ئا کۊچەرۍ کە سەروو مەرزوو شاروو "وانی و ئێران"ینە گیرېا جە لاو سەروازا ترکیەېۊ ڕووتۍ کرېاوەو پۍ ماوەو چنڎ ڕووێوە دلۍ وەروێنە مازاشاوە.

جە وڵاتوو ئێرانی و وۋەرکەوتوو کورڎسانی زېاڎ جە ېەرۍ مانگان کۊشیای و ناڕەزاېې ملۊ ڕاوە. سەڎا کەسۍ گەشمەرڎۍ بیێنۍ و ھەزارانیچ گیریێنۍ.

ئا کەسۍ کە چێروو دەسەڵاتوو ئێرانینە ورمەېا، ھۊڵێ مڎا وێشا بیاونا شاروو وانی جە سەرکۊتوو کورڎسانی. ئا چالاکۍ و وەرھەڵسکارۍ کە جە دەسەڵاتوو ئێرانی ور مەېا، جە سەروو مەرزوو شاروو "وان"ینە جە لاو سەروازا ترکیەیۊ گیرېا و ئەشکەنجە مڎرېا. ئا مەرزە زمساننە سەرڎاوسۊڵەش فرەن و پۍ پەناھەنڎا بۊ بە ڕاو ئەشکەنجەی و مەرگی. ژمارێوە فرە پەناھەنڎۍ کە ھۊڵێ مڎا چا مەرزۊ پڕاوە جە لاو سپاو ترکیەېۊ گیرېا و ئەشکەنجە مڎرېا.

مانگەو کانوونوو ېووەمی گرووپێوە جە پەناھەنڎاو ئێرانی گەرەکشابۍ وێشا بیاونا شاروو وانی، جە لاو سەروازا ترکیەېۊ گیریێ، دماو گێرتەیشا ڕووتۍ کریێوە و بەڕووتی سەروو وەروێرە کێشتێشا. گرووپێوە، کە تەمەنشا جە مابەینوو (١٥_ ٣٠) ساڵا بۍ پۍ ماوە و چن سەعاتۍ ڕووتۍ کریێوە و جە لاو سەروازا ترکیەېۊ ئەشکەنجە دریۍ.

ئا ھاموڵاتییە ئێرانیۍ، کە جە لاو سەروازا ترکیەېۊ ئەشکەنجە مڎرېا، دماتەر بەڕووتی کیاناشاوە ئۊڎیموو مەرزی و پۍ ئێرانی. ئا کەسۍ کە ئینۍ دڵەتەپۍ ئانەینە کە جە لاو دەسەڵاتوو ئێرانیوە کوشیا، سەرجەنۊ ھۊڵێ مڎا مەرزنە پڕاوە و وێشا بیاونا شاروو "وان "ی  چالاکێۋە فارس کە تەمەنش (٣٥) ساڵێن جە لاو سەروازا ترکیەېۊ ئەشکەنجە درېان، باسش جە ڕووەداکەی کەرڎە و واتش؛ من خەڵکوو تارانینا دماو ئانەی ژینا ئەمینی- شەھیڎە بییە، من دژوو دەسەڵاتی مڎرانیوە ھەرگیز ھەنگامەما پۍ دمای نەنیێنە، پنەشا زانانی کە بەشڎاری ۋێنیشاندایەکام کەرڎەن، گرڎ ڕووۍ هور کووێنۍ سەروو ېانەکەېم، فرەو کەڕەتا ئەنڎاما خێزانەکەیم بەرێنۍ ئەشکەنجەشا دێنۍ. خانەواڎەکەېچم گەرەکشا نییا من کوشیە و وەروو ئانەیە ڕوانەو ترکیەیشا کەرڎا. ھەرچنڎە وێم گەرەکم نەبۍ بەو من گەرەکم بۍ درێژە بە مڎرامانی دەو، وەلێم ھەڕەشۍ کوشتەیشا جە خانەواڎەکەېم کەرڎە. وەروو ئانەی ناچار بێنۍ ئێرانې جیا بازوو، دماو ئانەی جە ئێرانۊ ئامانی پۍ شاروو ۋانی سەروازەکۍ ترکیەی من و (٥) کەسۍ تەرێشا گێرتۍ، کە چەنی من بێنۍ. پۍ ماوە و چن ڕوێوە ئەشکەنجەشا داېمۍ، جە سەرڎانە و دلۍ وەروێنە چنڎ سەعاتێوە ئاستیمێشاوە و ئەشکەنجەشا دایمۍ. گرڎوو گیانیما زامڎارشا کەرڎ. دماتەر ئێمەشا وستۊ دېموو ئێرانی، پۍ ئانەی نەگنمۍ دەسوو ڕژێموو مەلایەکا من واوەی داخڵوو دیموو ترکیاې بیانیوە.

ھ.ئ