جە چوارچێوەو سەرۋنەدای و گلېرۊبیەو شاندو هەدەکە و دەبەپە و دەم پارتینە جە پانیشتوو کوردەسانی، شارو هەولێرینە سەبارەت بە پەیامو سەدەو ڕابەر ئاپۆی، چنی یۆگېرتەو ئیسلامی کوردەسانی کوۍ بیێوە.
شاندێوە پارتو یەکسانیی و دیموکراسیی گەلان (دەم پارتی) و هەدەکەی و دەبەپەی شارو هەولێرینە، جە چوارچێوەو دیدار و گلېرۊبیەکاشانە پەی هۊرسەنگنای پەیامو سەدەو ڕابەر ئاپۆی چنی یۆگېرتەو ئیسلامی کوردەسانی کوۍ بیێوە.
شاندەکە جە مەرال دانش بەشتاشۍ، هامسەرۆکو هەدەکەی، سەرحەد ئەرەن، ئەندامو دەسەو ڕاوەبەری دەم پارتی، موراد سارساج، هامسەرۆکۊو کۆمسیۆنو دیپلۆماسی دەبەپەی، ساڵیحە ئایدەنیزە، پەرلەمانتارو دەم پارتی، ڕەزان کاگانئارسەلان، هامسەرۆکو ئەنجوومەنو جوانا دەم پارتی و موراد شەنی، نوێنەرو دەم پارتی جە هەولێر پێک مۍ.
جە گلېرۊبیەکانە، گرڎ لایۍ جەختشا جە گرنگی جابەجێکەردەی پەیامو سەدەو ڕابەر ئاپۆی بە نامونیشانو "ئاشتیی و گلېرگەی دیموکراتیک" و ئازادیی بەڎەنی ڕابەر ئاپۆی کەردۆ.
هامکات یۆگېرتەو ئیسلامی کوردەسانی ئاماژەش بە چارەسەری کێشەو کوردی جە سەرنیشتوو کوردەسانینە دا و بە پەنەواز زانیا کە پەی وەڵۍ وستەی پرۆسەکەی و ئەنجامگېرتەیش، ئازادیی بەڎەنیی ڕابەر ئاپۆی پێکبۍ.
هامكات، ئی شاندە ماوەو یەرۍ ڕووان ئینۍ شارو هەولێرینە و سەبارەت بە بانگەوازییەکەو ڕابەر ئاپۆی زنجیرێوە گلېرۊبیەیشا چنی لایەنە سیاسییەکا، ڕۆشنۋیرا، نوویسەرا، پەرلەمانتارا و ڕێکوزیاکا ژەنا ئەنجام دان، هەرپاسە ئارۊیچ گلېرۊبیەکێشا درێژەشا بۆ.
هەرپاسە وەڵتەر، جە مېیانو مانگەو شووباتینە، شاندو ئیمرالی دەم پارتی سەردای پانیشتوو کوردەسانیشا کەرڎ و چنی ۋەرپەرسا یەنەکەی و پەدەکەی و هەرێمو کوردەسانی کوۍ بیێوە و سڵامو ڕابەر ئاپۆیشا یاۋنا.
یاگۍ ئاماژەیەنە، دماتەر جە درێژەو ئا سەرۋنەدایانە شاندێوە تەرو دەم پارتی و دەبەپەی سەرشا ۋنەو پانیشتوو کوردەسانی دا و شارو سلێمانینە چنی بەشێوە جە لایەنە سیاسییەکا سلێمانی، نوویسەرا، ڕۆنامەنوویسا و کەسایەتییەکا کوۍ بیێوە.
