کۆردیناسیۆنوو کەژەکەی ساڵیادوو شۆڕشوو ١٩و تەمموزو وەرنیشتیشا مەبارەک کەرد و داواش کەردە: "با کوردستانەنە دژوو فاشیزمی و کۆڵۆنیاڵیزمی و خیانەتی، کۆشیایی هومێدی و ئازادی و یەکسانی فراوانتەر بکەرمێ، خاوەندارێتیش وەنە بکەرمێ و پێوە بپارێزنمێش".
کۆردیناسیۆنوو کەژەکەی ئەرەیاونایەکەیشەنە ماچۆ: "دژوو سیستموو سەرمایەداری کە گەرەکشەن سەدەو ٢١ بکەرۆ سەدەو جەنگی و کۆکوشی، شۆڕشوو وەرنیشتی بییەن بەهومێدوو گردوو ئینسانی و سەلەمناش، کە ژیوای دیموکراتیک و ئازادی مومکینەن. شۆڕشوو ژەناو وەرنیشتی کە بە پارادایمی دیموکراتیک و ئیکۆلۆژیک و ئازادیی ژەنا و بە ڕەنجی ٢٠ ساڵەو ڕابەر ئاپۆی ئامان بەرهەم، ١٢ ساڵێش ملەرە ویەرد و پا منیۆ ساڵەو ١٣ەمینیوە. ئێمە ١٢ ەمین ساڵیادوو شۆڕشوو ١٩و تەمموزوو وەرنیشتی وەنەو ڕابەر ئاپۆی و ئەدایە بەڕێزا، کە بەشێو جە جەستەو وێشا بەخشان و گردوو ژەنا و گەلا پیرۆز مکەرمێ".
کەژەکە درێژەنە ماچۆ: "ئێمە جە کەسێتیی هامڕا ئارین میرکان، ڕێڤان، ئاڤێستا خابوور، بارین، ئایلان، پۆڵات، دایکە عەقیدە، ئەبو لەیلا، عایشە دەنیز، هێلین ئینگلیز، سورخوێن ڕۆژهەڵات، ژیان و سۆسن، بە ڕێز و سوپاسۆ گردوو گەشمەرداو شۆڕشوو وەرنیشتی یادێ مکەرمێوە. بە ڕێز و سوپاسۆ یادوو ئا ٣٣ گەنجە دیموکراتە شۆڕشگێڵنا مکەرمێوە کە گەرەکشان بێ سەرنیشتوو کوردستانینە و تورکیاوە پەی کۆبانێ پردێوە بنیاتە بنیا و ٢٠و تەمموزو ٢٠١٥ جە ئەنجاموو هجوومو بۆمبوو چەتەکاو داعشینە پیرسوسنە گەشمەردێ بیێ، وەعد ئەوەخوای مکەرمێوە، کە درێژە بە ڕێکێشا مدەیمێ".
"شۆڕشوو وەرنیشتی بی بە شناسنامەو شۆڕشوو ژەنا"
ئەرەیاونایەکەو کەژەکەینە ئاماژە پی خاڵا کریان:
"جوگرافیاو وەرکەوتوو دلێراسەیەنە تارێخەنە یاگێ پێوەژیوای و مۆزایکوو گەلا بییەن. ئی ژیوایە، کە جەوهەروو ئینسانیەتین، چەنی دەوڵەت-نەتەوەکا سەراوچێر کریان و ئینسان بە نەتەوەپەرسی ژەعراوی کریان، ئینسان دریان گژێ یۆترینیرە. بەڵام سیستموو نەتەوەی دیموکراتیکوو ڕابەر ئاپۆی، وەراوەروو ئی سیستمە دماکەوتەینە، کە ماناو کوشتەی گلێرگەی و گەلی و ئینسانییا، بەرکەوت و پێسە هورشانایوە دەوڵەت-نەتەوەکا دەسش پەنە کەرد.
ژەنی کە جەوهەروو کۆمەڵایەتیبییەینێ، پڕۆژەو ڕابەر ئاپۆینە جەوهەری جەەسشییەو وێشا وێستۆ، پەی یۆبییەی چەنی نەریتی دێرینوو ئازادیی خاکوو میزۆپۆتامیای، ڕەنجش دا. ژەنی کە بیێ بە سیمبولوو وەڵاتپارێزنی و لکی دریێ بە خاکەکەیشاوە سەرمەشقایەتی شۆڕشوو وەرنیشتیشا کەرد. مدرامانوو هێزەکاو یەپەژە و یەژاستاری بی بە قەوەتتەرین مدرامان و سەلەمناش، کە سەدەو ٢١ سەدەو ژەنێن و شۆڕشوو وەرنیشتی پێسەو شۆڕشوو ژەنا شناسنامەش هورگێرت.
