کەنەکە کۆمکووژی ١٩١٥یش سەر و گەلوو مەسیحییە خۆجێیەکارە شەرمەزار کەرد کە بەدەسو عوسمانییەکا ئەنجام دریا و داواش کەردە گرڏو دامودەزگا پەیوەندیدارەکێ هەرێمی و مییاننەتەوەییەکا ئا کۆمکووژییە قبوڵ بکەرا.
کۆنسەو ڕاوەبەرایەتی کۆنگرەو نەتەوەیی کوردەسانی (کەنەکە) جە ١١٠ـەمین ساڵیاڏ و کۆمکووژی ساڵو ١٩١٥ی سەرە ئەرمەنییەکانو ئاشووری-سوریانی و کلدانییەکا کە بەدەسو عوسمانییەکا ئەنجامدریا، ئەرەیاونێوە نویسریاش وەڵاکەردۆ.
ئەرەیاوناکەو کەنەکەی پی جۆرەنە:
"ئیمپراتۆریەتو عوسمانی و هامکارەکێش جە ساڵەو ١٩١٥نە کۆمکوژییێشا جە دژو مەسیحیە ئەرەنیشتەکا میزۆپۆتامیای و ئەنادۆڵی ئەنجامدا. ژمارێوە فرە ئێزدیچ وەرو ئا هەڵمەتە کۆمکوژییە کەوتێ. جا کۆمکووژییەنە رێکوزیاو ئیتیحادی و تەرەقی، تەشکیلاتی تایبەت، سوارەی حەمیدییە، سوپاو عوسمانی و ئەفسەرەکێ دلێ سوپای بەشدارێ بێنی. گرڏ پێوەرە تاوانێوە گۆرێ ئینسانیشا بەرد ڕاوە. بە مەبەسو ریشەکێشکەردەو تاریخ و کلتورو گەلا ئەرمەنی و ئاشوری - سریانی و کلدانی ناوچەکەی، کۆمکوژیێ فراوانشا بەرد ڕاوە. ئی جینۆسایدە تاوانێوەنە دژو مرۆڤایەتیی کە هەرگیز مەتاویۆنە ئینکاریش ونە کریۆنە.
بەڵگەی ئاشکراو ڕۆشن سەبارەت بە کۆمکوژیی زیاتەر جە ملیۆن و نیمێ ئینسانێ هەنێ. ئامارە و سەرژمێریەکا خودو ئیمپراتۆریەتو عوسمانی ئی حەقیقەتەیە سەلەمنا. جە گەلوو ئاشوری – سریانی و کلدانی زیاتەر جە نیم ملیۆنێ کوشیێ. جە گەلوو ئەرمەنیچ زیاتەر جە ملیۆنێ ئینسانێ بە شێوازێ دڕندانە و یاگە جیاوازکانە کوشیێ. بە سەدان هەزاریچ بە پاو یاساو کۆچکەردە و ئا سەردەمەیە دورێ وسیێنێ بێسەرو شۆنێ کریێنی. بە دەیان هەزاریچ جە ژەنێ و کناچێ و زاڕۆڵێ ئەنفالکریێنێ و بە زۆر کریێنێ موسوڵمانێ و دریێنێ شوو. بە هەزارا یانێ و وانینگێ، کتێبخانێ، کڵێسا و کارگێ وێرانکریێنێ.
ئیمپراتۆریەتو عوسمانی خاکو میزۆپۆتامیای و ئەنادۆڵیشا ئەرەگیر کەردو، سەدان ساڵێ تاڵانش کەرد. دما جار ١٩١٥نە ئا گەلەش قەڵاچۆکەرد. تا ئیسەیچ ونی جا جینۆسایدەیە چۆڕیۆنە. ئا کارەساتەی سەرو ئا خەڵکەیرە ئاما، ئانەی ١١٠ ساڵێن پێسەو تراژیدیایێ گۆرە جە یادەوەری نەوە تازەکا ئا گەلەیرە ژیوۆ. ئیسەیچ کۆمارو تورکیای کە میراتگرو دۆڵەتو عوسمانییا دماو ١١٠ ساڵا سەرو ئا جینۆسایدەرە حەر ئینکاری مکەرۆ و دان مەنیۆ با حەقیقەتەیە. ئینەیچ ماناش ئانەنە کە تورکیا هامبەشو ئا تاوانەینە و درێژە بە جینۆساید مڏۆنە. جە یاڏو ١١٠ ساڵەو ئا جینۆسایدەینە داوا جە کۆمارو تورکیای مکەرمێنە کە دان با تاوانێرە بنیۆ ،.
ئێمە جە کۆنگرەو نەتەوەیی کوردەسانی – کەنەکە، فرە بەتنی جینۆسایدو ١٩١٥ شەرمەزار مکەرمێنە. داوا جە گرڏو دامودەزگا مییاننەتەوەیی و ناوچەییە پەیوەندیدارەکا مەکەرمێنە، کە پێسەو جینۆسایدی سەلەمناش و قبوڵش بکەرا."
