هجووم و بۆردومانەکاو دەوڵەتی فاشیستی تورکی پەی سەروو پانیشتوو کوردستانی بەردەوامییش هەن، تا مێ ڕۆشنویرێ و هونەرمەندێ هەڵوێستەکاشا وەرفراوانتەر مبۆ، چی ڕووێچۆ نویسەر و هونەرمەندێ پەی  ئاژانسەکەیما قسێشا کەردێ و باسشا جە بێهەڵوێستی و دووەڕوویی سیاسەتمەدارا و دەسەڵاتداراو پانیشتوو کوردستانی کەرد.

'کوێ فشەکەرەکاو پەدەکەی، کە واچێنێ وەرما ئەرەگیرکەرێ بەیا بستێوی وەڵاتەکەیما بگێرا'

 چی بارەوە نویسەر عەلی کەریمی، سەبارەت بە هجووم و بۆردومانەکاو دەوڵەتی فاشیستی تورکی و هجوومکەردەی سەروو خاکوو هەرێموو کوردستانی و بێهەڵوێستیی لایەنە سیاسییەکا، بەتایبەت پەدەکە، پەی ئاژانسوو هەواڵوو فورات (ANF)ی واتش: " کوردستان ئیساتێ ئینا قەیرانێوی گەورەنە، دەوڵەتی فاشیستوو تورکیای ئامان خاکوو ئەدێماش ئەرەگیر کەردەن، ئەی کوێ فشەکەرەکاو پارتی دیموکراتوو کوردستانی، کە ڕیفراندۆمەنە واچێنێ ئانە وەرما کە دەوڵەتێوی تەر بستێوی خاکەکەیما ئەرەگیر بکەرۆ، کوا سەرۆکوو پەدەکەی کە واچێ تۆزقاڵێو ئەرەگیرکاری جە هیچ کەسێوە قبووڵ نمەکەرمێ، ئیساتێ کوڕەکەش سەرۆکوو هەرێمییا، ئەی چی نمێ ڕاو میدیاکاشۆ ئا تاریکییەو وەرچەموو خەڵکی ڕۆشن بکەرۆوە و حەرنا کەمێو ڕۆشنکەردەیوە بدۆ سەبارەت بە دۆخەکەی، ئانە کە واتما مووچە و بێئاوی خەتاو تۆ نییەنە، ئەی ئی ئەرەگیرکاری و ڕاوەشکەردەیە پەی ئەرەگیرکاریی چەنی لەیەک بدۆوە، با ئانەیە خاس بزانا، ئەرەگیرکار بێ دلێ خاکیوە، سەرەتا هەولێر و ئامێدی و دهۆک ئەرەگیر مکەرۆ، ئینجا مێ دلێ سلێمانی و مەنتێقەکاو  تەریوە."

'حکومەتوو هەرێمی تەنیا جە پەدەکەی وەش نەبییەن'

 درێژەو قسەکاشەنە، نویسەر عەلی کەریمی ئاماژەش پانەیە دا پێکئاماو حکومەتی بەتەنیا پەدەکە نییەن و چند لایەنێوی تەرێ هەنێ و پێویسا بەیانە دەنگ و واتش: " سەیرا کە بەغدانە و گۆڕان و یەکێتی بێدەنگێنێ چی دۆخەیە، شەرمەزارییا وەختیوە ڕۆنامەنویس و ڕۆشنویرەکێ مەیا سەروو جادەی و دژ پا دەوڵەتە فاشیستەیە دەنگ بەرز مکەراوە، حەر پاسەت زانا هێزەکێ مەیا سەرشا و نمازا دەنگیشا بیاونا، نیشتمان ئەدانە و ئەدایچ چی بێدەنگی و بێهەڵوێستییەتا وەشە نمەبۆ."

'حەر چا وەختۆ کریێنمێ بە چوارپارچێوە ئەرەگیرکاری بەردەوام بییەن'

لاو وێشۆ بەهمەن مەهدی، ئەکتەری گەنج، داواش وەنەو گردوو خەڵکی کەردە، کە بە گولانەتەرین هەرمانەیچ بۆ، هەڵوێست دژوو ئەرەگیرکاری برمانا و واتیچش: "حەر چاوەختۆ کە کریایمێ بە چوارپارچێوە ئەرەگیرکاری بەردەوامییش بییەن، کەچی پانەیچە دڵشا ئاوی نمەوەرۆوە، هەڵای تورکیا گەرەکشەن ئەرەگیرما بکەرۆ، چی وەختەنە پێویسا گرد کەسێوە، گەر بە گولانەترین هەرمانەیچ بۆ هەڵوێستوو وێش بەروزۆنە، تەنانەت گەر بە بەرزکەردەیوە ئاڵاو کوردستانی، یا وێنیسانەدای یا گۆرنیواتەێوە بۆ، ئیتر وەسێن ئەرەگیرکاری، بەڵام ئانێ هەرچی بکەرا من ماچوو، نە عەرەبنا، نە ئێرانی، نە تورکێوی شاخستانی، نەک حەر من وێم، تارێخ ماچۆ، کە کوردەنا و کوردستانی."