ھەنگامۍ کرڎەیۍ پەی ئاۋەڎانکەرڎەو ناوچەو ھۆرامانی و ئەۋەگېڵنای زۋانی ھۆرامی پەی بوارو وەنەی و ڕاۋەبەریی، جە نۋیستەی ئاکۊ مارانی-ن و چنڎ بەشێن و هەر جارەو بەشێوش وەڵاومکریۆنەوە.

ۋەرینە

وەنەرۍ بەڕێزۍ، ئانە کە دلۍ ئی پەڕچنڵەینە من پېسەو پېشنېیارکەرڎەی کۊمەڵېۋ بابەتا ۋەرو چەماو شمەی ئازیزیش ۋزۇ، بەس ۋیرلەو من بېیەن و ھەن، پەیۋەڼیش بە ھیچ کەس و لایەنېۋی تەریۆ نېیا؛ من پېسەو کەسېۋی ئازاڎیوازی و سەربەوۍ بە نۋیستەی و ئاماڎەکەرڎەی ئی ھەنگامە سەرەتاییا ھۊرزتەنا. وەڵامدەرو ھەر ڕەخنېۋۍ و ھەر سەرنجېۋو شمەی ئازیزی، ھەر من وېمەن ھەنا و بە پەیلۋاو من ھیچ ۋیر و پېشنېیارېۋە و نۋیستېۋ بېیەش نېیا، کە لاو سەری ڕەخنەیۆ بۊ و مافو گرڎ کەسېۋی و گرڎ وەنەرېۋی ھەن، کە ئازاڎانە ڕەخنۍ و سەرنجۍ وېش ئاراستەو بابەتەکا ئی پەڕچنڵەیە کەرۊ و چا بارۆ من وېم بە سپاسگوزارو ھەر کەسېۋی مزانۇ، کە ڕەخنۍ و سەرنجۍ وېش بنۋیسۇ و ۋەڵاکەرۊۋە. ھەر پاسە سەرو ئا بنەمێ کە قسەکەرڎەی چە بارەو ڕاۋەبەریی ھەر کۊمەڵېۋۍ مافو گرڎ کەسیۋی ھەن، منیچ ئا مافەیە بە وېم مڎەۇ و ئی بابەتا منۋیسۇ و بە شمەی ئازیزیشا پېشکەشۍ کەرۇ.

ھەڵبەتە پەنەۋاز کەرۊ، ۋەڵۍ گرڎ چېۋېۋینە بە شمەی بەڕێزی ۋاچۇ، کە من نە پلە و پایەی ئەکادێمیستی ھەن و نە گەرەکیچم ھەن، نامۍ و نامبانگ پەی وېم تاشۊ، یان وېم بە (ژیرلەو مەرۍ) بنیەوەرە. ئانە کە ھەن و من چە بارەش کۊشش کەرۇ، ئارەزۇمەڼیېۋی وېڕستو سەردەمو زاڕۊڵەی وېم و دماتەر ھەژمۇنو وەشەۋیسی تاتەو من پەی زۋانی ئەڎایی وېش (زۋانی ھۆرامی) و ناوچەو ھۆرامانی بېیەن، کە ئاڎ بە بەھەشتو سەرزەمینی نامېش بەرۍ، ئانە منش پەی گرنگیدای بە زۋانی ئەڎایی و کولتۇرئەژناسی و پەیجۊریکەرڎەی چە بارەو پەیۋەڼییە کۊمەڵایەتییەکاو خەڵکو ھۆرامانی ھاندانا. ھەر چېرو ئا ھەژمۇنەینە و بەپاو وۍ-فېرکەرڎەی و ئەزمۇنگەریی وېم تاۋانم سەرەکېشۇ قەراخەرەکا ‌گەرڎۇنو زۋانی ھۆرامی و ھەر ئانەیچە منش پەی ۋیرۆکەرڎەی سەرکەشانەی ھاندانا و ھەم فېرشکەرڎەنا قسەکەرڎەو وېم ڕێکۋزۇ و ھەم بنەما ڕازۋانییەکا زۋانی ئەڎایی وېم بېزۇۋە.

بەڕێزا، پاسە ۋاتم ئی نۋیستە یان کۊمەڵە مانیفێستۍ نە نۋیستەی پیرۊزۍ ھەنۍ و نە زاڎەو ھۊشی باڵای، بەڵکو ۋەرەنجامو ئەزمۇنگەریی و ئەزمۇنگیرتەو من ھەنۍ، کە چە ماۋەو سی و شش ساڵی ۋېیەرڎەینە و چېرو ھەژمۇن-ئەرەنیاو کەتواری و نەھامەتی و ئەزمۇنگەری سەرو ھۊشو من، ئی ۋیرلۍ چە ئاۋەزو منەنە سەرشاھۊردان و  بە ئی ئاستە یاۋێنی و دماجار منشا بە ئەۋەنۋیستەو وېشا ناچار کەرڎەنا، ھومېڎڎار ھەنا چی کۊششەنە سەرکۆتە بېیەبۊ یان بۊ.

چی بارۆ ھومېڎڎار ھەنا، ئی نۋیستە بەھاو ئا کاتەیشە بۊ، کە شمەی بەڕێز پەی ئەۋەوەنەی و لەیەکۆدایش تەرخانتاکەرڎەن، بە ھومېڎو ئانەی شمە چە کەموکوڕییەکاش چەمپۊشی نەکەرڎۍ.

نۋیستەی: ئاکۊ مارانی