ئارۆ تا مێ فاشیزم جیهانەنە تەشەنە مکەرۆ و هەوڵێ مدریانە گەلێ بدریانێ گژێ یۆیرە، گەلاو وەرنیشتی و سەرنیشت و وەرکەوتوو سوریاینە وەرچەمتەرین نموونەو پێوەژیواینێ. زیهنیەتی فاشیستوو ئاکەپە-مەهەپەی کە ئەرەمەرزنەر و پارێزنەروو داعشیا، هجووم مکەرۆ سەروو بەهاکاو شۆڕشی، تورکیانە و خاکە دێرینەکانە کە ئەرەگیرکاری مکەرۆ، حیساب پەی کوردی نمەکەرۆ، هجووم مکەرۆ سەروو گەلوو عەرەبی، بە گرد نۆعێوە گردوو جیاوازییەکا بە قڕکەردەی دەرباز مکەرۆ. فاشیزمی میاونۆ سەر، گەل و مەزهەب و کەسەکا مدۆنە گژێ یۆترینیرە. سەرنیشت و وەرکەوتوو سوریای بە مۆدێلوو نەتەوەی دیموکراتیکی، کە بە سەرمەشقایەتیی ژەنا مبریۆ ڕاوە، گردوو گەلی بە پێوەژیوای و وێڕاوەبەری هامبەش و پارێزنای هامبەشی دژوو سیستمی فاشیستی مکۆشیانێ".
پارێزنای شۆڕشوو وەرنیشتی، ئەرکا
شۆڕشوو وەرنیشتینە ژەنی چەنی یەپەژەی وێپارێزنای جەوهەرییشا کەرد، سەروو ئا بناغەیە ژەنی بەبێ پارێزنای نمەتاوانێ ئازادێ بانێ، لەگەڵ کۆنگرەو ستاری ڕێکوستەی ژیوای دیموکراتیکی و ئازادیشا پتەو کەرد. بەڵام شۆڕشوو ژەناو وەرنیشتی، کە بییەن دەسکەوتوو ئینسانیەتی، جە دوازدەیەمین ساڵشنە مکریۆ ئامانجوو هجووموو فاشیستەکا. داعش زیهنیەتێوەن و ئی زیهنیەتە سەرچەمەی سەرەکیی وێش جە دەسەڵاتی فاشیستی ئاکەپە-مەهەپەی هورمگێرۆ. پێسەو چەنی ژەنی و پیێ نەتەوەکاو کورد، عەرەب، تورکمان، ئەرمەنی، ئاشووری، ئەڵمانی، ئیتاڵی، فەرەنسی و ئەفریقی پێوە دژوو داعشی کۆشیای هامبەششا کەرد و ئینەیچ مشۆم بە هەمان ڕۆح پەی پارێزنای شۆڕشوو وەرنیشتی وەراوەروو چەتەکانە و فاشیزموو تورکی کۆشیایێوی یۆگێرتە بکەرا. ئینە هەرمانە و وەرپەرسیی نەتەوەیی و میاننەتەوەیین. قەوەتبییەی و بەرزکەردەیوەی گەلاو سەرنیشت و وەرکەوتوو سوریای، کە ڕاشا بە فاشیزمی نەدا، وەرپەرسیی تارێخییا.
ئارۆ فاشیزموو تورکی هجوومەکاو داگیرکاری و لکنای پەی سەروو چوار پارچەو کوردستانی زیاتەرێ کەردێنێ. پلانەو گەمارۆدای و تەسفیەکەردەی شۆڕشوو وەرنیشتی ئینا بواروو بەیاگەیاوناینە، هاموەخت هجووموو داگیرکەردەی و لکنای هەرێمەکاو پارێزنای مەدیای و پانیشتوو کوردستانی و عێراقینە وەڵێ موزۆ. پارێزنای گردوو کوردستانی، وەڵێوستەی و فراوانکەردەی هێزوو کۆشیای یۆگێرتەی وەرنیشتنە و پانیشت و سەرنیشتنە فرە گرنگا. ١٢ەمین ساڵیادوو شۆڕشوو وەرنیشتینە، پێویسا ڕۆحوو ئی شۆڕشەیە چوارپارچەو کوردستانینە فراوان بکریۆ و چی ڕووەوە هومێدوو ئینسانیەتی و ژەنە بندەساو جیهانی گەورە بکەرمێ. بانگەواز وەنەو کوردە وەڵاتپارێزنا و ڕێکوزیا شۆڕشگێڵنا و دیموکراتەکا و کەسایەتی و ژەنە ئازادیوازا مکەرمێ، با بە ڕۆحوو مدرامانوو گەشمەرداو ڕۆچێ مەردەی گەورەو ١٤و تەمموزی و ڕۆحوو شۆڕشوو ١٩و تەمموزی، دژوو فاشیزمی و کۆڵۆنیاڵیزمی و خیانەتی کۆشیای هومێدی و ئازادی و یەکسانی فراوانتەر بکەرمێ، خاوەندارێتییش وەنە بکەرمێ و پێوە بپارێزنمێش".
