پارتو ئیسلامی کوردەسانی بە ئەرەیاۋنێوە نویسیا پاڵپەشتیش جە کۊنیشتوو یەکڕیزی و یەکهەڵوێسی کوردی کەرد کە ٢٦ و نیسانی جە سەرنیشت و ۋەرکۊتوو سوریای ئەنجامدریا.

پیک کۊنیشتەکەی بە هەنگامېوە گرنگ نامۍ بەرۆ، واتش: "ئەرەیاۋنای ئیدارەو ۋێڕاوەبەری، مۆدێلو گلېرگەی دیموکراتیکی سەرو بناغەو ماف و یاسای و یەکسانی گەلا و مافەکا ژەنا کە جە ئەنجامەکا کۊنیشتەکەیچەنە بەرکۊت، ئینەیچ بی بە بناغەو دەسوستەی ستاتۆو کوردا".

پیک جەخت مکەرۊوە پەنەوازا جیاوازی بەینو پارت و گرووپە کوردییەکا لاوزیۆ و مەرامی هامبەش بۆ بە مسۆگەرکەردەی مافە ڕەواکاو گەلو کوردی. ماچۆ: "مشۊم گەل بتاوا بە شێوێوە ئازاد چارەنویسشا دیاری بکەرا. کۊنیشتی نەتەوەیی جە ۋەرنیشتەنە، ئی مافشە پېسە پرەنسیپێوە بنەڕەتی قبووڵ کەرڎەن. ئینە فرە گرنگا و چونکی بەدرێژایی تاریخی نکۆڵی جە کوردی کریان".

پیک سەرنجش وست سەرو گرنگی دیپلۆماسی و بەدەسئاوردەی پاڵپەشتی ڕای گرڎیی جەهانی پەی ستاتۆو ۋەرنیشتی، بەبێ ستاتۆیۍ ئا مافۍ بەدەسئامێنۍ هەمیشە چېرو هەڕەشانە با.

جەخت مکەرۊوە، مشۊم گەلو کوردی جە ۋەرنیشتەنە هێزو پارېزنای ۋێش پارێزنۆ، چونکی گەلی بێ پارێزنای هەمیشە ئینا چېرو هەڕەشانە. ماچۆ: "بەنامۍ پارتو ئیسلامی کوردەسانیۆ پاڵپەشتی جە قەرارەکا کۊنیشتەو یۊبیەی نەتەوەیی مکەرمۍ".