لیۆناردۆ ڕۆدریگیوز، نوێنەرو مالۆکا مالۆکا ئینترناسیۆناڵی، ئەرەیاۋناش، دەوڵەتوو تورکی بە هرووژمو لەشکرکێشی و ئەرەگیریەکاش پەی سەرو سوریای و عێراقی یاسا مېیاندەوڵەتییەکا پاشێلۍ مکەرۆ و ئەرەیاۋناش کە پەنەوازا دەوڵەتو تورکیای پېسە هێزێوە ئەرەگیری بشناسیۆ.
ڕێکوستەی گلېرگەو مەدەنی مالۆکا مالۆکا ئینترناسیۆناڵی گوزارشتێوەش پێشکەش بە ٨٠ ەمین ئەرەنیشتەی کۆمیتەو دژ بە ئەشکەنجەو نەتەوە یۆگێرتەکا (NY) کەرد. گلېرۆبیەکەی جە ٨و تەمموزیوە دەسسپنەکەردەن و تا ٢٦و تەمموزی بەردەوام مبۆ. ڕێکوستەی مالۆکا ئینترناسیۆناڵی کە چېرو چەمڎاری نەتەوە یۊگێرتەکانە کار مکەرۆ، سەرنجی مېیاندەوڵەتی پەی پاشێلکاریی مافەکا مرۆڤی جە مەنتیقە ئەرەگیرکریایەکانە جە لایەنو دەوڵەتو تورکیایۆ کێشت. لیۆناردۆ ڕۆدریگیوز یۆ جە نوێنەرا مالۆکا ئینترناسیۆناڵی، چا بارۆ پەی ئاژانسوو هەواڵوو فوراتی ANF ی هۊرسەنگنایێش کەرد.
'پەنەوازا دەوڵەتو تورکیای پېسە هێزێوە ئەرەگیری بشناسیۆ'
لیۆناردۆ ڕۆدریگیوز پێرێز ئەرەیاۋناش، بە مەبەسوو ئشناسای دەوڵەتو تورکیای پېسە هێزێوە ئەرەگیری جە سوریا و عێراقەنە گوزارشتێوەشا پێشکەش بە ئەرەنیشتەی ٨٠ەمین کۆمیتەو دژە ئەشکەنجەو نەتەوە یۆگێرتەکا کەردەن. پێرێز واتش: "مەراموو ئێمە و ئی گوزارشتۍ کە پێشکەشما کەردەن ئانەنە کە ئی جەنگە جە چوارچێوەو یاساکانە چارەسەر بکریۆ. مەنزوورم ئانەنە بەپەیلواو ئێمە عالتەرین چارەسەر ئانەنە کە تورکیا پېسە هێزێوە ئەرەگیری بشناسیۆ. جە حەقەتینەنە ئەگەر تورکیا پېسە هێزێوە ئەرەگیری بشناسیۆ، جە چوارچێوەو یاساکاو مافەکا مرۆڤی مېیاننەتەوەیینە، متاومۍ جە ۋەرا ۋەرو کردەوەکاشەنە ۋەرپرسیار نیشانەش بڎەیمۍ.
'مرۆڤەکۍ بە زۆر جە شۊنماو ۋێشانە بەرۍ کریا، ئینە ئەشکەنجەن'
حەرپاسە پێرێز، باسش چانەیچە کەرد، جە ئەرەنیشتەیەکا ڕووان و ١٦و ١٧و١٨و تەمموزینە،کە سەبارەت بە تورکیای ملۊڕاوە، پێشنیارێوە ئاراسەو کۆمیتەی دژ بە ئەشکەنجەو نەتەوە یۆگێرتەکا مکەرمۍ پەی ئانەی تورکیا پېسە هێزێوە ئەرەگیری جە سوریا و عێراقەنە بشناسیۆ. حەرپاسە پێرێز ئەرەیاۋناش: "پەنەوازا کۆمیتەو دژە ئەشکەنجەی، سەبارەت بە مەنتیقە ئەرەگیرکریایەکا هەرمانۍ زیاتەرۍ بکەرۆ. تورکیا ئەرەنیشتۍ مەنتیقەکەی جە شۊنماو ۋێشانە جە سوریا و سەرنیشتوو سوریاینە دەربەدەرۍ مکەرۆ. پېسە موینیۆ ئی کەسۍ ڕووبەڕوو مەترسی ئەشکەنجەدای باوە. بە پاو پەیماننامەو دژ بە ئەشکەنجەو نەتەوە یۆگێرتەکا قەڎەغەن کە مرۆڤەکۍ بە زۆری زۆرداری جە شۊنماو حاڵ و یانەو ۋێشانە دوورۍ بوزیاوە.
'جە ناتۆی هێز هۊرمگېرا و یاسا مېیاندەوڵەتیەکا ماڕانە'
لیۆناردۆ ڕۆدریگیوز، ئاماژەش پانەیچ کەرد کە تورکیا یاسا مېیاندەوڵەتیەکا پاشێلۍ مکەرۆ و ئەرەیاۋناش: "جه ئاژەو ئیساتێنە خاکو دووۍ وڵاتە هامسایا پاشێل مکەرۆ. ئێمە باسوو بەشێوە جە سوریای مکەرمۍ، بەڵام خاکو عێراقیچ پاشێل مکەرۆ. تورکیا سەرو ئی هەرمانا نمەتاویۆ دادگایی بکریۆ، چونکی تورکیا بەشێوەن جە ناتۆی. ئانە پاسە مکەرۆ کە پارێزیا بۆ. ئەگەر کەسێوە پارێزیا بۆ، متاوۆ گرڎ چێوۍ بکەرۆ و کەس ۋنەپەرسایۆش چنی نمەکەرۆ مەنزوورم ناتۆن. جە ئەساسەنە هەڵمەتەکێما دژوو ئی ویرۆکەینە. پەنەوازا تورکیا پېسە هێزێوە ئەرەگیری جە سوریانە بشناسیۆ."
