ڕاوەبەروو گلێرگەو ھەنگەواناو کورڎسانی واتش: ھەنگوینوو ئێساڵی جە ڕووەو جۊری و کوالێتیچۊ فرە عال و ناېابا، وەلۍ داخەکەم تا ئیسەیچ جە ھەرێموو کورڎسانینە وشکنگێۋە نیا پۍ وشکنای جۊر و کوالێتی ھەنگوینی.
لوقمان عومەر، ڕاوەبەروو گلێرگەو ھەنگەواناو کورڎسانی بە ڕۊنامەو " بازرگانی و پیشەسازی"یش وات؛ ھەنگوېنی عال و خراپ بازاڕەکاو ھەرێموو کورڎسانینە ھەن. ھەنگوېن ھەتا جە گەڵاوگوڵی وێڕسکیۊ نزیک بۊ پوورە ھەنگەکۍ جە ئاوەڎانیوە دوورۍ با جە ژیوگێوە وێڕسکەنە با دوور بۊ جە دەسوو خەڵکی متاومۍ پنەش واچمۍ ھەنگوینې عال و کوالێتیی بەرز.
"لوقمان عومەر" واتش؛ ھەنگوېنوو ھەرێموو کورڎسانی ېۊن جە عالتەرین ھەنگوینەکا
جە دنیانە. جە ڤیستیڤاڵە میاننەتەوەییەکانە بە ېۊ جە (١٠) عالتەرین ھەنگوینەکا دنیێ حسێب کرېۊ. مەڵامەتوو عالیی ھەنگوینوو کورڎسانی گێڵۊوە پۍ ېەرۍ مەڵامەتا. ېووەم: دۊڵەمەنې مەنتیقەکەی بە گوڵۍ وێڕسکۍ، دووەم: کەمیی ڕێژەو شۊی جە مەنتیقەکەنە،
ېەرەم : بەپیتیی خاکوو کورڎسانی.
سەبارەت بە بڕوو ھەنگوینوو ئێساڵی جە سنووروو پارێزگاو سلێمانینە، لوقمان عومەر واتش؛ ھەنگوینوو ئێساڵی فرە عال و ناېاب بۍ . جە پوورێوەنە (٧ پۍ ١٠) کیلوا ھەنگوین وەرھەم ئامابێ. بە مەزنڎەو ئێمە ئێساڵ (٥٠٠) تەنۍ ھەنگوېن پۍ ساڵە و ٢٠٢٢ سنووروو سلێمانینە وەرھەم ئامان .
لوقمان عومەر واتش؛ ئا ھەنگوېنەی بازاڕەنە بە (١٠٠٠٠) دینارۍ ورەشیۊ جە ڕاسینە ئانە
ھەنگوین نیا و دروسکرېاو وڵاتە ھامساېەکان. سێعروو کیلوۍ ھەنگوینی عالی ئینا مابەینوو
( ٤٠ پې ٨٠ ) ھەزار دینارانە. ھەنگوینی عالتەریچ ھەن ئینا کلۊروو دارەکانە، جە مەنتیقە کویسانییەکانە مێزیۊوە، دوور جە دەسوو خەڵکی ئانە عالتەرین جۊروو ھەنگوینین.
سەبارەت بە جیاکەرڎەېۊ نەوعیەتوو ھەنگوېنی عالی جە ھەنگوینی خراپې، "لوقمان عومەر" واتش؛ ھەتا ئی وەختە جە ھەرێموو کورڎسانینە تاقیگەما نیا پۍ وشکنای ھەنگوینی. وەلۍ جە
زانسگەو پۊلیتەکنیکوو سلێمانینە سەرحاڵوو ئەسای تاقیگێوەنۍ تایبەت بە وشکنای نەوعیەتوو کوالێتیی ھەنگوینی. ھومێڎەوارێنمۍ جە نزیکترین وەختەنە ئا تاقیگە بنریۊرە و دەس بە ھەرمانۍ کەرۊ.
ھ.ئ
