆ بیێنێ بە ئەبەردەنگ. وەختیێ دلێو عەرسەکەیەنە تەنیا وێشا دەنگوو وێشا مژنەواوە، ئاشقوو وێشا با و پەی یاوای بە وێشا !! هەرجارەو پەلاماروو کەسێوە مدٚانێ تا بەشکەم بوینیا و بگنا وەرچەم. وەختەکاریێ دماو ماوێوە زاناشا فڵان پەلامارە سوودش نەبیەن و ئامانجەکەش نەپێکان، ئیجار گنا فکروو پەلامارێوەتەری. بە هەمان شێوەو نارسیسۆی کە وەختیێ ئاوەکێ ئارامە بێوە دووبارە پەلاماری دێ.
ئینەن کە موینمێ چی عەرسەی فەرهەنگیەنە کەسۆڵانێو یاوێنێنە بیەیشا بە پەلاماردای ئەو کەسانی¬تەری بەننا. ئانەن کە یۆ دماو یۆی مەگنا پەلاماردای. جاروباریچ ئەجۆشا لوای گژێو کەس یان بابەتی گەورەیەرە باڵاو ئادٚیشا بەرز کەرۆوە تا بوینیا !! غافڵ چانەی کە ئی گەمە پەلاماراویە ئاخرش هیچەن و هیچ.
لاو وێچما پەی ئی جۆرە حاڵەتانە قەدیمیێ بێ تۆشە نیەنێ و بڕێو قسێشا وستێنێ دلێو هەمانەی فەرهەنگی. قسانێوە کە تەمام فەرازەمانی و فەرامەکانیەنێ.
وینامین پەی هامتاو دیدگای پیشنیار کریان
نۋیستەی: رەئووف مەحمودپوور
سەرچەمە/ کاناڵەو_ئەنجومەنو،ڕۆجیاری
