سەرۊکی گرڎینەو گلێرگەی ئیسلامیی کوردستانی (جیک) "هافز ئەحمەڎ تورهالی" ئەرەیاوناش، کە هامسەرگێرتەی جە عومری کەمنە کردەوەی ئیسلامی نییا و ئانە عەقڵیەتوو ئیسلاموو دەسەڵاتین. "تورهالی" واتش، "جە ڕووەو ئیسلامیوە قابلوو قبووڵی نییا، کە کناچێ بەزارۊڵەیی دریا شوو و ئانە ستەمێوە گەورەن، کە چەنەشا کریۊ.

تورهالی ئانەیچشە وست ڕووە، کە وەقفوو ئایینی ترکی ئەرەیاونانش، کە کناچێ ٩ ساڵینە و کوڕێ  ١٢ ساڵینە تاوا هامسەرگێریی کەرا. تورهالی ئاماژەش پەی ئانەی کەرڎە، کە ئا ویرۊکەردەیە  ئیسلامی نییا و ئەرەمەرزیایەکا پێسە وەقفوو دیانەتی ئەرەمەرزییێ ئیسلاموو دەسەڵاتینێ. تورهالی واتش، " ئەرەمەرزیایەکا پێسە وەقفوو دیانەتی ئیسلامی شێونا و ئا ئەرەمەرزییێ حیچ خزمەتێوە بە ئیسلامی مەکەرا".

هامسەرگێرتەی عومرێوە کەمنە تاوانا

تورهالی ..جەختش چانەیە کەرڎۊ، کە دیانەت و تەریقەت و کۆمەڵە هامشێوەکێشا جە بارەو هامسەرگێریی زارۆڵە کناچاوە، فرە چێوێ ماچا وەلێم ئا قسێ حیچ پەیوەنڎییشا بە ئاینیوە نییا و مشۆم گەل هۊشیار کریۊوە. تورهالی واتش " جە سوورەتەو "نیسێنە" جە قورعاننە وەختێ باسوو زارۆڵە کناچا کەرۊ، ماچۊ تا یاواعومرێ کە مارەییشا بێ. یانێ عومرێ جە ڕووەو ماددی، کۆمەڵایەتی و عایلەییوە تاوا وەرپەرسیاری ور گێرا. یانێ لانوو کەمی ١٨ ساڵێ. جبەروو ئینەیۊ ئەوی تەر تاوانا. شووکەرڎەی کناچا تەمەنێ کەمنە تاوانا و کوشتەی کناچەکێن".

خەیاڵشانە ڕاگیریی جە ئیسلامێوە دیموکراتیکی کەرا

تورهالی باسش چانەیە کەرڎ دەسەڵاتدارییەکاو دماو پێغەمەری، سەروو بنەماو ئیسلامی نەمەرزیێنێرە و ئاڎێ زیاڎتەر پەی مسڵەحەتوو دەسەڵاتدارا مەرزیێنێرە و واتش، "وەروو ڕاگێرتەی جە ئیسلامێوە دیموکراتیکی، ئیسلامی دەسەڵاتدارشا مەرزنانەرە. ئەرەمەرزیێکێ پێسە شێخوئیسلامیشا وەش کرد. بە پاو هەستی و مسڵەحەتەکاشا فتوا مڎا. ئا ئەرەمەرزییێ دەسەڵاتشا پیرۆز کەرڎەن، گەرەکشانە مسوڵمانا کەرا بە کۆیلەو وێشا. ئەرەمەرزییێوە بە نامێ " دیانەتی" ئەرەمەرزیاو دەوڵەتوو کەمالیستین. کە هەوڵێ مڎۊ لادای جە ئایننە وەش کەرۊ و ئاینی ور شانۊوە".

تورهالی.. جە بارەو تەریقەتەکاو نزیکوو حکومەت و دەوڵەتوو ترکیوە  واتش، "دەوڵەتوو کەمالیستی وێش بە مڵکڎاروو ئا ئەرەمەرزیایا مزانۊ و پارێزنۆشا. ئانە بۊنەو یاگەگێرتەی سەنتزوو "تورک-ئیسلام"ی دلێ کۊمەڵینە  و زیاڎتەربییەی نەژاڎپەرسیی ترکی مەرزیێنێرە. وەروو ئانەی نەتەوەکا  و ئایینەکا تەری تاوناوەو دلێشانە بەرا،. ئی ئەرەمەرزییێ بە دەسوو دەوڵەتی کورڎساننە مەرزییێنێرە. مشۊم کۆمەڵوو کورڎی باوەڕمەنێ و دڵسۆزێ  گرد هاگاڎارێ ئا مەسەلێ با".

هـ . ب