دلۍ تۆپۋارانکەردەینە و هرووژمەکانە، بۆمبێوە چۍ و بۆمێوە چەولاتەرۆ گنۆرە واری. بەڵام دەنگو هەلهەلەو ئەڎایا جگەرو ئەرەگیرا بڕۍ. گۆرانییە شۆڕشگێڵنیەکۍ جوانا و مۆراڵ بەرزیشا پېوەرە بێنۍ بە جوابێوە جەرگبڕو ئەرەگیرا، ئەرەگیرانێوە کە تەنیا کۆمکووژی مزانا.

ئەوەڵجارا جە تاریخو ۋێشەنە مڎرامانێوە پی جۆرە جە بەنداوو تشرینینە ڕاوەبەر مکریۆ. جە تاریخەنە حیچ وەختۍ ئی مڎرامانە نەبیەن. مڎرامانێوەن کە ئەرەگیرۍ جە ئاستشەنە چۊکەرە ئامۍ و شێویۍ. دووەم گۊرەتەرین سوپاو دلۍ ناتۆی جە ۋەرا ۋەرو ئیرادەو گەلی و تامەزرۆیی مڎرامانیشانە مەڕیا. ئا گەلەی تەنیا ئا ڕێشە گېرتەنە ۋەر، هەڵبەتە بە دڵنیاییوە مېیاوۆ بە ڕاو ئازادی و ئاڵاو سەرکۊتەی جە بەرزتەرین یاگێنە هۆرمڎۆ و شۊکنۆشۆ.

سەرو ئی ڕاو ئازادییە، هێدی هێدی کارەوانو گەلی بەرەوو بەنداوو تشرینی کۊت ڕا. گەل بە مۆراڵ و ورە بەرز بۍ، ئەڎایا جلوبەرگی ڕەسەنو کوردیشا کەردەنەو ۋێشا ڕازناوە. بڕۍ جە تاتەکایچ بە چوخرانک و مێزەرەی کوردییوە بەژن و باڵاو ۋێشا ئاڼنەی تەر کوردییانە بەروست و مۆراڵ بەخشێنۍ بە جوانا. سەرو ڕاو بەنداویۆ بێڼۍ. فڕۆکەی جەنگی سەرو سەرەیشاوە خولیێوە، بۆمبۍ سەرشارە وارنۍ، کارەوانو گەلی بۊمبواران کەرۍ، بەڵام گرڎو مەرامو گەلی یەک چێو بۍ؛ ڕووە جە بەنداوو تشرینی...

گەل سەرەڕاو هرووژم و بۆمبوارانەکەو دۆڵەتو تورکی نزیک بە ئامانجەکەیشا بێنێوە؛ بەنداو تشرینی. سەرو ڕاو ئامانجو گەلی گرڏ کاتێ ترۆمبێلە فریاگوزارییەکێشا بە ئامانج گرییێنێ، جگە چینەی ترۆمبێلو کارەوانەکا گەلی بە مەرام گیریێنێ و دلێنە بریێنێ. ئا ڕێ کە بە هرووژمو فڕۆکەو جەنگی گرڏ چاڵ چاڵ بییەبێ، بەڵام سەرەڕاو گرڏو ئینیشا گەل بە قەراردارییۆ یاوا بەنداوەکە.

یوەم وشە جە بەنداوەکەنە وەرو گۆش و ئینسانی گنۆنە درووشموو 'مڏرامان ژیواین'. بە دەنگو جوانا و هەلهەلەو سەرکۆتەو ئەڏیایا. ئا هرووژمێ کە بەبەردەوام کریێنێ، گرڏی پوچەڵ کەرێنێوە. دماتەر بە سەرمەشقایەتی ئەڏایا، هورپڕای ئازادی گێڵنێنێ.

'وەرەتاو ئازادی تشرینەنە ئاوا مەبۆنە'

بەنداو تشرینینە جە حەر گۆشێوەنە چێرۆکێوە بێ. جە لایێ جەمێ جوانێ کە گۆرانیێ شۆڕشگێڵیێ واچێنێ، جە لێوەتەرۆ ئەڏێ دەنگ وەشێ هامشانو بەتەمەناکا گۆرانیێ واچێنێ. جەم بە جەم زەماوەنە گێڵنێنێ. ژیوایێ فرە ڕەنگ و جیاواز. جە بەنداو تشرینینە گرڏ کاتێ وەرەتاو ئازادی درەوشییۆوە، گرڏ کات و ساتی مڏرامان چاکە ئینا بەرزترین ئاستەنە.

دەنگو ئاوێ ئارامێ، دەنگو باڵندەکا، ژیواو ئینسانەکا جوانتەر کەرێ. سەرەڕاو ئانەی بەنداو تشرینی بەمەڵامەتو هرووژمەکاوە زەرەری فرەش وەرکەوتەن، بەڵام بییەن بە قیبلەو مڏرامانی. هاژە هاژو ئاوێ، پرشنگو مانگەشەوێ، ئا جەمەی چبەرو ئایێرەکەی تەنیا دەنگو 'مڏرامان ژیواین'و گۆرانیێ 'ئامێنمێ پەی بەنداوی، بەنداو بەنداو وێمانە'ی واچێنێ.