کەسوکاروو "ئەڤین گۊیی"ۍ ئەرەیاوناشا، ئەڤینە جە پێناوو چوارپارچەو کورڎستانینە گەشمەرڎۍ بییە و گەشمەرڎەبییەیش بۊ بایسوو ماڕای دوژمناو گەلوو کورڎی، ماچۊیچ، ئینە ٦٠مین گەشمەرڎۍ بنەیانەکەیمانە.
"مەدینە کارا" مەتییەو "ئەڤین گۊیی"ی جە مەراسیموو گێڵایۊ جەنازەو ئەڤینۍ جە شاروو سلێمانینە ئەرەیاوناش، پێسە کەسوکاروو ئەڤینۍ و بنەماڵەکەیش خێرئامایۊ ئەڤینۍ کەروو پەی پانیشتوو کورڎستانی و خێرامای خەڵکوو باشووری کەرمۍ، پەی ئی مەراسیمی، سپاسوو گرڎوو ئا کەسا کەرمۍ وەختوو گێڵایۊ جەنازەو ئەڤینێنە پەی پانیشتوو کورڎستانی مانیۍ و ئامۍ دەمماوە.
واتیچش، گەشمەرڎەی ئەڤینۍ جە حەر چوار پارچەو کورڎستانی مەبارەک بۊ، چون ئاڎە پەی چوارپارچەو کوردسانی گەشمەرڎۍ بییە، ئیشەڵڵا ئینۍ دما گەشمەرڎۍ کورڎستانی بۊ و سەرەو گردوو زارۊڵەکورڎا سڵامەت بۊ وئیتر ونەو کەسی نەمجیۊ.
مەتییەو "ئەڤین گۊیی"ی ئاماژەیچش پانەیە کەرڎە، گەشمەرڎەبییەیش بۊ بایسوو ماڕای دوژمناو گەلوو کورڎی و داوا جە خوڎای کەرمۍ کە ونیش بە فیڕۊ نەلۊ و ونەو مامۊزایاش و کەسەکا تەریچما بە فیڕۊ نەلۊ، چون ئەڤینە گەشمەرڎۍ یەکەمەو بنەیانەکەیما نییەنە، بەڵکم تا ئیستۍ ٦٠ ڕۊڵۍ تەرێما پەی چوارپارچەو کورڎستانی گەشمەرڎێنۍ.
جە دمایی قسەکاشنە "مەدینە کارا" سپاسوو خەڵکوو شاروو سلێمانییش کەرد، کە خێرامایۊشا جە جەنازەو ئەڤینۍ کەرد و مەراسیمەکەشنە ئاماڎۍ بیۍ.
دماو دماییئامای واتەو "مەدینە"ی پەی ڕۊنامەنویسا جەنازەو "ئەڤین گۊیی"ۍ جە سلێمانى یانەئاواییش چەنە کریاو بەرەو قەندیل وزیا ڕا، پەی بەخاکئەسپارایش قەبرسانوو گەشمەرڎا قەندیلینە.
هـ.ح
